II. Korinitha 3 - Ṉa Alaofua Falu 1923 1949

¹ Mili thafalia lau ṉata la suli kamilia i talaamilia? mado mika rofe amilia, ’uria tei wane, leta ki na keki keda kau isamulua suli kamilia, mado ni kamulua muki keda?

² Ni kamulua leta kamilia, na kera keda i ruruumilia, na toa na fanua kera thaitoomana ma kera teemai nia;

³ Na kera fatai kamulua mulu leta tha Christ, na mili ra ania, na kera keda ana kafo ni kekeda la e ai, ana Spirit ṉa God maruki; fafia do ni kekeda la na kere thauwanidaki ana fau e ai, fafia do ni kekeda la ki na ṉa ruruui imole.

⁴ Ma takofale la na mili takofalea tha God ania atha Christ neri:

⁵ Kamilia e ai misi talaana, tee kamilia, manatai lana ta si do i talaamilia; sukwaia kamilia ita mai atha God;

⁶ Ne faasukwai kamilia lau boo fasi mika toa ni ra ki ana alaofua falu; ana si do eri na kera keda e ai, atha Spirit: uria si do eri na kera keda kai thauwane, ma tha Spirit kai kwaifaamaruki.

⁷ Ma mada sa ra ana maea, na kera keda, ma kera inia i seena fau ki, e fula mai ana inotoa, adedea kwalafa tha Isirela kera dora ania lio tete la uria maana tha Mosesi sulaania inotoa maana; inotoa na kai tatha faisia:

⁸ Ra tha Spirit e ai si to ana inotoa baita ka tatha?

⁹ Uria na mada sa ra ana kwae la ka inoto, ra ana kokoto la ka inoto faamau ka tatha fafia.

¹⁰ Uria ne mamana na si do eri na kera faainotoa inao kesi faainotoa asi kula eri, sulia inotoa na si nia kai tatha ania.

¹¹ Uria na mada sa do eri na kai tatha inotoa ni ania, do na kai to ṉado bana inotoa ka faamau ka tatha ni ania.

¹² Mania sulaania amilia do faamau eri na miki manatatoo ṉado uria, mika seeraa ana ṉata la,

¹³ E ai misi ’uria tha Mosesi, ne alua si maku faisia maana, fasi kwalafa tha Isirela kesi lio tete ana susui lana si do eri na kai tatha:

¹⁴ Ma manatade sadi: uria ka fula afa boṉi eri mena, ana teemai lana alaofua nai nao u, si maku eri boo kai to bana na kesi tafoa; do na kera lafu teefau ania atha Christ.

¹⁵ Ma ka fula afa boṉi eri, ana atona bana ta si maṉa na keka teemai nia tha Mosesi, si maku eri kai to bana fafia ruruuna toa eri.

¹⁶ Ma atona bana ta si maṉa na toto kai akele uria ṉa Lord, keki lafua si maku eri.

¹⁷ Ma tha Lord na ṉa Spirit eri: ma asi kula na Spirit tha Lord kai to iei, keki tonee to.

¹⁸ Ma ni kulu sui, ana maakulua ne ai ta maku si thu fafia, uria na kulu rikia ’uria i la ironunu inotoa tha Lord, kera tala ani kulu kuka lioe nuna ana inotoa na kai baita alaa, uria si do na kai ita ana Spirit tha Lord.