II. Korinitha 6 - Ṉa Alaofua Falu 1923 1949

¹ Ma mika ra ofu bi nia, mika ṉata kwaitakoi lau boo, mika sorea musi maruṉee ṉalia lea la tha God.

² (Uria nia sorea, Asi maṉa nau ku ala fafia ku fafuroṉo oe, Ma afa boṉi ana marukia ku adomi oe: rikia fasi, si maṉa eri maṉa nia e ala fafia; rikia fasi, fa boṉi eri fa boṉi ana marukia):

³ Misi lukatania si maṉa na sa mika faataofai nia ta wane ana ta si do, ada keki ṉata taa sulia ra eri na mili ra ania;

⁴ Asi do ki sui bana mili ṉata ifamilia, mala toa ni ra tha God ki, asi lio ni susuu ṉado la, ana to la ana taa la ki, ana rofe la ki, ana fualaṉa ki,

⁵ Ana aliliboa la, asi maṉa ba ki na kera suusi kamilia i la lokafu, ana ṉalu la ki, asi ra eki na mili ulafu ania, ana tharai la ki, ana thaofa ki;

⁶ Asi lio ne thathaulia, ana thaitoomana la, asi lio ni doanita tatha la, ana adelea, atha Spirit Abu, ana liothau la na kesi lole ania,

⁷ Asi baea ana mamana la, ana sukwaia tha God; ana rauma kokoto la ana aba aola ma ana aba mauli,

⁸ Ana inotoa ma fare faekwa la, asi do taa na kera sorea suli kamilia ma si do lea; mala toa na kera malaoe, ma sui mili mamana;

⁹ Mala toa na kera dora ani kamilia, ma kera thaitoomamilia boo; mala toa na mika mae, ma rikia fasi, mika maruki; mala toa na kera kwae kamilia, ma kesi thauni kamilia;

¹⁰ Mala toa na mika liodila, ma mika seethathala ṉado; mala toa na misi rikii do, ma mili ilia na toa oro kera rikii do bada; mala toa ne ai amilia tei si do, ma amilia si do ki sui bana.

¹¹ Fokomilia e laa uri kamulua, toa nai Korinitha, ruruumilia e baita.

¹² Kamilia misi faaseseka faisi kamulua, ruruumulua bana ne faaseseka.

¹³ Ma sui fasi muki duua si do eri ifamilia (ku ṉata mala isana baree wela nau ki), ruruumulua kai baita lau boo.

¹⁴ Musi kani ofu ani kamulua ana ioke bia toa na kera fitala: sulaania nifana ade lana fasi kokoto la kai ado bia si do na kera lufia? mado nifana ade lana fasi ṉa lalaa la kai to ana kwaimani lea la bia maerodo?

¹⁵ Ma ka ufita fasi tha Christ kai to ana tee si lio bia tha Beliala? mado wane ne fitoo kai ṉalia tei si asi do wane ne fitala?

¹⁶ Ma ta si ta fetei na biu baita tha God kai kwaimani fafia bia god na kesi mamana ki? uria ni kamulua biu ṉa God maruki; ’uria si do na tha God e sorea, be una eri, Nau kwai to ani kera, ma kwai abula ani kera; ma ni nau kwai God kera, ma keki toa nau ki.

¹⁷ Mania Muki lae kau faisida, ma muka eeta, tha Lord e sorea, Ma musi suana do ne ai si falu; Ma nau kwai thathagoni kamulua mai,

¹⁸ Ma nau kwai Maka kamulua, Ma ni kamulua kaluwane nau ki ma thari nau ki, tha Lord ne sukwai ka tatha e sorea.