II. Korinitha 13 - Ṉa Alaofua Falu 1923 1949

¹ Ula si maṉa nau kwai fula isamulua neri. Ana ṉata lata ro nonii wane mado ulu imole na keka faamamanea si do na kera thaitoomana, keki faamamanea si baea eki sui.

² Nau ku sosorea na ba si maṉa na kwasi fula u, ma ku sorea si maṉa eri na kwasi fula u, talafana si maṉa ba na ruana ku toto isamulua, alafana si maṉa eri na ku to mai i thara faisi kamulua, ku soree isana toa eki na kera abubula taa ka fula asi maṉa eri, ma isani kamulua sui, mada sa ku fula lau, sa kwa suusia taa la faisi kamulua e ai;

³ Uria na mulu rofe uria ta si do na kai faamamanea tha Christ na nia ṉata ani nau; nia e ai si feda uri kamulua, e sukwai bana ani kamulua:

⁴ Sulaania kera fota fafi nia ana ’ai rarafolo sulia feda la, una ena mena, ka maruki ana sukwaia tha God. Uria ni kamilia lau boo mili feda ani nia, ma miki maruki bi nia ana sukwaia tha God uri kamulua.

⁵ Ilitoomulua i talaamulua, sa mado e ai mulu to bamulua asi do eki na mili fitoona; ni kamulua muka lio sulia to lamulua. Mado musi thaitoomana suli kamulua i talaamulua na tha Jesus Christ e to ani kamulua? mada sa ni kamulua e ai na toa na kesi ala fafi kamulua.

⁶ Ma nau ku manatatoo ṉado na muki thaitoomana suli kamilia sa ka ai ana ala la fafi kamilia e ai.

⁷ Ma nau ku foa atha God fasi e ai musi abula taa; fasi kai to fatai na kera ala fafi kamilia e ai, fasi ni kamulua muki ilia si do ne lea, boro sa mika ’uria mena toa na kesi ala fafida.

⁸ Sulaania misi sukwai ana suusi lana mamana la eri, ana adomi lana bana.

⁹ Uria na mika seethathala, si maṉa ni kamilia mili feda, ma ni kamulua muka sukwai: mili foa lau boo uria si do eri boo, na keki oolo kamulua.

¹⁰ Uria si kula eri ku keda kau si do eki si maṉa na ku to mai i thara faisi kamulua, fasi lalae ku fula isamulua, e ai kwasi faamanatai kamulua, sulia gwauwai la eri na ṉa Lord e falea mai ifaku uria faasukwai lamulua la ma uria oge lamulua e ai.

¹¹ Si do iisi, doora kera, muki seethathala. Keki oolo kamulua; keki faainamaruki kamulua; muki to ana tee si lio; muki to ana enenoa; ma ṉa God ana liothau la ma enenoa kai to bi kamulua.

¹² Muki ṉata isamulua kwailiu ’uria sa ni nau ku ṉata ana nonoi la abu.

¹³ Toa abu eri sui boo kera thathamia kwai ṉata isamulua ’uria sa ni kera kera ṉata.

¹⁴ Lea la tha Lord Jesus Christ, ma liothau la tha God, ma kwaimani lea la atha Spirit Abu, kai to bi kamulua sui boo. Emeni.