II. Korinitha 8 - Ṉa Alaofua Falu 1923 1949

¹ Ma sui, doora kera, mika faaroṉo kamulua ana lea la tha God na kera falea ifana figua nai Masedonia ki;

² Na si maṉa na kera ilitooda faamau mena ana taa la na kera toto ania, seethathala la kera ne oro ana rofe la baita kera e adea na kera tona falea si do ne oro ka tatha.

³ Uria ku faamamanea si do na nau ku thaitoomana suli kera, na sulia si do na kera talaana ili lana, iu, ma asi do na ka tatha asi do kera talaana ili lana, kera tala thathamii falea,

⁴ Kera ṉata kwaitakoi isamilia asi maṉa oro sulia lea la eri fasi keki kwaiadomi ana fale la eri ifana toa abu:

⁵ Ma do eri, ’uria bana mili manatatoo ṉado ani kera e ai, si do totonao kera fale kera i talaada ifana ṉa Lord, ma ifamilia asi do na tha God ka thathamia.

⁶ Adedea mika soree isatha Taetasi, na ’uria nia e thafalii ra inao, kai faasuia lau boo ra inao, kai faasuia lau boo ra eri ana lea la ani kamulua lau boo.

⁷ Mania ’uria mulu rikii do asi do ki sui bana, ana fitooa, ma ṉata la, ma thaitoomana la, ma seemabea oro, ma liothau la kamulua uri kamilia, beta suli kamulua na muki rikii do ana lea la eri lau boo.

⁸ Nau ku ṉata fasi mado kwa suuwai kamulua ania e ai, ana seemabea tei toa lau kwai ilitoona liothau la kamulua lau boo sa ka mamana mado e ai.

⁹ Sulaania mulu thaitoomana lea la Lord kulu tha Jesus Christ, na, boro sa nia ka rikii do mena, e toto ana rofe la uri kamulua, fasi ana rofe la nia eri ni kamulua muki rikii do.

¹⁰ Ma nau ku falea si do sulia manataku sulia si do eri: uria kai adomi kamulua, na kamulua toa totonao na tee fa ṉali e sui iamulua maṉa na mulu thafalia, talitoona ili lana e ai, thathami lana si do eri.

¹¹ Mania maṉa eri muki faasuia ili lana lau boo; fasi talafana mulu fifarao ana thathami lana, alafana lau boo muki faasuia asi do na muki talaana ili lana.

¹² Sulaania mada sa ta wane e fifarao, kera ala fafia asi do nia rikidaki, ma asi do ne ai si rikidaki ka ai.

¹³ Uria nau kwasi ṉata una eri, fasi tei toa lau keki to lea lau ada, ma ni kamulua kai taa iamulua:

¹⁴ Sui fasi do eri kai totoo; si do oro eki na mulu rikidaki kai adomida faisia rofe la si maṉa eri, fasi si do oro na ni kera keki rikidaki toto kai adomi kamulua faisia rofe la; fasi do eri kai totoo:

¹⁵ ’Uria si do na kera keda, Wane ne gwea do oro e ai ta si si totonee to; ma wane ne gwea do faekwa e ai si rorofe.

¹⁶ Ma sore lea la ifatha God, ne alua liothau la baita eri boo uri kamulua i ruruuna tha Taetasi.

¹⁷ Uria e mamana nia ade sulia si do mili sorea; ma ni nia e seemabe faamau, manatana ne abula sulia na ka lae kau isamulua.

¹⁸ Ma mili arasia kau doorakulua bi nia na kera taṉo nia sulia si faaroṉoa lea ana figua eki sui bana;

¹⁹ Ma talitoona si do eri e ai, figua eki kera alu nia lau boo kai lae bi kamilia fafia lea la eri, na miki ra ania ana inotoa ṉa Lord, ma fasi kai rikia seemabea kamilia:

²⁰ Uria na mili beta kamilia faisia si kula eri, ada ta wane ka alaṉi kamilia ana ta si do sulia si do baita eri na kera tona falea, na mika ra ania:

²¹ Uria na mili aṉasi fasi mika ilia si do ne kokoto, talitoona inaofana ṉa Lord e ai, inaofana imole ki lau boo.

²² Ma mili arasia doorakulua bi keroa, na mili ilitoona asi maṉa oro ne seemabe asi do oro ki, ma si maṉa eri nia seemabe ka tatha, sulaania fitooa baita eri ne fitoomulua ania.

²³ Ma sulia tha Taetasi, nia ado bi nau ma kai ra ofu bi nau ifamulua; mado sulia doorakulua eki, keroa toa na figua eki kera arasida, keroa do na kai faainotoa tha Christ.

²⁴ Mania muki fatai nia mamana lana liothau la kamulua isada inaofana ofu la eki, ma mamana lana si do eri mili faabaita kamilia ania suli kamulua.