II. Korinitha 5 - Ṉa Alaofua Falu 1923 1949

¹ Sulaania mili thaitoomana biui maku kamilia na mili to iei i fanua nei iano mada sa kere ogea, amilia ta biu na tha God kai tabalia, biu na kesi thauwai nia ana abee imole, na kai to tatha, i thalo lo ki.

² Uria mili kwai baita ana biui maku nei, mili thathamia faamau keki alua fafi kamilia biu kamilia ita mai i thalo:

³ Mada sa keki alua fafi kamilia fasi ka ai kesi fulatoomilia maṉa na miki talu.

⁴ Sulaania ni kamilia na mili to ana biui maku nei mili kwai baita, uria na do kulua e to fafi kamilia; uria na mili thathamii tanusia tooni kamilia e ai, uria na miki thathamia keki alua lau ta tooni fafi kamilia, fasi do eri na toto kai mae keka thuthumai nia ana marukia.

⁵ Ma nia ne thauwai kamilia uria si do eri boo na tha God, ne falea naa thafali lana si do lea ki ifamilia na tha Spirit.

⁶ Mania mili seeraa ṉado, ma mili thaitoomana, si maṉa na miki ni ana seena imole, miki to mai i thara faisia ṉa Lord.

⁷ (Uria na mili abula ana fitooa, sulia si do na mili rikia ka ai);

⁸ Iu, mili seeraa, mika thathamia ka tatha miki to mai i thara faisia seena imole, fasi miki to isana ṉa Lord.

⁹ Mania miki aṉasi lau boo, fasi, si maṉa na miki to bamilia isana mado miki to mai i thara faisia, kai lea iana uri kamilia.

¹⁰ Uria na toto keki fatai kulu sui, e ai si ei boo, inaona do ni ono la tha Christ na Wane ni kotu; fasi kuka ṉalia, ta imole u boo i talaana ma ta imole u boo i talaana, si do na kai duua asi do ne ilidaki maṉa ne toto i seena imole, do lea mado do taa.

¹¹ Mania uria na mili thaitoomana mau la na kera mau ania ana ṉa Lord, mili thathamii bulasia ruruuna wane ki, ma mili to fatai isatha God; ma do nau ku manatatoo ṉado uria na miki to fatai lau boo i liomulua.

¹² Uria ne ai misi ṉata lau suli kamilia isamulua, mili fatai nia si kula na muki faabaita kamulua ania suli kamilia, fasi amulua ta si uria luu lana toa na kera faabaita kera ana riki lana imole, ana ruruuna ka ai.

¹³ Uria na mada sa mili oewanea, do eri ifatha God; mado mili manata, do eri ifamulua.

¹⁴ Sulaania liothau la tha Christ ka suuwai kamilia; uria na manatamilia e unei, na tee nonii Wane e mae uria toa ni sui bana, mania toa eri sui bana kera mae bonaa;

¹⁵ Ma nia e mae uria toa eri sui bana, fasi toa na keki to e ai kesi to lau ifada i talaada, keki to ifana wane eri ne mae urida ma ka tatae lau.

¹⁶ Mania ita asi maṉa eri ka oli alaa misi thaitoomana ta wane sulia seena imole: mili thaitoomana tha Christ mena sulia seena imole, e ai misi thaitoomana lau una eri.

¹⁷ Mania mada sa ta wane ni atha Christ, nia do falu: si do u inao ki ka sui naa; rikia fasi, si do ki sui bana e falu naa.

¹⁸ Ma si do ki sui bana ita mai atha God, ne ilia na mili kwaimani lau bi nia sulia tha Jesus Christ, me falea si kulu eri iamilia miki ra ana kwaimani la eri;

¹⁹ Ma kwaimani la eri nania, tha God e to atha Christ ka ilia na toa na fanua nei iano kai kwaimani lau bi nia, ka ai si alaṉi kera ana abula garo la kera ki, me takofalea si baea sulia kwaimani la eri ani kamilia.

²⁰ Mania kamilia toa ni ṉaliṉata ifatha Christ, ’uria sa tha God e ṉata kwaitakoi ani kamilia: mika ṉata kwaitakoi, mika soree isamulua ifatha Christ, sa muki kwaimani lau bia tha God.

²¹ Uria na Wane eri ne ai si thaitoomana abula taa la, nia e ilia ka lioe abula taa la uri kulu; fasi ni kulu kuki lioe kokoto la tha God ani nia.