GENESIS 47 - Ṉa Alaofua Falu 1923 1949

¹ Sui tha Josefa ka lae, ka faaroṉoa tha Fero, ka una eri, Maka nau, ma dooraku kera, ma feree sifi kera ki, ma katele kera ki, ma do kera ki sui bana, kera fula naa faisia fanua eri i Kenana; ma, rikia fasi, keka to bada i la fanua i Goseni.

² Ma nia ka talaia tei wane ana doorana kera, lima nonii wane neri, ka aluda keka to fatai inaofatha Fero.

³ Ma tha Fero ka una eri isana doorana eki, Ra ta ni kamulua muka ra ania? Ma keka soree isatha Fero, Wane ni ra oe nei ki na ṉa wane ana fono toi la kalia sifi ki, ni kamilia neri ma maka kamilia ki ni lau boo.

⁴ Keka sorea lau boo isatha Fero, Fasi miki to ni laea i la fanua nei, mili fula na mai; sulaania toa ni ra oe nei ki e a’i amilia ta si faṉa ifana aini sifi kamilia ki sa keka ania; uria na unii thaofaa ka kulua faamau i la fanua i Kenana: sulia si kula eri, mili thathamia oki alamatai nia toa ni ra oe nei ki mika to amilia i la fanua i Goseni.

⁵ Ma tha Fero ka ṉata isatha Josefa, ka una eri, Maka oe bia dooramu kera kera fula mai isamu:

⁶ Fanua i Ijifi ka ni inaofamu, nania; asi kula ne lea ka tatha i la fanua nei, oki alua fasi maka oe ma dooramu kera keki to ada iei; keki to ada i la fanua i Goseni: ma mado so thaitoomana tei wane iada na keka seemabe, oko bii alua wane eki keki nanao ana aini katele nau ki.

⁷ Ma tha Josefa ka talaia mai maka nia na tha Jekofo, ka alu nia kai takwe inaofatha Fero: ma tha Jekofo ka alua lea la fafia tha Fero.

⁸ Ma tha Fero ka soree isatha Jekofo, Fita fa boṉi e sui naa afa boṉi eki ana fa ṉali oe ki ana to lamu i fanua na i iano?

⁹ Ma tha Jekofo ka soree isatha Fero, Fa boṉi eki ana fa ṉali nau ki ku to ni laea ania, tee taleṉee fa ṉali ma ulu tafulu fa ṉali: fa boṉi eki ana fa ṉali nau ki ana to laku i fanua na i iano e ununa ma ka taa, e a’i si oro ’uria fa boṉi eki ana fa ṉali ki ana to lana maka nau ki afa boṉi kera ki na kera toto ni laea ania.

¹⁰ Ma tha Jekofo ka alua lea la fafia tha Fero, sui ka lae nana ithara faisia inaofatha Fero.

¹¹ Ma tha Josefa ka alua maka nia ma doorana kera keki to ada, ka falea si kula thatada i la fanua i Ijifi, ana bali fanua eri ne lea ka tatha, na fanua i Ramasesi neri, sulia si do na tha Fero e ṉata sulia na ba.

¹² Ma tha Josefa e tharea maka nia, ma doorana kera, ma toa eki sui bana na i maafera maka nia, asi faṉa, sulia aebara kera ki.

¹³ Me a’i ta si faṉa si to bana i la fanua eri sui bana; uria na unii thaofaa eri e kulua faamau, adedea toa na fanua i Ijifi, ma toa na fanua i Kenana, kera feda naa sulia unii thaofaa eri.

¹⁴ Ma tha Josefa e gwea malefo eki sui bana na kera fulatoona i la fanua i Ijifi, ma i la fanua i Kenana, i maana koni na kera usia naa: ma tha Josefa e ofua malefo eki i maafera tha Fero.

¹⁵ Ma toto malefo eki e daṉa naa i la fanua i Ijifi, ma i la fanua i Kenana, toa eki sui bana i la fanua i Ijifi keka lae mai satha Josefa, keka una eri, Falea mai amilia ta si faṉa: uria na miki mae inaofamu uria ta? sulaania malefo eki e daṉa naa.

¹⁶ Ma tha Josefa ka una eri, Falea mai katele kamulua ki; ma nau kwai bii falea i maana katele kamulua eki, mada sa malefo eki e daṉa bonaa.

¹⁷ Ma keka talaia mai katele kera ki satha Josefa: ma tha Josefa ka bii falea ta si faṉa iada ne talaa hosi ki, ma feree sifi eki, ma katele eki, ma ase ki: ma nia ka thareda asi faṉa ne talaa aini katele kera ki afa ṉali eri.

¹⁸ Toto fa ṉali eri e sui, keka bii lae mai isana ana ruana fa ṉali, keka soree isana, Misi thaufunia si kula nei faisia wane inoto nei, malefo kamilia mili arua ka daṉa naa; wane inoto nei ana aini katele ma aini buloka kamilia ki lau boo; e a’i lau ta si do ni u bana inaofana maana wane inoto nei, talitoona bana seemilia, ma bali gano kamilia ki.

¹⁹ Miki mae inaofana maamu, ni kamilia ma bali gano kamilia ki, uria ta? oko usi fasi kamilia ma bali gano kamilia ki asi faṉa, ma ni kamilia bia bali gano kamilia eki ṉa do ni ra ki ifatha Fero: sui oki falea bomai foee do ni afusi lana ki, fasi miki maruki sulia, misi mae, ma fanua ka a’i si mutaia ania.

²⁰ Ma tha Josefa e usia mai fanua i Ijifi ni sui bana ifatha Fero; uria na toa eki i Ijifi kera usi, wane boo ana bali gano nia, ta wane boo ana bali gano nia, uria na unii thaofaa eri sii nia e tatha ani kera: mania, ita asi maṉa eri, fanua eri fanua tha Fero bonaa.

²¹ Ma sulia toa eki, nia ka idu kera kau uri la toaa susu ki, ka thafali mai ata bali oli lana Ijifi, lalae ka fula ana susui lana ta bali.

²² Talitoona bana bali gano aofia ni foa ki nia e a’i si usia mai; uria na ada moriṉa kera ita mai atha Fero, ma keka ania moriṉa kera na tha Fero e falea iada; sulia si kula eri, kesi usi ana bali gano kera ki.

²³ Sui tha Josefa e una eri sana toa eki, Rikia fasi, nau ku usi kamulua itaraena bia bali gano kamulua ki ifatha Fero: lio fasi, foee do ni afusi lana ki ifamulua nai nia, ma muki afusia i la theegano.

²⁴ Ma lalae mai tae ka oro naa, muki bii falea limana si do eki ifatha Fero, ma fai bali do ki kai to fani kamulua italaamulua, foee do muki afusidaki la ra neri, ma faṉa kamulua, ma si do ifana toa na i maafera kamulua ki, ma si faṉa ifana kaala wela kamulua ki.

²⁵ Ma keka sorea, O faamaruki kamilia naa: miki fulatoona kwaiofei la i maana wane inoto nei, ma ni kamilia na wane ni ra ki ifatha Fero.

²⁶ Ma tha Josefa e alua lo eri fafia fanua i Ijifi ka fula itaraena, limana si kula si kula tha Fero ki; talitoona bali gano aofia ni foa ki na ṉa do tha Fero e a’i.

²⁷ Ma kwalafaa tha Isirela keka to bada i la fanua i Ijifi, la bali fanua i Goseni; ma keka rikii do iei, keka tae, keka oro faamau ka lae alaa.

²⁸ Ma tha Jekofo e to bana i la fanua i Ijifi sulia tee tafulu fa ṉali ma fiu fa ṉali: mania fa boṉi tha Jekofo ki ana fa ṉali eki ana to lana i fanua nai iano, tee taleṉee fa ṉali, ma fai tafulu fa ṉali, ma fiu fa ṉali.

²⁹ Ma karaṉia kai fula asi maṉa ne a’i si e’i tha Isirela kai mae boo ania: ma nia ka ailia mai kaluwane nia na tha Josefa, ka soree isana, So ni nau ku fulatoona naa kwaiofei la i maamu, nau ku thathamia oki alua fasi abamu ifara thafaku, oki abula uri nau asi ade la ne lea ma ka mamana; ada oko alu nau i Ijifi; si do ku thathamia neri:

³⁰ Ma sui ni nau kwai teo ofu bia maka nau na inao ki; ma oki ṉali nau kau faisia i Ijifi, oki alu nau asi kula kera ni aluwanea. Ma nia ka sorea, Nau kwai ade boo sulia ṉata lamu.

³¹ Ma nia ka sorea, Othi fasi isaku: ma nia ka othi isana. Ma tha Isirela ka rau ana gwauna thamataia eri, ka agwaoro iano.