GENESIS 49 - Ṉa Alaofua Falu 1923 1949

¹ Ma tha Jekofo ka ailia mai kaluwane nia ki, ka una eri, Muka ofu mai, fasi kwa faaroṉo kamulua asi do eki na toto muki fulatoona afa boṉi na ni u ki mai.

² Muka ofu mai, kaluwane tha Jekofo ki, muka roṉoi fasi; fafuroṉoa fasi maka kamulua na tha Isirela.

³ Rubeni ae, kaluwane ulunao nau na ni oe, na rigita la nau, ma thafali lana sukwaia nau, faabaita lana mamanaa, ma faabaita lana inotoa.

⁴ Talafana kafo na kai isuisu si ṉado, sii oe sa kai tatha e a’i; uria no tae na ba isana thamataia maka oe: sui o faasuaa: e tae isana do ni teo nau ba.

⁵ Tha Simiona ma tha Lifae na ṉa ro wai doorana; nini ni firu keroa ki na rauma ana kwaisuuwai la.

⁶ Maṉoku i talaaku ae, osi lae uria si kula na keko furia ṉataa iei; inotoa nau ae, osi ado bidaroa i la figua keroa eri; uria na asi maṉa ana rakeiria keroa kero thauwane, ma ana nau‐ni‐baita ladaroa kero thau‐labatania buloka ki.

⁷ Taa la kai to fafia rakeiria keroa, uria ne mamaeliaa, ma fafia rakeaṉoṉoa keroa, uria ne thau fifi ana imole: ni nau kwai ukali keroa imaalutana kwalafaa tha Jekofo ki, kwai ’u tataka ani keroa i Isirela.

⁸ Juda ae, ni oe neri na dooramu kera keki taṉo oe: abamu kai to fafia luana maalimae oe ki; kwalafana maka oe keki gwau toli inaofamu.

⁹ Kalee laeona na tha Juda: o tae kau, kaluwane nau, faisia seena do no laua: e agwaoro, ka aṉo talafana laeona, ma talafana laeona kini; ni tei ne seeraraa uria faatae lana?

¹⁰ Si ’ei ana inotoa nia kei e’i si sui faisia tha Juda, mado kubau nanaona wane faisia imaalutana ro ’ae nia ki; kai to bana maasia si maṉa na tha Saelo toto kai fula mai; ma kulee toa eki sui bana keki roo sulia bae lana.

¹¹ Kai kani fafia kali hosi nia isana faene, ma kalee ase nia isana faene ne filia ne lea ka tatha; e taua tooni nia ki la waene, ma si maku nia ki ana ’abuna foee faene ki:

¹² Maana kai memenaa asi waene eri, ma lifona kai kwakwaoa asi susu.

¹³ Tha Sebiulono kai to bana isana fokali sula amali; fokali ifana faka ki nania; ma oli lana fanua nia kai fula i Saedono.

¹⁴ Ase sukwai na tha Isaka, na ka agwaoro imaalutana thakali sifi ki:

¹⁵ Ma nia ka rikia si kula ana mamaloa ne lea, ma fanua eri na si kula ana thathami lana; sui ka agwaoro fasi kai ṉalido i gwauna abana, ma nia ṉa wane ni ra na kai falea takisi ki.

¹⁶ Tha Dana ṉa wane ni kotu ifana toa nia ki, tee kulee toa neri ana kulee toa tha Isirela ki.

¹⁷ Tha Dana na ṉa baekwa i ninimana tala, waa aala i ninimana tala na kai alea bora aaena hosi, adedea wane na i suila kai aru falaburi.

¹⁸ Jihova ae, nau ku maasia marukia eri noki faamaruki nau mania.

¹⁹ Tha Gad, omea baita sii kera kai tatha ani nia: ma sui ni nia sii nia kai tatha iburi bonaa.

²⁰ Faisia fanua tha Asa faṉa nia na si do gwagwarurutaa, ma si do lea nia ki ni ani lana kai farana kiṉa.

²¹ Tha Nafatalae na ṉa dia kini na kera lubea ka lae: nia kai falea kau si baea lea ki.

²² Tha Josefa na ṉa tharee ’ai ne fuṉu ka ololo, tharee ’ai eri e fuṉu ka ololo ka ni karaṉia malaui kafo; ma kali tharee do nia ki ka tae, ka tatha uri bali labaa ana sulufau:

²³ Wane eki ni basi lana do ki kera adea liona ka dila faamau, keka basi nia, keka riki nia ka taa:

²⁴ Ma sui basi nia ka to bana ana sukwaia, ma ro aba nia ki kera faasukwaia ana ro aba God Rigita tha Jekofo, (wane eri ni fono toi la kalia sifi ki, na gwa fau tha Isirela, ka ita mai ani nia:)

²⁵ Ana God maka oe neri, na kai adomi oe; ana God ne Sukwai ka Tatha, na kai alua lea la fafi oe asi do lea ita ki mai thalo lo, ma si do lea ki na i matakwa ne teo ifara, si do lea na i uumana kini ki, ma rakeda:

²⁶ Lea la eki na maka oe e falea neri ka baita ka tatha faamau ana lea la na maka nau na inao ki kera falea naa, ka lae tathaa, ka tae uria susui lana gwa tolo lo ki na kai toto si sui: lea la eki kai to fafia gwauna tha Josefa, ma ifafona gwauna wane eri ne toto eeta faisia doorana kera.

²⁷ Tha Benijamini kai isialoṉa ’uria koito kwasi: i la si uusuwadia nia kai dudumeme ana seena do ne laua, ma afa rodo nia kai toliṉia si do ne lagudaki.

²⁸ Akwala ma ro kulee toa Isirela ki sui bana neri: ma si ṉataa eri na maka kera e ṉata sulia isada, me alua lea la fafida, wane boo lea la nia italaana, ta wane boo lea la nia italaana, nia ka alua lea la eri fafida.

²⁹ Ma nia ka ṉata fifi isada, ka soree isada, E a’i si e’i nau kwai tatha bokau, kwai to ofu bia toa nau ki: muki alu nau bia maka nau eki la maufi ba na i la bali gano Hitaete eri na tha Ifirono,

³⁰ I la maufi ba na i bali gano eri i Makabila, na ni otofana Mamari, i la fanua i Kenana, si kula na tha Aberahamo e usia na ba bia bali gano Hitaete eri na tha Ifirono, do nia ni bana, na si kula nia ni aluwanea.

³¹ Asi kula eri kera alua tha Aberahamo ma kwaina na ni Sera; asi kula eri kera alua tha Aesiki ma kwaina na ni Ribeka; ma asi kula eri nau ku alua ni Lia:

³² Kera usia bali gano eri, ma maufi eri na ni iei, faisia kwalafana tha Hete ki.

³³ Ma lalae e suia naa si ṉataa fifi nia eki isana kaluwane nia ki, tha Jekofo ka bii tafoa aaena uri la thamataia eri, ka luka ana maṉona; sui ka tatha, ka to ofu bia toa nia ki.