II. Korinitha 4 - Ṉa Alaofua Falu 1923 1949

¹ Mania uria na amilia ra eri, uria na mili fulatoona tatakomia, misi feda ania:

² Mili ekwa ania si do thaufuni ki ana seenonia, e ai misi abula ni lole la, misi dola bae lana tha God bia do eeta; ana fatai lana si do ne mamana mili ilia na liona toa eri sui boo kai ala fafi kamilia inaofatha God.

³ Ma mada sa kera thu fafia si faaroṉoa lea kamilia eri asi maku, kera thu fafia i ruruuna toa na kera ni sula tala ana maea:

⁴ Toa eki god kada nei e faarorodoa manatana toa ana fitala la, fasi ṉa lalaa la na si faaroṉoa lea sulia inotoa tha Christ, na nuna tha God, ka ai si laa ifada.

⁵ Uria na mili ṉata suli kamilia i talaamilia e ai, sulia tha Christ Jesus na nia Lord, ma ni kamilia wane ni ra kamulua ki inunufatha Jesus.

⁶ Uria na tha God neri, nia ne sorea, Lalaa la kai laa i la maerodo, ne laa i ruruumilia, fasi kai falea lalaa la na ṉa thaitoomana lana inotoa tha God ana maana tha Jesus Christ.

⁷ Ma ogogonia eri ni isakulua i la do na kera thauwai nia asi gano, fasi sukwaia eri ne babaita ka tatha kai ita mai atha God, ani kamilia i talaamilia ka ai;

⁸ Kera beresi kamilia ta kula si ei, ma maṉomilia si una; manatamilia ka rurua, me ai misi madoa;

⁹ Kera tari kamilia, ma kesi akwasi kamilia iada; kera u ani kamilia i theegano, ma kesi thauṉi kamilia;

¹⁰ Ifei na mili lae uria mili ṉalia ṉado ana seemilia ṉa maea tha Lord Jesus, fasia marukia tha Jesus lau boo keki fatai nia ana seemilia.

¹¹ Uria ni kamilia na mika maruki kera fale kamilia ṉado uria maea inunufatha Jesus, fasi marukia tha Jesus lau boo keki fatai nia ana seemilia na toto kai mae.

¹² Mania maea ka ra ani kamilia, ma marukia ani kamulua.

¹³ Ma uria na Spirit eri boo ana fitooa ka to ani kamilia, talafana si do na kera keda, Ku fitoo naa, mania nau ku ṉata; alafana lau boo ni kamilia mili fitoo, mania kamilia lau boo mika ṉata;

¹⁴ Uria na mili thaitoomana ni nia ne tataea tha Lord Jesus toto kai tatae kamilia lau boo bia tha Jesus, ma kai fatai kamilia bi kamulua.

¹⁵ Sulaania si do eki sui boo uri kamulua, fasi lea la eri, uria na kai oro ka tatha sulia toa oro eri, kai ilia na sore lea la kai oro ka tatha ifana motoa tha God.

¹⁶ Mania misi feda ania; ma wane na kera rikia ana seemilia toto kai taa mena, wane i ruruumilia keka faasukwaia kai falu sulia boṉi.

¹⁷ Uria na to lamilia ana taa la e thathala, do ana kasi maṉa seseka ni bana, kai ilia mai do ooro ka oro ma kulua ifamilia ana inotoa na kai to tatha;

¹⁸ Si maṉa na miki lio uria si do na kera rikidaki e ai, uria si do ne ai kesi rikidaki: sulaania si do na kera rikidaki kai tatha bana; ma si do ne ai kesi rikidaki kai to tatha.