II. Jone 1 - Ṉa Alaofua Falu 1923 1949

¹ Wane ulunao isana gwaulii ei na tha God e filia, ma isana baree wela nia ki, na nau ku liothau mamana boo ani kera; ma talifili nau e ai, toa eki sui boo na kera thaitoomana mamana la eri;

² Uria mamana la eri ne to ani kulu, ma kai to bi kulu toto si sui:

³ Lea la, tatakomia, enenoa kai to bi kamulua, ita atha God na Maka, ma atha Lord Jesus Christ, Kaluwane ṉa Maka, ana mamana la ma liothau la.

⁴ Ku seethathala faamau na nau ku fulatoona tei wela ana baree wela oe ki kera abula ana mamana la, uria lau boo ṉa Maka e soree isakulua.

⁵ Ma si maṉa eri ku ṉata kwaitakoi, ku soree isamu, gwaulii ei, ’uria sa ku keda kau si ṉata fifi falu isamu e ai, si do ne to isakulua ita ana thafali la mai, na kuki liothau kwailiu ani kulu.

⁶ Ma liothaua eri nai nia, na kuki abula sulia si ṉata fifi nia ki. Si ṉata fifi eri nai nia, talafana mulu roṉoa ita i thafali la mai, na muki abula sulia.

⁷ Sulaania toa oro na keki malaoea imole kera lae mai uri la fanua nei iano, toa na kesi faamamanea na tha Jesus Christ e fula i seena imole. Wane ba kai malaoea imole neri ma maalimae ba tha Christ.

⁸ Beta suli kamulua, fasi si do na kulu ra naa anidaki e ai si aana faisi kulu, ma fasi kuki ṉalia foli lakulua na kai talaana.

⁹ Ni tei bana na ka lae tatha me ai si to ana kwaifamanatai la tha Christ, tha God ka ai faisi nia: wane na ka to ana kwaifamanatai la tha Christ, ana ṉa Maka bia ṉa Kaluwane lau boo.

¹⁰ Mada sa ta wane kai fula isamu, ma ka ai si ṉalia mai kwaifamanatai la eri, osi thathagoni nia mai i maafera oe, ma osi ṉata ana lea la uri nia:

¹¹ Sulaania imole na ka ṉata ana lea la uri nia ka adomi nia ana ra taa nia ki.

¹² Uria na do oro ana keda lana isamu ni isaku, ku lalakwa keda ana ree do bia kafo ni kekeda la: ku manatatoo ṉado na nau kwai fula isamu, kwai lio i maamu, kwai ṉata, fasi seethathala la koro kai too bonaa.

¹³ Baree wela dooramu, kini na tha God e fili nia, kera thathamia kwai ṉata isamu ’uria sa ni kera keki ṉata. Emeni.