II. Korinitha 12 - Ṉa Alaofua Falu 1923 1949

¹ Kwai faabaita nau e ai si ei boo, boro sa do eri e ai si kwaiadomi mena; kwai fula ana si na kera fatai lalaa ania ma si ne toto thaufuni na ṉa Lord e fatai nia.

² Nau ku thaitoomana tee wane atha Christ, fai tafulu fa ṉali e sui naa (mada sa nia to i seena imole, kwasi thaitoomana; mado i thara faisia seena imole, kwasi thaitoomana; tha God e thaitoomana), wane eri kere tataea ka fula ana ula thalo.

³ Ma nau ku thaitoomana wane eri (made sa nia to i seena imole, mado i thara faisia seena imole, kwasi thaitoomana; tha God e thaitoomana),

⁴ Na kera tataea uri fanua lea tha God, me roṉoa si baea na kesi farana sore lana, na kera lufia imole si sorea.

⁵ Sulia wane eri kwai faabaita nau: ma suli nau i talaaku kwasi faabaita nau, talitoona bana ana feda la nau.

⁶ Uria na mada sa kwa thathamii faabaita nau, sa kwa oewanea e ai; sulaania nau kwai ṉata mamana: sui kwasi ilia, ada ta wane manatana ka fare baita iaku ka tatha asi do nia kai rikia, mado kai roṉoa ani nau.

⁷ Mania, fasi e ai kwasi faabaita nau si tatha sulia si do eki ne baita ka tatha na kera fatai nia isaku, kera falea do totoe la ifaku na kai toea seeku, do na tha Satan e arasia mai fasi kai kumu nau ania, fasi e ai kwasi faabaita nau si tatha.

⁸ Sulia si do eri ku ṉata kwaitakoi ku soree isana ṉa Lord ulu si maṉa, sa ka ai naa faisi nau.

⁹ Ma nia e soree isaku, Lea la nau e faramu: uria na sukwaia nau kai ra faamau i maalutana feda la. Mania kwai seethathala faamau lau maṉa kwai faabaita nau fafia feda la nau, fasi sukwaia tha Christ kai to fafi nau.

¹⁰ Mania nau ku seethathala uria feda la, uria fare faekwa la ki, uria rofe la ki, uria tona ilamatai la ki, uria fualaṉa ki, inunufatha Christ: sulaania si maṉa nau ku feda, si maṉa ku sukwai neri.

¹¹ Nau ku oewanea naa ana faabaita laku i talaaku: kamulua mulu suuwai nau ania; uria do kokoto sa ni kamulua muki ṉata suli nau: sulaania nau kwasi aru buri ana toa na kera inoto ka tatha i maalutana aposela ki, boro so ni nau tonee do ni mena.

¹² Bala si do ki ne farana aposela ku ilia mamana boo i maalutamulua asi lio ni susuu ṉado la, ana bala si do ki ma do ni kwele la ania ma ra baita ki.

¹³ Sulaania ta neri na mulu aru buri ania ana figua eki sui bana, sa ana tee si do eri e ai na ni nau e ai kwasi kulua fafi kamulua? muki manata lube nau ana abula laku ne ai si kokoto neri.

¹⁴ Rikia fasi, ula si maṉa neri na nau ku fifarao fasi kwai lae kau isamulua; ma nau sa kwa kulua fafi kamulua e ai: sulaania do kamulua ki e ai na nau ku rofe uria, ni kamulua boo: sulaania do kokoto e ai na baree wela keki ofua si do ki ifana maka kera ma thainada, ni keroa keki ofua ifana baree wela.

¹⁵ Ma nau kwai seethathala faamau si maṉa na nau kwai falea si do nau ki ma kwai falea sukwaia nau kai daṉa naa faisi nau uri kamulua: boro sa si maṉa na liothau la nau kai baita alaa mena, liothau la kamulua uri nau kai oli tuli.

¹⁶ Ma una ena mena, ni nau i talaaku kwasi kulua fafi kamulua; sui mulu sorea nau wane ku lole, ku ṉali kamulua ana lole la nau.

¹⁷ Ku abula dodora iamulua ana abana atona bana ta wane ana toa eki na nau ku arasida kau isamulua?

¹⁸ Ku ṉata kwaitakoi isatha Taetasi, ma ku arasia kau doorakulua eri bi nia. Tha Taetasi e abula dodora iamulua ana ta si do? mesi abula sulia tee Spirit eri boo? abula lamarea e ai si totoo?

¹⁹ E to i manatamulua ka tau na mai soso miki ṉata una eri isamulua uria bana fasi miki suusi kamilia. Inaofatha God mili ṉata atha Christ. Ma si do eki sui boo, liliothaua nau ki, uria faasukwai lamulua la.

²⁰ Uria nau ku mau, ada mado e ai, lalae ku fula, kwai fulatoomulua fafia abula lamulua na nau kwasi thathamia, ma ni kamulua muki fulatooku fafia abula laku na ni kamulua musi thathamia; ada firu la kai fula mai, uga la, rakeiria, tafulu si lio, ṉata buri la ki, ṉata faekwa la ki, nau‐ni‐baita la ki, ṉalu la ki;

²¹ Ada, maṉa kwai fula lau isamulua, God nau kai alu faekwa iaku inaofamulua, ma lioku kai dila uria toa oro ana toa eki na kera abubula taa ka fula asi maṉa eri, ma kesi akeletania manatada faisia do taa ma oe la ma daidei la na kera ililidaki.