GENESIS 48 - Ṉa Alaofua Falu 1923 1949

¹ Ma lalae mai, buriana si ade la eki, keka faaroṉoa tha Ma tha Isirela ka soree isatha Josefa, Manataku e soso se a’i kwasi rikia lau maamu: ma, lio fasi, tha God e fatai nia kwalafamu lau boo isaku.

² Ma kera faaroṉoa tha Jekofo, keka una eri, Rikia fasi, kaluwane oe ba na tha Josefa kai lae na mai isamu: ma tha Isirela ka faasukwai nia italaana, ka ono bana ifafona thamataia eri.

³ Ma tha Jekofo ka soree isatha Josefa, Tha God ne Sukwai ka Tatha e fula fatai mai isaku i Lasa i la fanua i Kenana, ka alua lea la fafi nau na ba,

⁴ Ka soree isaku, Rikia fasi, ni nau kwai adea kwalafamu keki oro alaa, kwai adea na kulee toa oro ki keki ita mai ani oe; ma nau kwai falea fanua nei ifana kwalafamu iburiamu, ṉa fanua kera u boo toto si sui.

⁵ Ma si maṉa eri ro kaluwane oe ba ki, tha Ifiremu ma tha Manasa, na kera tharedaroa ifamu i la fanua i Ijifi asi maṉa kwasi lae u mai isamu uri fanua eri i Ijifi, ro kaluwane nau ki u boo na ni keroa; talafana tha Rubeni ma tha Simiona, alafana ni keroa ṉa ro kaluwane nau ki.

⁶ Ma kaluwane oe ki na toto keki thareda ifamu iburiadaroa, kaluwane oe ki na ni kera, ma keki alaṉida ana thatana ro thoo kera ki la fanua na toto kekoi fulatoona.

⁷ Ma ni nau, si maṉa ba ku lalae na kau faisia i Bedana, ni Resela e mae isaku i la fanua i Kenana sula tale, si maṉa na kasi tala ni u bana fasi kwa bii fula isana Efirata: ma ni nau ku alu nia iei sula tala uri Efirata; uri Bethelihemo neri.

⁸ Ma tha Isirela e rikia ro kaluwane tha Josefa ki, ka una eri, Ro wane nei ki, tei keroa?

⁹ Ma tha Josefa ka soree isana maka nia, Ro kaluwane nau ki na ni keroa, na tha God e falea iaku i fanua nei. Ma nia ka sorea, Nau ku thathamia oki talai keroa mai isaku, ma ni nau kwai alua lea la fafidaroa.

¹⁰ Ma maana tha Isirela e rodo uria ne arai naa, e a’i si rikia fanua. Ma nia ka talai keroa mai isana; ma nia ka nonoida, ka kalilua bi keroa.

¹¹ Josefa, Rikia fasi, maka oe ka matai naa: ma nia ka talaia ro kaluwane nia ki, na tha Manasa ma tha Ifiremu bi nia.

¹² Ma tha Josefa ka talaidaroa mai faisia imaalutana ro ururu tha Jekofo ki, me gwau toli, maana ka lio uri theegano.

¹³ Ma tha Josefa ka talaia ro wane eki, tha Ifiremu ana aba aola nia otofana aba mauli tha Isirela, ma tha Manasa ana aba mauli nia, otofana aba aola tha Isirela, sui ka talai keroa kekoi idu karaṉi nia.

¹⁴ Ma tha Isirela ka tekwasia aba aola nia, ka alua fafia gwauna tha Ifiremu, susu buri neri, ka alua aba mauli nia fafia gwauna tha Manasa, ka falea kau ro aba nia ki uria si kula ne thaitoomana e oolo ki; uria na ulunao eri na tha Manasa.

¹⁵ Ma nia ka alua lea la fafia tha Josefa, ka una eri, Tha God, ni nia na ro maka nau inao ki, na tha Aberahamo ma tha Aesiki, kero lae inaofana, tha God ne thare nau sulia boṉi afa ṉali eki ana to laku i fanua na i iano ka fula itaraena,

¹⁶ Angel eri ne tae faisi nau faisia si ade la eki sui bana ne taa, kai alua lea la fafia ro wela wane nei ki; ma keki alua fasi thataku, ma thatana ro maka nau eki na tha Aberahamo ma tha Aesiki fafidaroa; ma malului wane oro ki keki thafali mai ani keroa imaalutana fanua na i iano.

¹⁷ Ma si maṉa na tha Josefa ka rikia na maka nia e alua aba aola nia fafi gwauna tha Ifiremu, si ade la eri ka taa iana: ma nia ka tafoa abana maka nia, so kai idua kau faisia gwauna tha Ifiremu uria gwauna tha Manasa.

¹⁸ Ma tha Josefa ka soree isana maka nia, Osi ade una eri, maka nau ae: uria na ulunao nai nia; alua fasi aba aola oe fafia gwauna wane nei.

¹⁹ Ma maka nia ka tofe, ka una eri, Si ade la eri ku thaitoomana bakua, kaluwane nau ae, ku thaitoomana bakua: ta kulee toa kai ita lau bomai ani nia ma ni nia kai inoto lau boo: ma sui e mamana thasina toto kai inoto ka tatha faamau ani nia, ma kwalafaa nia na kulee toa ki na keki oro alaa.

²⁰ Ma nia ka alua lea la fafi keroa afa boṉi eri, ka una eri, Ana thatamu toa i Isirela toto keki alua lea la fafia imole, keki una eri, Tha God kai alu oe oki ’uria tha Ifiremu ma oki ’uria tha Manasa: ma nia ka alua tha Ifiremu ka tatha inaona tha Manasa.

²¹ Ma tha Isirela ka soree isatha Josefa, Rikia fasi, ni nau kwai mae boo: ma sui tha God ana kai to bi kamulua, kai oli fafi kamulua uria fanua maka kamulua inao ki.

²² Sui ku falea lau boo ta bali fanua iamu na kai talua fanua thatana dooramu kera; si kula eri ku laua naa faisia abana Amoraete ki ana nini ni firu nau ma basi nau.