GENESIS 46 - Ṉa Alaofua Falu 1923 1949

¹ Ma tha Isirela ka lae nana bia si do ne rikidaki ka sui boo, lalae ka fula i Biasifa, ka falea do ni afufu ki ifana ṉa God maka nia na tha Aesiki.

² Ma tha God ka ṉata isatha Isirela ana sii na kera fatai lalaa ania i la rodo, ka una eri, Jekofo ae, Jekofo ae. Ma nia ka una eri, Ni nau neri.

³ Ma nia ka soreo, Ni nau tha God, ṉa God maka oe: osi mau ana sifo lamu kau uri Ijifi; sulaania i fanua eri nau kwai alu oe ṉa maka totonao ana kulee toa inoto faamau:

⁴ Ni nau kwai sifo kau bi oe uri Ijifi; sui kwai tae lau bomai fafi oe mamana boo: ma tha Josefa kai alua abana fafia maamu.

⁵ Ma tha Jekofo ka tae kau faisia Biasifa: ma kaluwane tha Isirela ki keka ṉalia maka kera na tha Jekofo, ma kaala wela kera ki, ma kwaida, i lala do eki hosi keki abaa, na tha Fero e arasia mai uria ṉali lana.

⁶ Ma keka ṉalia katele kera ki, ma ogogonia kera na kera todadaki la fanua i Kenana, lalae keka fula i Ijifi, tha Jekofo neri, ma kwalafana sui boo bi nia:

⁷ Kaluwane nia ki, ma kaluwane kaluwane nia ki bi nia, thari nia ki, ma thari kaluwane nia ki, ma kwalafana ni sui bana, e talaida kau ofu bi nia uri Ijifi.

⁸ Ma thatana kwalafana tha Isirela na kera fula i Ijifi nai nia, tha Jekofo bia kaluwane nia ki: Tha Rubeni, na kaluwane ulunao tha Jekofo.

⁹ Ma kaluwane tha Rubeni ki; tha Hanoko, ma tha Balu, ma tha Hesirono, ma tha Kamae.

¹⁰ Ma kaluwane tha Simiona ki; tha Jemuele, ma tha Jamini, ma tha Oata, ma tha Jakini, ma tha Soha, ma tha Saulu na kaluwane kini i Kenana.

¹¹ Ma kaluwane tha Lifae ki; tha Gasono, tha Kohatha, ma tha Mireri.

¹² Ma kaluwane tha Juda ki; tha A, ma tha Onana, ma tha Sila, ma tha Faresi, ma tha Sira: sui tha A ma tha Onana kero mae i la fanua i Kenana. Ma ro kaluwane tha Faresi na tha Hesirono ma tha Hamulu.

¹³ Ma kaluwane tha Isaka ki; tha Tola, ma tha Fufa, ma tha Joba, ma tha Simirono.

¹⁴ Ma kaluwane tha Sebiulono ki; tha Sirida, ma tha Ilono, ma tha Jalila.

¹⁵ Kwalafana ni Lia ki neri ne tharea ifatha Jekofo i Bedanerama, bia thari nia na ni Daena: kaluwane nia ki sui bana ma thari nia ki ulu akwala imole ma ulu imole.

¹⁶ Ma kaluwane tha Gada ki; tha Sifiono, ma tha Hagai, tha Suni, ma tha Esebono, tha Iri, ma tha Arodi, ma tha Areli.

¹⁷ Ma kaluwane tha Asa ki; tha Jimina, ma tha Isua, ma tha Isui, ma tha Beraea, ma waiwaena kera na ni Sera: ma kaluwane tha Beraea ki; tha Hiba, ma tha Makiele.

¹⁸ Kwalafana ni Silifa neri, kini eri na tha Lebana e falea ifana thari nia na ni Lia, ma nia ka tharea toa eki ifatha Jekofo, tee akwala ma ono imole.

¹⁹ Ro kaluwane kwaina tha Jekofo na ni Resela; tha Josefa ma tha Benijamini.

²⁰ Ma tha Josefa e kwalafia tha Manasa ma tha Ifiremu i la fanua i Ijifi, ro kaluwane nia ki neri na ni Asinatha thari tha Botifera aofia i Ono e tharea ifana.

²¹ Ma kaluwane tha Benijamini ki; tha Bila, ma tha Bisa, ma tha Asabelo, tha Gira, ma tha Nemana, tha Ihi, ma tha Roso, tha Mabimu, ma tha Habimu, ma tha Ata.

²² Kwalafana ni Resela ki neri ne tharea ifatha Jekofo: kera sui boo tee akwala ma fai nonii wane.

²³ Ma kaluwane tha Dana ki; tha Hasimu.

²⁴ Ma kaluwane tha Nafatalae ki; tha Jasila, ma tha Guni, ma tha Jisa, ma tha Silemu.

²⁵ Kwalafana ni Bila neri, kini eri na tha Lebana e falea ifana thari nia na ni Resela, ma nia ka tharea toa eki ifatha Jekofo: kera sui boo fiu nonii wane.

²⁶ Toa eki sui boo na keka luu mai uri Ijifi bia tha Jekofo, na kera ita mai seena, toa eki sui boo ono akwala ma ono imole, kwaina kaluwane tha Jekofo ki keka safuda;

²⁷ Ma kaluwane tha Josefa ki ne kwalafia i Ijifi, ro nonii wane: toa eki sui bana ana kwalafana tha Jekofo na keka luu mai uri Ijifi, fiu akwala neri.

²⁸ Ma nia ka arasia tha Juda kai tatha inaona isatha Josefa, fasi kai to’oa tala, maana kai lio uri Goseni; sui lalae keka fula i fanua eri i Goseni.

²⁹ Ma tha Josefa ka betaa sariota nia, ka tae kau uri Goseni, fasi kai toda ana maka nia; ka alu fatai ani nia isana; ma nia ka kalilua bia, ka aṉi fafia luana ka suka ni tau.

³⁰ Ma tha Isirela ka soree isatha Josefa, Si maṉa eri kwai seeeno maasia mae laku, uria na ni nau ku rikia naa maamu, ma uria noko to u bamua ana marukia.

³¹ Ma tha Josefa ka soree isana doorana kera, ma isana toa eki ana maafera maka nia, Ni nau kwai tae kau, kwai faaroṉoa tha Fero, kwai una eri isana, Dooraku kera, ma toa eki ana maafera maka nau, na kera toto i fanua eri i Kenana, kera fula naa isaku.

³² Ma wane eki na wane ana fono toi la kalia sifi ki, uria na si ra kera na thare lana katele ki; ma kera talaia mai feree sifi kera ki, ma aini katele kera ki, ma si do na kera rikidaki sui boo.

³³ Ma lalae mai, asi maṉa na tha Fero kai aili kamulua isana, ma kai sorea, Ra ta na ni kamulua muka ra ania?

³⁴ Ni kamulua muki una eri, Ra wane ni ra oe nei ki ṉa fono toi la kakalia katele ki, ita mai asi maṉa mili faekwa, ka fula asi maṉa eri; ni kamilia neri, ma maka kamilia ki lau boo: fasi muki to bamulua i la fanua eri i Goseni; uria na toa i Ijifi kera mamagu ana toa eki sui bana ana fono toi la kalia sifi.