II. Korinitha 2 - Ṉa Alaofua Falu 1923 1949

¹ Ma ni nau ku alua manataku ana tee si lio, ku sorea kwasi oli lau kau isamulua ana liodila.

² Uria na mada sa kwa faaliodila kamulua, ni tei lau na kai faaseethathala nau, sa talitoona bana wane na nau ku faaliodila?

³ Ma nau ku keda na ba si do eri boo isamulua, ada, si maṉa nau kwai fula, lioku kai dila uria toa eri ne kokoto kwai seethathala urida; uria nau ku fitoomulua asi kula eri, na seethathala la nau na seethathala la kamulua sui.

⁴ Sulaania ana to la ana taa la baita ma asi do ne fi faamau i la ruruuku ku keda kau isamulua ana kafona maaku ne oro; fasi kwai faaliodila kamulua e ai, fasi muka thaitoomana liothau la eri ne oro ka tatha i ruruuku uri kamulua.

⁵ Ma mada sa ta wane e faaliodila, ni nau e ai ne faaliodila nau, ni kamulua sui (fasi e ai kwasi sorea si do ne kulua faamau) lionulua ka suka dila.

⁶ Do faamau ni bonaa ana wane eri na kwae la ba toa oro eki kera kwae nia ania:

⁷ Adedea lea na muki manata lube nia ma muki faainamarukia, ada mado e ai wane eri keka thuthumai nia ana liodila nia ne baita ka tatha.

⁸ Mania nau ku ṉata kwaitakoi, kwai soree isamulua muki faaṉadoa liothau la kamulua uri nia.

⁹ Sulaania uria si kula eri lau boo nau ku kekeda na ba, fasi kwai ilitoomulua, kwai thaitoomana sa mado e ai muka ade sulia ṉata laku asi do ki sui bana.

¹⁰ Ni tei na muki manata lube nia, ni nau lau boo: uria na si do na nau ku manata lubea naa, uri kamulua na nau ku ilia inaofatha Christ;

¹¹ Fasi kusi lukatania si maṉa na tha Satan si nia kai tatha iakulua; uria na kusi dora ania manata taa la nia ki.

¹² Ma si maṉa ba na nau ku fula i Toroasi uria si faaroṉoa lea tha Christ, ma kera ifinia maa ifaku ana ṉa Lord,

¹³ E ai kwasi seceno i ruruuku, uria na kwasi fulatoona dooraku tha Taetasi: ku alulu bia toa eri, kwa lae faisia kula eri uri Masedonia.

¹⁴ Ma keki sore lea ifatha God, na kai talai kamilia ṉado ana laea baita uria faainoto lana tha Christ, ma kai fatai nia ani kamilia do eri ne makwa lea, na ṉa thaitoomana la suli nia, ta kula si ei.

¹⁵ Sulaania ni kamilia do ne makwa lea atha Christ ifatha God, ana toa na keki to sula tale ana marukia, ma ana toa na keki to sula tale ana maea;

¹⁶ Ifana toa fu, do ne makwa ana maea ma ka faamaeda; ifana toa lo, do ne makwa ana marukia ma ka faamaruki kera. Ma ni tei na kai talaana si do eki?

¹⁷ Uria ni kamilia e ai misi ’uria toa oro, na kera dola bae lana tha God bia do eeta: ma ’uria asi lio ne ai si lole, ma ’uria toa ita mai atha God, inaofatha God, mika ṉata atha Christ.