GENESIS 44 - Ṉa Alaofua Falu 1923 1949

¹ Ma nia ka ṉata fifi isana wane eri ne inoto ana maafera nia, ka una eri, Faafuṉua wai wane eki, kai fuṉu sulia si do keka talaana ṉali lana, ma oko alua malefo kera, ta wane malefo nia, ma ta wane malefo nia, i maana wai kera ki.

² Ma do nau ba ne ’uria titiu na kera thauwai nia asi silifa, oko alua fasi i maana wai wane eri ne susu buri, bia malefo nia eki ana usi lana koni. Ma nia ka ade sulia si baea eki na tha Josefa e ṉata sulia.

³ Ma i la si uusuwadia u boo, keka asuwai nia kau wane eki bia ase kera ki.

⁴ Ma si maṉa na kera lae naa faisia toaa susu eri, ma keka lae na kau si tau u, tha Josefa ka soree isana wane eri ne inoto ana maafera nia, Tatae fasi, oko lae kau buriana wane eki; ma lalae o fulatooda sui, oko una eri isada, Uria ta na ni kamulua muka duua ade lea la asi abula la ne taa?

⁵ Ta na sa do ana kuu la wane inoto nau neri, na si do eri fetei na nia kai ilitoona si do ki ania, mado? asi ade la eri mulu abula taa boo.

⁶ Ma lalae e fulatooda sui, nia ka bii ṉata isada asi ṉata la eri boo.

⁷ Ma keka soree isana, Wane inoto nei ka sorea si baea eki uria ta? Si do ka a’i neri; toa ni ra oe nei ki sa keka ade una eri e a’i ka dodoloa.

⁸ Rikia fasi malefo ba ki na mili fulatoona i maana wai kamilia ki na ba, mili oli fafia isamu faisia i la fanua i Kenana: mania, nifana ade lana fasi mika bilia faisia maafera wane inoto oe ta si silifa mado ta si golu?

⁹ Atona bana ta wane ana wane ni ra oe nei ki na keki rofetoona isana, nia kai mae boo, ma ni kamilia na wane muka suuwai kamilia mika tona ra lau boo ifana wane inoto nei.

¹⁰ Ma nia ka una eri, Keki ade boo sulia bae lamulua neri: wane eri na keki rofetoona mai isana, keki suuwai nia kai tona ra ifaku; ni kamulua molo, kesi alaṉi kamulua ania.

¹¹ Sui ni kera sui bana, keka ra fofoa, keka sifolaṉai nia, wane boo wai nia, ta wane boo wai nia, uri theegano, keka lubea.

¹² Ma wane eri ka rofe, ka thafalia ana ulunao, rorofe ka fula ana susu buri: ma do eri ne ’uria titiu, keka rofetoona i la wai tha Benijamini.

¹³ Sui keka seṉaa tooni kera ki, keka alua si do kera ki, wane boo i suila ase nia, ta wane boo i suila ase nia keka oli lau uri la toaa susu eri.

¹⁴ Ma tha Juda ma doorana kera keka fula isana maafera tha Josefa; sulaania ka to u bana iei: ma keka asi kera iano uri theegano inaofana.

¹⁵ Ma tha Josefa ka soree isada, Si ade la ta neri na mulu ilia na ba? mulu dora ania si kula eri, na wane ne ’uri nau kai thaitoomana boo ilitoona lana si ade la ki?

¹⁶ Ma tha Juda ka una eri, Si ta na sa mika soree isana wane inoto nei? si ta na sa mika ṉata sulia? mado nifana ade lana fasi mika fatai nia abula lamilia ne dodoloa? Tha God e rofetoona abula lana toa ni ra oe nei ki asi do na kera lufia: rikia fasi, ni kamilia na wane ni ra ki ifana wane inoto nei, ni kamilia sui bana, ma wane eri na kera fulatoona titiu eri isana.

¹⁷ Ma nia ka una eri, Si do ka a’i neri. Nau sa kwa ade una eri e a’i: wane eri na kera fulatoona titiu eri i abana, ni nia ṉa wane ni ra nau bonaa; ni kamulua molo muka tae kau ana enenoa, muka lae isana maka kamulua.

¹⁸ Sui tha Juda ka idu karaṉi nia, ka una eri, Wane inoto ena ae, ku thathamia oki alamatai nia wane ni ra oe nei kai sorea ta si baea i aliṉana wane inoto nei; ma osi alamatai nia rakeiria oe si tae baita uria wane ni ra oe nei: uria na talafana tha Fero na ni oe.

¹⁹ Wane inoto nei e soetoona wane ni ra nia ki na ba, ka una eri, Amulua ta maka? amulua lau ta doora, mado?

²⁰ Ma ni kamilia mili una eri sana wane inoto nei, Amilia tee maka, na wane ne arai naa; ma ana tee wela ne kwalafia asi maṉa ne arai naa neri; wela eri e faekwa; ma thoona e mae naa, ma talifili nia ka ni u bana ana kaluwane thainana ki, ma maka nia ka liothau ani nia.

²¹ Mo sorea na ba isana wane ni ra oe nei ki, Muka talai nia kai sifo si mai isaku, fasi maaku kai lio tete uri nia.

²² Ma ni kamilia mili una eri isana wane inoto nei, Wela wane eri ka dora ana akwasi lana maka nia: uria na mada sa nia ka akwasia, maka nia eri kai mae.

²³ Mo sorea na ba isana wane ni ra oe nei ki, Thasimulua eri ne susu buri so ka a’i faisi kamulua, e a’i dodoloa muki lio lau i maaku.

²⁴ Ma lalae kau, mili tae kau isana wane ni ra oe eri na maka kamilia, mika faaroṉo nia ana ṉata lana wane inoto nei.

²⁵ Ma maka kamilia toto ka una eri, Muka oli si lau, muka usia mai ta si faṉa iakulua.

²⁶ Ma ni kamilia mika una eri, Mika dora ania sifo la kau: mada sa thasimilia ne susu buri kai lae bi kamilia, mika bii sifo kau: uria na thasimilia ne susu buri e a’i faisi kamilia, kera lufi kamilia misi lio i maana wane eri.

²⁷ Ma wane ni ra oe eri na maka kamilia ka soree isamilia, Do mulu thaitoomana, ai nau eri e tharea ro kaluwane ifaku:

²⁸ Ma ulunao e lae kau faisi nau, ma nau ku sorea na ba, E a’i si e’i kera seṉaa boo asi kadee do ki; ma ita asi maṉa ba nau kwasi riki nia lau:

²⁹ Ma so ni kamulua muka talaia kau wela nei lau boo faisi nau, ma taa la kai fulatoona, muki adea na ifuku ne kwao, nania, kai sifo isana kwaiṉeia ana liodila la.

³⁰ Mania si maṉa ni nau kwai fula lau kau isana wane ni ra oe eri na maka nau, ma wela wane nei ka a’i si to bana isamilia; uria na marukia nia kera kani ofu ania bia marukia wela wane nei;

³¹ Lalae kau, si maṉa ne rikia naa wela wane nei ka a’i si to bana, ni nia kai bii mae: ma wane ni ra oe nei ki miki adea na ifuna wane ni ra oe eri na maka kamilia, ne kwao, kai sifo isana kwaiṉeia ana liodila la.

³² Uria na wane ni ra oe nei e ade mala wane ni faaṉado lana wela wane nei isana maka nau, ku una eri, So e a’i kwasi talai nia lau mai isamu, maka nau kai alaṉi nau ania toto si sui.

³³ Sulia si kula eri nau ku thathamia oki alamatai nia wane ni ra oe nei kai talaa wela wane eri, kai tona ra i fuliṉana ifana wane inoto nei; oko alamatai nia wela wane nei kai tae kau bia thoona kera.

³⁴ Uria nifana ade lana fasi kwa tae kau isana maka nau, ma wela wane nei ka a’i si to bi nau? ada mado e a’i kwa rikia taa la eri na sa kai fulatoona maka nau.