II. Korinitha 10 - Ṉa Alaofua Falu 1923 1949

¹ Ma ni nau tha Polo ku ṉata kwaitakoi, ku soree isamulua sulaania abula marabibi la ma abula thathaore la tha Christ, ni nau wane na riki laku si inoto inaofamulua, ma si maṉa nau ku to mai i thara faisi kamulua kwai seeraa uri kamulua:

² Iu, nau ku ṉata kwaitakoi isamulua, fasi si maṉa na toto kwai to isamulua kwasi seeraa ana seeraa la eri na nau ku sorea kwai seeraa ania uria tei toa, na kera manata suli kamilia ’uria sa mili abula sulia seena imole.

³ Sulaania mili abula mena i seena imole, misi firu sulia seena imole

⁴ (Uria na rauma ana firua na mili firu ania do ana seena imole e ai, do sukwai ki inaofatha God uria oge lana sasa ki);

⁵ Mika naṉa ania manata baita la ki, ma si do baita ki sui bana na kera faabaita fasi kai suusia thaitoomana lana tha God, ma mika talaia mai si manata la ki sui bana mika suuwanida keki ade sulia tha Christ;

⁶ Ma mika fifarao fasi miki duua ade la eki sui boo faisia, buriana na toto mulu ade naa sulia.

⁷ Muki lio sulia si do na maamulua kai rikia? Mada sa ta wane e tala fitoona i talaana na nia do tha Christ, kai onotoona lau i ruruuna, na, talafana nia do tha Christ, alafana lau boo ni kamilia.

⁸ Uria na kwa faabaita nau ka tatha mena uria inotoa kamilia eri (do na tha God e falea uria faasukwai lamulua la, ma uria oge lamulua e ai), kesi faaseenoni nau ania:

⁹ Fasi e ai si ’uria sa nau ku thathamii faamau kamulua ana leta nau ki.

¹⁰ Uria na keka sorea, Leta nia ki do kulua ma sukwai; ma seena do kera rikia ka feda, ma ṉata lana tonee do.

¹¹ Wane ne una eri kai manatatoona si do eri, na, talafana bae lamilia ana leta ki si maṉa na mili to mai i thara faisi kamulua, alafana lau boo abula lamilia si maṉa na miki to isamulua.

¹² Uria ni kamilia e ai misi seeraraa fasi miki alu kamilia mado miki toolaṉai kamilia bia tei toa na kera ṉata suli kera i talaada: ma ni kera, uria na kera olotoo kera ani kera, ma kera toolaṉai kera bi kera i talaada, kesi manata lea.

¹³ Ma ni kamilia sa mika faabaita kamilia ka tatha asi do ne kokoto e ai, ana baita lana olotoo eri boo na tha God e ukalia ifamilia miki faabaita kamilia ania, do ne tekwa ka fula mena ani kamulua.

¹⁴ Uria ne ai misi tekwasi kamilia si tatha, ’uria sa misi tekwa si fula isamulua: sulaania mili lae mili fula mena isamulua fafia si faaroṉoa lea tha Christ:

¹⁵ Misi faabaita kamilia si tatha asi do ne kokoto, mado ka fula asi ra na tei wane ki lau bana kera ululafu ania; si do mili manatatoo ṉado uria neri, na si maṉa na fitooa kamulua kai baita alaa, keki faabaita kamilia ani kamulua sulia olotoo kamilia eri boo, miki lae tatha,

¹⁶ Fasi miki ṉata sulia si faaroṉoa lea i la fanua ne ni da ka tatha mena ani kamulua, misi faabaita kamilia ana olotoo na kera ukalia ata wane lau uria si do na kera ilidaki naa ne thathai maakwali kamilia.

¹⁷ Ma wane na kai faabaita nia, kai faabaita nia atha Lord.

¹⁸ Uria na sa keka ala fafia wane na kai tala ṉata suli nia i talaana e ai, wane na ṉa Lord kai ṉata sulia.