GENESIS 42 - Ṉa Alaofua Falu 1923 1949

¹ Ma si mana na tha Jekofo e thaitoomana na koni ka ni Ijifi, tha Jekofo ka soree isana kaluwane nia ki, Kamulua muki lio uri kamulua kwailiu uria ta?

² Ma nia ka una eri, Rikia fasi, nau ku roṉoa ta si koni kai to bana i Ijifi: muka sifo fasi uri fanua eri, muka usi mai ifakulua iei; fasi kuka maruki bakulua, ada kuka mae.

³ Ma akwalee thoona tha Josefa keka sifo kau fasi keki usia ada ta si koni i Ijifi.

⁴ Tha Benijamini molo, thasina tha Josefa, tha Jekofo e a’i si arasia bia thoona kera; uria ne sorea, Ada mado e a’i taa la ka fulatoona.

⁵ Ma kaluwane tha Isirela ki keka lae mai maalutana toa eki na keka lae mai fasi keki usia ada ta si koni: uria na unii thaofaa eri e ni naa i la fanua i Kenana.

⁶ Ma wane nanao i fanua eri na tha Josefa; ni nia ana na kai usi asi do eki isana toa na fanua eri sui bana: ma thoona tha Josefa ki keka lae mai, keka agwaoro inaofana, maada ka lio uri theegano.

⁷ Ma tha Josefa e rikia thoona kera, ka thaitoomada, ma sui ka abula mala wane eeta isada, ka ṉata susuala uri kera; ma nia ka soree isada, Fanua ifei na mulu to mai iei na muka lae mai? Ma keka sorea, Mili lae mai faisia fanua i Kenana uria usi lana amilia ta si faṉa.

⁸ Ma tha Josefa e thaitoomana bana thoona kera; ni kera molo keka dora bada iana.

⁹ Ma tha Josefa ka onotoona moosubole ba ne moosuboledaki suli kera, ka soree isada, Kamulua na wane ana urai la ki; si ade la mulu lae mai uria na ṉa bubuṉi lana fanua nei, ne a’i ta do lea si ni iei.

¹⁰ Ma keka soree isana, E a’i, wane inoto ae; talitoona bana fasi miki usia amilia ta si faṉa, wane ni ra oe ki mili fula mai neri.

¹¹ Kamilia sui boo baree wela tee nonii wane boo; wane mamana ki na ni kamilia, wane ni ra oe ki na ṉa toa ana urai la e a’i bana.

¹² Ma nia ka soree isada, E a’i; si do na mulu lae mai uria na ṉa bubuṉi lana fanua nei ne a’i ta do lea si ni iei.

¹³ Ma keka una eri, Wane ni ra oe nei ki na ṉa akwala ma ro wai doorana, ṉa kaluwane tee nonii wane boo i la fanua i Kenana; ma, rikia fasi, susu buri ka to bana bia maka kamilia itaraena, ma tee nonii wane iamilia e mae naa.

¹⁴ Ma tha Josefa ka soree isada, Sulia ṉata laku isamulua, be una eri, Kamulua ṉa wane ana urai la ki:

¹⁵ Keki ilitoomulua asi ade la nei: Ku othi ana marukia tha Fero, kamulua sa muka lae kau faisia fanua nei e a’i, si maṉa na thasimulua eri ne susu buri e a’i si fula totonao mai i fanua nei.

¹⁶ Arasia fasi ta wane iamulua, kai talaia mai thasimulua eri; ma ni kamulua keki kani fafi kamulua i la lokafu, fasi miki ilitoona bae lamulua, sa mado e a’i si lio mamana ni ruruumulua: so e a’i, ku othi ana marukia tha Fero, kamulua ṉa wane ana urai la ki mamana boo.

¹⁷ Ma nia ka aluda sui boo i la lokafu, keka to sulia ulu fa boṉi.

¹⁸ Ma ana ula fa boṉi eri tha Josefa ka soree isada, Si ade la na muki ilia na muki maruki sulia nania; uria ni nau ku faare baita atha God:

¹⁹ So ni kamulua wane mamana ki, keki kani fafia tee nonii wane ana dooramulua kera i maafera na kera kani fafi kamulua i lala; lae kamulua, muka ṉalia fasi ta si koni ifana toa na keka thaofa i maafera kamulua ki:

²⁰ Ma sui muki talaia mai thasimulua eri isaku ne susu buri; so e una eri, miki bii faamamanea bae lamulua, ma kamulua sa muka mae e a’i. Ma keka ade una eri.

²¹ Ma keka una eri isada kwailiu, Kulu abula taa mamana boo sulia thasikulua ba, uria na kulu rikia naa liodila la eri ne liodila ania na ba, si maṉa ne ṉata kwaitakoi uri kulu, ma kulu lalakwee roṉoa na ba; sulia si ade la eri na taa la nei e fulatookulua.

²² Ma tha Rubeni ka luuda, ka una eri, Nau ku ṉata isamulua, mado? ku una eri, Ada muka abula taa uria wela wane ba; ma ni kamulua mulu lalakwee roṉoa, mado? mania, rikia fasi, keka duua ’abuna.

²³ Ma ni kera kera dora ania tha Josefa, ne thaitoomana maalutana bae lada; uria ne ṉata bi kera ana wane ne toolaṉai nia ṉata lada isana.

²⁴ Ma nia ka abula faisida, ka aṉi; sui ka oli lau mai isada, ka ṉata bida, ka talaia tha Simiona faisi kera, ka kani fafi nia i maada.

²⁵ Sui tha Josefa e ṉata fifi isana toa nia ki sa keki alua ta si koni kai fuṉu i la wai kera ki, ma keki oli fafia malefo kera ki, si do ta wane i la wai nia, ma si do ta wane i la wai nia, ma keka falea ta si faṉa iada ifana laea kera: abula lana uri kera nai nia.

²⁶ Ma kera alua si koni eri i suila ase kera ki, keka lae nada faisia fanua eri.

²⁷ Ma lalae mai, si maṉa na ta wane iada e lubea wai nia fasi kai lafua ta si faṉa ifana ase nia i la biu toa kwaitaa ki, nia ka rikia malefo nia eri; sulaania, rikia fasi, e ni maana wai nia.

²⁸ Ma nia ka soree isana doorana kera, Kera oli fafia malefo nau ba; ma, lio fasi, kai to bana i la wai nau: ma i la ruruuda ka taa, ma keka mau, keka sorea uri kera kwailiu, Si ta neri na tha God e ilia iakulua?

²⁹ Ma lalae keka fula isana maka kera na tha Jekofo i la fanua i Kenana, keka faaroṉo nia asi ade la eki sui bana na kera fulatoona; keka una eri,

³⁰ Wane eri ne nanao ana fanua eri, ka ṉata susuala uri kamilia, manatana sa kamilia wane ni urai lana fanua eri.

³¹ Ma mili soree isana, Wane mamana ki na ni kamilia; ṉa toa ana urai la e a’i bana:

³² Kamilia akwala ma ro wai doorana, amilia tee maka boo; tee nonii wane iamilia e mae naa, ma susu buri kai to bana bia maka kamilia itaraena i la fanua i Kenana.

³³ Ma wane eri ne nanao ana fanua eri e soree isamilia, Asi ade la nei kwai thaitoomamulua ṉa wane mamana ki; akwasia mai ta wane ana dooramulua ki bi nau i kunei, muka ṉalia fasi ta si faṉa ifana toa na keka thaofa i maafera kamulua ki, muka lae amulua:

³⁴ Muka talaia mai thasimulua ne susu buri isaku: sui kwai bii thaitoomana ni kamulua na wane ana urai la e a’i, wane mamana ki boo: mania kwai bii falea dooramulua nei isamulua, ma muki ra ana todado la i la fanua nei.

³⁵ Ma lalae mai, keka kikia naa si do na i wai kera ki, rikia fasi, butee malefo wane eki, ta wane si e’i boo, ka ni la wai kera ki: ma si maṉa na wane eki ma maka kera kera rikia butee malefo eki, keka mau.

³⁶ Ma maka kera na tha Jekofo ka soree isada, Kamulua mulu faainamae nau neri: tha Josefa e a’i faisi nau, ma tha Simiona ka a’i faisi nau, ma mulu thathamia sa muki lafua tha Benijamini: si ade la eki sui bana ne maalimae iaku.

³⁷ Ma tha Rubeni ka ṉata isana maka nia, ka una eri, Lalae mada se a’i kwasi oli fafi nia isamu, oko thauṉia fasi ro kaluwane nau ki: oko takofale nia i abaku, ma ni nau kwai oli boo fafia isamu.

³⁸ Ma nia ka sorea, Kaluwane nau nei e a’i dodoloa ka sifo kau bi kamulua; uria na thoone mae naa, ma talifili nia na ka to: mada sa taa la ka fulatoona sula tale na muki lae ania, muki adea na ifuku, ne kwao naa, kai sifo uri la kwaiṉeia ana liodilaa.