GENESIS 45 - Ṉa Alaofua Falu 1923 1949

¹ Sui tha Josefa e dora ania rau la fafi nia italaana inaofana toa eki sui boo na keka takwe isana; ma nia ka ’ai baita, Asuwai nia wane ki sui bana keki lae kau faisi nau. Me a’i ta wane lau si takwe isana, si maṉa na tha Josefa ka faaroṉoa doorana kera, keka thaitoomana ni nia neri.

² Ma nia ka ’ai baita ana aṉi la: ma toa eki i Ijifi, ma toa na i maafera tha Fero, keka roṉoa.

³ Ma tha Josefa ka soree isana thoona kera, Ni nau tha Josefa; maka nau kai to u bana, mado? Ma thoona kera keka dora ania luu lana; uria na kera aanu inaofana.

⁴ Ma tha Josefa ka una eri sana thoona kera, Nau ku thathamia muka idu karaṉi nau. Ma keka idu karaṉia. Ma nia ka sorea, Ni nau thasimulua na tha Josefa, wane eri na mulu usi ani nau kwa lae uri Ijifi na ba.

⁵ Mania si maṉa eri, i la ruruumulua si tataa sulia, ma musi rakeiri uri kamulua italaamulua sulia si ade la na mulu ilia na ba, na mulu usi ani nau uria fanua nei: uria na tha God e arasi nau inaomulua ana faamaruki lana imole ki.

⁶ Uria na unii thaofaa nei e ni naa fafia fanua nei sulia ro fa ṉali: ma lima fa ṉali ki ni u mai na toto kesi ’ilia theegano ania, kesi kasia unii do rafo.

⁷ Ma tha God e arasi nau kwa lae inaomulua, kwa betaa ina lana toa na keki to bada ifamulua i fanua na i iano, kwa faamaruki kamulua ana faamaruki la ne baita.

⁸ Mania, ni kamulua e a’i na mulu arasi nau uri fanua nei, tha God ana: ma ni nia e alu nau ṉa maka ifatha Fero, ma wane ku inoto fafia maafera nia sui boo, ma wane nanao imaalutana fanua i Ijifi ni sui bana.

⁹ Lakwasia kau, muka tae kau isana maka nau, muka soree isana, Kaluwane oe ba na tha Josefa ka una eri, Tha God e alu nau ku nanao ana Ijifi ni sui bana: oko sifo si mai isaku; osi totoo lau:

¹⁰ Ma oki to amua i la fanua i Goseni, oki to karaṉi nau, ni oe, ma baree wela oe ki, ma kokoo oe na wela kera ki, ma feree sifi oe ki, ma aini katele oe ki, ma si do na o rikidaki ka sui bana:

¹¹ Ma ni nau kwai thare oe i fanua eri; sulaania lima fa ṉali ana unii thaofaa ni u; ada muka fulatoona rofe la, ni oe ma toa na i maafera oe, ma si do na o rikidaki ka sui bana.

¹² Ma, rikia fasi, maamulua e rikia naa, ma maana thasiku na tha Benijamini e rikia naa, ni nau neri na ku falea kau bae laku isamulua.

¹³ Ma muka faaroṉoa maka nau ana inotoa baita nau nei i Ijifi, ma asi do eki sui bana na mulu rikia; ma muka lae lakwalakwa, muki talaia mai maka nau uri kunei.

¹⁴ Ma nia ka kalilua bia thasina na tha Benijamini, ka aṉi; ma tha Benijamini ka aṉi sana luana

¹⁵ Ma nia ka nonoia lau boo thoona kera ni sui bana, ka aṉi fafida: ma buriana si ade la eri doorana kera keka ṉata bi nia.

¹⁶ Ma toa i maafera tha Fero kera roṉoa talo lana si ade la eri, be una eri, Baree wai doorana tha Josefa kera fula naa: ma tha Fero ma wane ni ra nia ki keka roṉoa ka lea faamau iada.

¹⁷ Ma tha Fero ka soree isatha Josefa, Oko una eri sana dooramu kera, Si ade la na muki ilia nania; muki alua i suila ase kamulua ki si do keki ṉalidaki, lae amulua, muki fula i fanua eri i Kenana;

¹⁸ Ma muki talaia mai maka kamulua ma toa na i maafera kamulua ki, muka lae mai isaku: ma nau kwai falea lea lana fanua i Ijifi iamulua, ma muki ania suula fanua nei.

¹⁹ O roṉoa naa si ṉataa fifi eri; si do muki ilia nania; muki filia tei do hosi keki abadaki faisia fanua i Ijifi ifana wela kamulua ki, ma kwaimulua ki, muka talaia fasi maka kamulua, muka lae mai.

²⁰ Musi mamanatatoona lau ogogonia kamulua; uria na si do kamulua na ṉa lea lana fanua i Ijifi ni sui bana.

²¹ Ma kwalafana tha Isirela keka ade una eri: ma tha Josefa ka ade sulia si ṉataa fifi tha Fero neri, ka falea do hosi keki abadaki iada, me falea ta si faṉa ne farana laea kera.

²² Me falea tei tooni iada na kai safua tooni kera ki, wane boo tooni nia, ta wane boo tooni nia; ma sui atha Benijamini e falea ulu taleṉee malefo asi silifa, ma lima tooni na kai safua tooni nia.

²³ Ma si do nia ka falea kau ifana maka nia, nania; tee tafulu ase ki na keka ṉalia si do lea i Ijifi ki, ma tee tafulu ase kini ki na keka ṉalia ta si koni ma ta si berede ma ta si faṉa maka nia kai ania sula tale.

²⁴ Mania e arasia kau doorana kera, ma keka lae nada: ma nia ka una eri isada, Ada muka rakeiri kwailiu uri kamulua sula tale.

²⁵ Ma sui kera tae kau faisia i Ijifi, lalae keka fula i fanua i Kenana isana maka kera na tha Jekofo.

²⁶ Ma keka faaroṉo nia, keka una eri, Tha Josefa kai maruki u bana, ma ni nia wane nanao ni tatha la inaona fanua i Ijifi ni sui bana. Ma tha Jekofo ka maketho i ruruuna, uria ne a’i si faamamanea ṉata lada.

²⁷ Ma keka faaroṉo nia ana bae lana tha Josefa sui boo, ne soree isada na ba: ma toto e rikia naa do eki hosi kera abaa mai fasi keki nali nia, spirit maka kera na tha Jekofo ka sukwai lau.

²⁸ Ma tha Isirela ka sorea, Do faamau naa; kaluwane nau ba na tha Josefa ka maruki u bana: ni nau kwai lae, kwai riki nia si maṉa na kwasi mae u.