II. Korinitha 7 - Ṉa Alaofua Falu 1923 1949

¹ Mania uria na alaṉaia eki ifakulua, toa liliothaua nau ki, kuki faafalu kulu faisia si do ki sui bana na kai faataalia seekulua ma spirit kulu, kuki faaabu teefau ani kulu ana mau la atha God.

² Muki thathagoni kamilia isamulua: misi abula taa ata wane, misi labatania ta wane, misi abula dodora ata wane.

³ Nau kwasi sorea si do eri fasi kwa alaṉi kamulua ana ta si do: uria nau ku sorea naa, na muka to i ruruumilia fasi kuki mae ofu ma kuki maruki ofu.

⁴ Ku seeraa faamau ana ṉata laku uri kamulua, ku faabaita nau faamau suli kamulua: kera faainamaruki nau faamau, seethathala la nau ka olomaliṉa ana taa la eki sui boo na mili to ania.

⁵ Uria na kada mili fula i Masedonia mena, seemilia e ai si mamalo, taa la e thauṉi kamilia ta kula si ei; i thara firu la ki, ma i la ruruumilia mau la.

⁶ Una ena mena tha God, na ka faainamarukia toa kelawanea ki, e faainamaruki kamilia ana fula lana tha Taetasi;

⁷ Ma ana talitoona bana fula lana e ai, ana inamaruki la eri lau boo na kera faainamaruki nia ania ani kamulua, si maṉa nia faaroṉo kamilia asi thathami la kamulua, ana liodila kamulua, asi do na kai oga kamulua uri nau; adedea kwa seethathala ka tatha.

⁸ Uria na ku faaliodila kamulua mena ana leta nau ba, lioku si dila ania si maṉa eri, boro so kwa liliodila mena; uria nau ku thaitoomana na leta be faaliodila kamulua, boro sa liodila eri do ana talitoona kasi maṉa seseka ni mena.

⁹ Si maṉa eri kwai seethathala, uria na kera faaliodila kamulua e ai, uria bana na kera faaliodila kamulua ana manata akele la: sulaania kera faaliodila kamulua ana liodila na tha God e falea, fasi e ai ta do si aana faisi kamulua suli kamilia.

¹⁰ Uria na liodila na tha God e falea kai ilia na imole kai akeletania manatana fasi keki faamaruki nia, do na kesi liodila ania: ma liodila ana fanua nei iano e adea na keki mae.

¹¹ Uria rikia fasi, si do eri boo, na kera faaliodila kamulua ana liodila na tha God e falea, e ilia na mulu aṉasi faamau, iu, mulu sorea mulu dodoloa, iu, e taa faamau iamulua sulia do eri, iu, mulu mau faamau, iu, mulu thathamia faamau do lea ki, iu, mulu seemabe faamau, iu, mulu duua do eri! Asi do ki sui bana mulu fatai kamulua mulu dodoloa asi do eri.

¹² Mania ku kekeda mena kau isamulua, uria wane eri ne abula taa e ai, ma uria wane eri na kera abula taa iana ka ai lau boo, ma fasi liothau la baita eri na mili liothau ani kamulua inaofatha God kai to fatai isamulua.

¹³ Mania kera faainamaruki kamilia uria na kera faainamaruki kamulua; ma mili seethathala ka tatha uria seethathala la tha Taetasi, sulaania kamulua sui mulu faasukwaia spirit nia ka to lea lau bana.

¹⁴ Uria na mada sa nau ku faabaita nau ana ta si do isana uri kamulua, kesi faaseenoni nau fafia; ma talafana mili ṉata mamana isamulua sulia si do ki sui bana, alafana lau boo faabaita la kamilia eri, na nau ku faabaita kamilia ania inaofatha Taetasi, e mamana naa.

¹⁵ Ma nia thathami kamulua ka tatha i ruruuna, si maṉa kai manatatoona na kamulua sui boo mulu ade sulia ṉata laku, na mulu thathagoni nia mai ana mau la ma ana leleba la.

¹⁶ Mania ku seethathala uria asi do ki sui boo ku manatatoo ṉado uria si do lea ki ifani kamulua.