II. Korinitha 11 - Ṉa Alaofua Falu 1923 1949

¹ Nau ku thathamia faamau muki doanita iaku ana oewanea la faekwa: iu muki doanita boo ania.

² Sulaania nau ku aarimadoa suli kamulua ana aarimadoa la tha God: uria nau ku faatoowane kamulua ana tee nonii wane boo, fasi kwai fale kamulua ’uria thari laulau ifatha Christ.

³ Ma nau ku mau, ada mado e ai, ’uria lau boo wa aala eri e lolea ni Eve ana lole la nia, keki faataalia manatamulua faisia si lio ne mamana uria tha Christ.

⁴ Uria mada sa ta wane e lae mai ka ṉata sulia ta Jesus ne eeta, na kamilia misi ṉata sulia, mado muka ṉalia spirit eeta, ne ai musi ṉalia, mado si faaroṉoa lea ne eeta, na musi alala fafia, muki ade lea si maṉa na muki doanita ania.

⁵ Uria na manataku na nau e ai dodoloa kwai aru buri ana toa inoto ka tatha i maalutana aposela ki.

⁶ Ma ṉata laku kai ’uria wane ne ai si totoo mena uria ṉata la, una ena mena, si do ku thaitoomana kwasi thaitoomana mala wane unei; iu, asi do ki sui bana mili fatai nia si do eri i maalutana toa na fanua uri kamulua.

⁷ Mado ku abula taa asi kula eri na nau ku abula seseka fasi keki faabaita kamulua, uria na musi usi nau si maṉa ba nau ku ṉata sulia si faaroṉoa lea tha God isamulua?

⁸ Ku bilia tei si do ana tei figua, uria na nau ku ṉalia foli laku faisi kera fasi kwa ra ifamulua na ba;

⁹ Ma si maṉa ba na ku toto isamulua ma ku toto ana rofe la, nau kwasi kulua fafia ta wane; sulaania baree wai doorana eri, si maṉa na kera toto i Masedonia kera fula na ba, kera falea si do eki na nau ku rofea; ma asi do ki sui bana ku bebeta suli nau fasi e ai kwasi kulua fafi kamulua, ma si do kwai ilia ṉado neri.

¹⁰ ’Uria lau boo mamana la tha Christ ka to ani nau, e ai ta wane si suusi nau faisia si do eri na nau ku faabaita nau ania i la fanua i Akaia.

¹¹ Uria ta? uria nau kwasi liothau ani kamulua? Tha God e thaitoomana ku liothau boo ani kamulua.

¹² Ma si do ku ilia, kwai ilia bakua, fasi e ai kwasi lukatania si maṉa ana toa eki na keki thathamia; fasi asi do eri boo na kera faabaita kera ania, keki riki kera kera ’uri kamilia.

¹³ Uria toa una eki kera aposela na kesi mamana ki, toa ni ra ki na kera lole, kera adea na riki lada e ’uria aposela tha Christ ki.

¹⁴ Ma do ni kwele la ania e ai neri; uria na tha Satan mena e ilia na riki lana e ’uria angel ana lalaa la.

¹⁵ Mania do baita e ai mada sa toa ni ra nia ki lau boo kera ilia na riki lada ka ’uria toa ni ra ana kokoto la ki; ma susui lada kai duua ra kera ki.

¹⁶ Nau kwai sorea lau, Ta wane si manataia na nau ku oewanea; ma mada sa manatamulua ka una eri, una ena mena, muki thathagoni nau mai mala wane oewanea, fasi nau lau boo kwa faabaita nau faekwa.

¹⁷ Si do nau kwai sorea, kwai sorea ana ṉa Lord e ai, ma ’uria ana oewanea la, ana seeraraa la ana faabaita laku la i talaaku.

¹⁸ Uria na toa oro kera faabaita kera ana seena imole, nau kwai faabaita nau lau boo.

¹⁹ Sulaania mulu seethathala maṉa na mulu doanita ana toa oewanea, kamulua na liomulua e too ki.

²⁰ Uria na mulu doanita ata wane, mada sa nia suuwai kamulua muka tona ra, mada sa nia lagua si do kamulua ki, mada sa nia abula dodora iamulua, mada sa nia tala faabaita nia i talaana, mada sa nia kwae faisia maamulua.

²¹ Nau ku ṉata ’uria sa kwa fare faekwa iaku, ’uria sa mili feda. Una ena mena, asi do ki sui bana na ta wane ka seeraa uria (ku ṉata ni oewanea la), nau ku seeraa lau boo.

²² Kera Hibaru ki? ni nau lau boo. Kera kwalafa tha Isirela? ni nau lau boo. Kera kwalafa tha Aberahamo? ni nau lau boo.

²³ Kera toa ni ra tha Christ ki? (ku ṉata mala wane oewanea) ni nau ku tatha ani kera ania; si ra ku ulafu ania e oro ka tatha, ana aliliboa la oro ka tatha, i la lokafu oro ka tatha ki, ana mae la ki asi maṉa oro.

²⁴ Ju ki kera kwae nau lima si maṉa ana fai tafulu fa kwae la, tee do boo ne ai.

²⁵ Ulu si maṉa kera kwae nau asi tataṉe ’ai, tee si maṉa kera ufauku, ulu si maṉa faka ki e dekwe iaku, sulia tee fa rodo ma tee fa thato ku to i la matakwa;

²⁶ Ana laea oro ki, ku toto karaṉia maea ana kafo ki, ku toto karaṉia maea ana toa na kera laulau, ku toto karaṉia maea ana kulee toa nau, ku toto karaṉia maea ana Jenetaele ki, ku toto karaṉia maea i la toaa susu, ku toto karaṉia maea i la fanua kwasi, ku toto karaṉia maea i la amali, ku toto karaṉia maea i maalutana baree wai doorana na kesi mamana ki;

²⁷ Ana ra nau ku ulafu ania ma ana ra ne kulua, ana tharai la afa rodo oro ki, ana thaofa ma ana liolalaṉa, asi maṉa oro na kwasi faṉa, ana seeku ne gwagwari ma karaṉia kwai talu.

²⁸ Ma bia do eki na ni thara, si do ne kulua fafi nau sulia boṉi, na oga la ana figua eki sui boo.

²⁹ Ni tei na ka feda, ma ni nau kwasi feda? ni tei na kera faataofai nia, ma do eri si akofi nau ’uria era?

³⁰ Mada sa nau kwa faabaita nau e ai si ei boo, nau kwai faabaita nau asi do ki sulia feda laku.

³¹ Nia ne God na Lord kulu tha Jesus Christ ma Maka nia, nia na kera taṉoa toto si sui, nia thaitoomana nau e ai kwasi lole.

³² I Damasikasi wane inoto ne tatha inaoda ifana kiṉa Aretasi e suusia toaa susu i Damasikasi, fasi ka ṉali nau:

³³ Ma faisia maana olofolo kera sifolaṉai nau i la nanado faisia sulufau, ku thaka faisia abana.