GENESIS 43 - Ṉa Alaofua Falu 1923 1949

¹ Ma unii thaofaa ka bii kulua i la fanua eri.

² Ma toto kera ania si koni eri na kera ṉalia mai i Ijifi na ba, e daṉa naa, maka kera ka soree lau isada, Muka oli si lau, muka usia mai kasi faṉa iakulua.

³ Ma tha Juda ka ṉata isana, ka una eri, Wane eri e ṉata fifi faamau isamilia, ka una eri, Thasimulua eri mada sa e a’i si ni mai bi kamulua, e a’i dodoloa muki lio i maaku.

⁴ Mado so arasia thasimilia kai lae bi kamilia, miki bii sifo kau, mika usia mai ta si faṉa iamu:

⁵ Ma sui mado so lalakwee arasi nia, kamilia sa mika sifo kau e a’i; uria na wane eri e sorea naa isamilia, Thasimulua eri ka a’i faisi kamulua, e a’i dodoloa muki lio i maaku.

⁶ Ma tha Isirela ka sorea, Uria ta na muka abula taa uri nau asi kula eri, na mulu faaroṉoa wane eri, sorea sa ta wane lau ana dooramulua ni u bana?

⁷ Ma keka sorea, Wane eri e soefifirisia ani kamilia uria to lamilia, ma ina lamilia kera, ka una eri, Maka kamulua ka maruki u bana? amulua lau ta doora? ma ni kamilia mili faaroṉoa asi do eki ne soetoona ana ṉata lana: nifana ade lana sa miki thaitoomana boo sa nia kai sorea, Talaia fasi thasimulua kai sifo mai?

⁸ Ma tha Juda ka soree isana maka nia na tha Isirela, Arasia fasi wela wane nei, kai lae bi nau, ma ni kamilia miki tae kau, miki lae amilia; fasi kuki to bakulua ana marukia, kusi mae, ni kamilia, ma ni oe, ma wela kamilia ki lau boo.

⁹ Ni nau ṉa wane ni faaṉado lana; oki baelia ana abaku: so e a’i kwasi talai nia mai isamu, kwasi alua kai takwe inaofamu, keki alaṉi nau ania toto si sui:

¹⁰ Uria na mado se a’i misi totoo fasi, e mamana ruana mili oli na mai neri.

¹¹ Ma maka kera na tha Isirela ka soree isada, So e una eri asi maṉa eri, si ade la na muki ilia nania; ṉalia kau i la kwadee do kamulua ki tei do ana foee do lea ka tatha ki na i fanua nei; muka sifo fafia si do na muki tona falea ifana wane eri, ta kasi baoma, ta kasi dudueliṉa, tei do makwa lea ki, ta si mura, tei foee ’ai ki ne ṉilo, ma tei fa ṉali:

¹² Muka ṉalia fasi i abamulua malefo ne talaana ro si maṉa ana usi la; ma malefo eri na mulu oli fafia i maana wai kamulua ki na ba, ruana muka ṉalia lau i abamulua; mado e a’i si do na kera alu garo ania neri:

¹³ Talaia fasi thasimulua lau boo; tatae, muka lae isana wane eri:

¹⁴ Ma nau ku thathamia na tha God ne Sukwai ka Tatha kai adea na muki fulatoona tatakomi la inaofana wane eri, fasi kai arasia mai dooramulua ba ma tha Benijamini. Mada sa wela nau ki keka mae faisi nau, kwai inamae bonaa.

¹⁵ Ma wane eki keka ṉalia si do eki na keki tona falea, ma keka ṉalia i abada malefo ne talaana ro si maṉa ana usi la, ma keka talaia kau tha Benijamini; sui keka tae ada, keka sifo kau uri Ijifi, keka takwe naa inaofatha Josefa.

¹⁶ Ma lalae tha Josefa e rikia naa tha Benijamini na kai to bana isada, nia ka soree isana wane eri ne inoto ana maafera nia, Oko talaia wane nei ki uri maafera nau, oko thauṉia fasi do ni ani lana, oko betaa; sulaania wane nei ki keki rere ada ofu bi nau i initoona thato.

¹⁷ Ma wane eri e ade sulia bae lana tha Josefa; ma wane eri ka talaia wane eki uri la maafera tha Josefa.

¹⁸ Ma wane eki keka mau, uria na kera talaida uri maafera tha Josefa; ma keka ṉata kwailiu uri kera, keka una eri, Sulaania malefo eki na kera oli fafia na ba i la wai kulu ki asi maṉa totonao eri, kera talai kulu mai; fasi nia kai rofea si ade la sa kai alaṉi kulu ania, sa kai rau ani kulu, kai tolobare kulu ṉa wane kuki tona ra ifana, ma ase kulu ki lau boo.

¹⁹ Ma keka idu karaṉia wane eri ne inoto ana maafera tha Josefa, keka tamani bi nia isana maana maafera eri,

²⁰ Keka una eri, Arai ena ae, mili sifo mai inao mamana boo, fasi mika usi amilia ta si faṉa:

²¹ Ma lalae kau, mika fula naa isana maafera toa kwaitaa ki, mili lubea wai kamilia ki, ma, rikia fasi, malefo kamilia, ne kulua sulia kulua lana inao mai, ka to bana i maana wai kamilia ki, wane boo malefo nia i wai nia, ta wane boo malefo nia i wai nia: sui mili oli fafia, ka ni lau bana i abamilia.

²² Ma tei malefo lau mili sifo mai fafia, ka ni abamilia uria usi lana faṉa: mika dora ania ni tei neri ne alua malefo kamilia eki la wai kamilia ki.

²³ Ma ni nia ka sorea, Enenoa kai to ani kamulua; musi mau: God kamulua eri, na ṉa God maka kamulua, e falea mai ogogonia i la wai kamulua eki: ni nau ku rikia naa malefo kamulua ba. Ma nia ka talaia mai tha Simiona isada.

²⁴ Ma wane nei ka talaia mai wane eki uri la maafera tha Josefa, ka falea ta si kafo iada, ma keka taua aaeda; ma nia ka tharea ase kera ki asi faṉa ne farada.

²⁵ Ma keka betaa si do eki na keki tona falea, maakwalia tha Josefa na kai lae mai initoona thato: uria na kera faaroṉoda naa na keki ania ta si faṉa i kula eri.

²⁶ Ma toto tha Josefa e fula naa i maafera nia, keka bii ṉalia mai uri maafera eri si do eki na keki tona falea na ni abada, ma keka agwaoro uri theegano inaofana.

²⁷ Ma nia ka soetooda ana to lada, so e lea mado e a’i, ka sorea, Maka kamulua ba, na arai ba na mulu ṉata sulia na ba, kai to lea bana, mado? Kai maruki u bana, mado?

²⁸ Ma keka luua, Wane ni ra oe eri, na maka kamilia, kai to lea bana; nia kai maruki u bana. Ma keka gwau toli, keka faare baita ani nia.

²⁹ Ma nia ka tafoa maana, ka rikia thasina na tha Benijamini, na kaluwane thainana, ka una eri, Thasimulua ba na mulu ṉata sulia isaku nania, mado? Ma nia ka una eri, Kaluwane nau ae, tha God kai kwaiofei uri oe.

³⁰ Ma tha Josefa e lakwasia kau; uria na ruruune thathamia asia naa thasina: ma nia ka rofea si kula sa kai aṉi iei; sui ka kotho i la kadee biu nia, ka aṉi i kula eri.

³¹ Ma nia ka taua maana, ka lae mai, ka rau fafi nia italaana, ka una eri, Alua fasi tei si faṉa.

³² Ma kera alua fani nia, na kai to eeta tee nia, ma fani kera, na keka to eeta talifili kera, ma ifana toa eki i Ijifi na keka rere ada ofu bi nia, keka to eeta talifili kera: uria na kera lufia toa i Ijifi kesi faṉa ofu bia Hibaru ki; uria na si ade la toa i Ijifi keka mamagu ania neri.

³³ Ma keka ono bada inaofana, ulunao asi kula ne farana ulunao, ma susu buri asi kula ne farana susu buri: ma wane eki keka kwele uri kera kwailiu.

³⁴ Ma nia ka falea kau moriṉa kera ki faisia si faṉa ne ni inaofana: sui baita lana moriṉa tha Benijamini ka ’uria lima si moriṉa asi do kera ki. Ma keka kuu, keka seethathala ofu bi nia.