GENESIS 50 - Ṉa Alaofua Falu 1923 1949

¹ Ma tha Josefa ka asi nia iano fafia maana maka nia, ka aṉi ifafona, ka nonoia.

² Ma tha Josefa ka ṉata fifi isana wane ni ra nia ki, na ṉa doketa, sa keki gwaia seena maka nia asi meresina ada kai dura; ma doketa eki keka gwaia seena tha Isirela asi meresina.

³ Ma fai tafulu fa boṉi e mamana naa ifana; sulaaṉia asi ade la una eri keka teemai nia fa boṉi ki ifana toa eki na kera gwaia seeda asi meresina ada keka dura: ma toa i Ijifi keka aṉisia sulia fiu tafulu fa boṉi.

⁴ Ma toto fa boṉi eki ana tatao la e sui, tha Josefa ka bii ṉata isana toa na i maafera tha Fero, ka una eri, So ni nau ku fulatoona naa kwaiofei la i maamulua, ku thathamia na muka ṉata i aliṉana tha Fero, muka una eri,

⁵ Maka nau e faaothi nau na ba, ka una eri, Lio fasi, ni nau kwai mae naa: i la kwaiṉeia nau, na nau ku ’ilia naa maasi nau i la fanua i Kenana, oki alu nau iei. Mania, nau ku thathamia oki alamatai nau kwa tae kau, kwa alua maka nau; sui kwai oli lau mai.

⁶ Ma tha Fero ka sorea, Tae kamua, alua fasi maka oe, sulia si ade la ne faaothi oe ania na ba.

⁷ Ma tha Josefa e tae kau fasi kai alua maka nia: ma toa ni ra tha Fero ki sui bana keka tae kau bi nia, ulunao ki sui boo neri i maafera nia, ma ulunao eki sui bana i la fanua i Ijifi,

⁸ Ma toa eki sui bana ana maafera tha Josefa, ma doorana kera, ma toa ana maafera maka nia: talitoona bana kaala wela kera ki, ma feree sifi kera ki, ma aini buloka kera ki, keka akwasia keka to bada i la fanua i Goseni.

⁹ Ma sariota ki, ma wane ki na keka ono bada i suila hosi ki, keka tae lau bokau bi nia: laea babaita ka baita neri.

¹⁰ Ma lalae kera fula naa isana si kula dedema tha Atada ni ṉede lana koni, na ni bali labaa i Jodana, keka bii tatao iei ana aṉi la ne baita faamau: ma nia ka adea na keka tatao, keka aṉisia maka nia sulia fiu fa boṉi.

¹¹ Ma lalae Kenanaete ki, na toa ana fanua eri, kera rikia naa tatao la eri asi kula dedema tha Atada, keka una eri, Tatao la ni liodila la baita neri ifana toa i Ijifi: mania keka alaṉia thatana si kula eri ana Efolo‐misiremu; kula eri ni bali labaa i Jodana.

¹² Ma kaluwane nia ki keka ilia boo ifana sulia bae lana ne ṉata fifi ania isada na ba:

¹³ Uria na kaluwane nia ki keka fanasi nia uri la fanua i Kenana, keka alu nia i la maufi la bali gano i Makabila, maufi eri na tha Aberahamo e usia bia bali gano eri, faisia Hitaete eri na tha Ifirono, do nia ni bonaa, na si kula nia ni aluwanea, otofana i Mamari.

¹⁴ Ma iburiana ne alua naa maka nia, tha Josefa ka oli lau uri Ijifi, ni nia neri, bia doorana kera, ma toa eki sui bana na kera tae kau bi nia uria alu lana maka nia.

¹⁵ Ma thoona tha Josefa ki, toto kera rikia naa na kera inamae ana maka kera, keka bii una eri, Mado e a’i tha Josefa kai riki kulu ka taa, ma kai duua mamana boo abula lakulua ni sui bana ne taa uri nia na ba.

¹⁶ Ma keka arasia wane ni ṉali‐ṉataa isatha Josefa, keka una eri, Maka oe e ṉata fifi si maṉa ne a’i si mae u, ka sorea,

¹⁷ Muki ṉata una eri isatha Josefa, Nau ku thathamia oko manata lubea thoomu kera ana abula lada ne garo, ma abula taa la kera; uria na kera faare taa iamu na ba: ma si maṉa eri mili thathamia oki manata lubea toa ni ra ṉa God maka oe, ana abula lada ne garo. Ma si maṉa na kera ṉata una eri satha Josefa, nia ka aṉi.

¹⁸ Ma thoona kera keka lae lau bada, keka asi kera iano inaofana maana; ma keka sorea, Rikia fasi, ni kamilia na wane ni ra oe ki.

¹⁹ Ma tha Josefa ka soree isada, Musi mamau: ni nau i fuila tha God e a’i bana neri, mado?

²⁰ Ni kamulua na mulu onotoona si do taa uri nau na ba; tha God ana e onotoona si do lea asi ade la eri, ka ilia si do ne mamana naa itaraena neri, ka adea na toa oro keki to bada ana marukia.

²¹ Mania, si maṉa eri, musi mau: nau kwai thare kamulua, ma kaala wela kamulua ki. Ma nia ka faainamaruki kera, ka ṉata lea uria ruruuda.

²² Ma tha Josefa ka to bana i Ijifi, ni nia, ma toa ana maafera maka nia: ma tha Josefa ka to bana sulia tee taleṉee fa ṉali ma tafulu fa ṉali.

²³ Ma tha Josefa e rikia kwalafana tha Ifiremu ka fula ana ula unii wane: ma wela tha Make ki na kaluwane tha Manasa, keka nanaida fafia ururuna tha Josefa.

²⁴ Ma tha Josefa ka soree isana doorana kera, Ni nau kwai mae: ma tha God kai thai mamana boo suli kamulua, kai talai kamulua kau faisia fanua nei uria fanua eri ne othi sulia na ba isatha Aberahamo, ma tha Aesiki, ma tha Jekofo.

²⁵ Ma tha Josefa e faaothia kwalafaa tha Isirela, ka una eri, Tha God kai thai mamana boo suli kamulua, ma muki tae fafia ogiku faisia fanua nei.

²⁶ Mania tha Josefa e mae, buriana ne to bana sulia tee taleṉee fa ṉali ma tafulu fa ṉali: ma keka gwaia seena asi meresina ada ka dura, sui keka alua i lala ta bokisi i Ijifi ne farana wane mae.