GENESIS 41 - Ṉa Alaofua Falu 1923 1949

¹ Ma lalae mai, ro fa ṉali ki laulau e sui, tha Fero ka bii moosubole: ma, rikia fasi, nia ka takwe i ninimana kafo baita eri.

² Ma, rikia fasi, fiu buloka, riki lada ka lea ma seeda ka gwagwarurutaa, keka tae mai faisia kafo baita eri; ma keka faṉa ada asi kula asi loua katha.

³ Ma, rikia fasi, fiu buloka lau, riki lada ka taa ma seeda ka gagaroa, keka tae mai buriada faisia kafo baita eri; keka takwe isana buloka totonao eki i ninimana kafo.

⁴ Ma buloka eki riki lade taa ma seede gagaroa keka dudumeme ana fiu buloka eki riki lade lea ma seede gwagwarurutaa. Ma sui tha Fero ka tharai.

⁵ Sui nia ka biṉa lau, ma ruana ka moosubole lau: ma, rikia fasi, fiu fuṉii koni ka tae mai fafia tee fa ’ai koni, do kobu neri, ma ka lea.

⁶ Ma, rikia fasi, fiu fuṉii koni foana ka ununa bana, na thauthau ita asi kula ana tae lana thato e labatanida, ka tae mai iburi.

⁷ Ma fiu fuṉii koni eki na foana ka ununa ka dudumeme ana fiu fuṉii koni ne kobu ma ka lea. Ma tha Fero ka tharai, ma, rikia fasi, moosubole neri.

⁸ Ma lalae mai, i la si uusuwadia, ka taa i la ruruuna; ma nia ka kwaiarasi, ka ailia mai aofia ni foa la ki sui bana i Ijifi, ma wane liode too ki sui boo i fanua eri: ma tha Fero ka faaroṉoda ana moosubole nia eri; ma sui e a’i ta wane si to bana ne talaana toolaṉai lana isatha Fero.

⁹ Sui wane eri ne nanao ana toa ni beta lana waene ka ṉata mai satha Fero, ka una eri, Afa boṉi nei nau ku onotoona abula garo laku:

¹⁰ Tha Fero e rakeiri na ba uria ro wane ni ra nia ki, me alu nau i la lokafu i maafera wane eri ne tatha inaona omea ni fono toi la kali oe, kamarea wane eri ne nanao ana toa ni naare la:

¹¹ Ma ni kamarea mere moosubolea moosubole ana tee fa rodo eri boo; wane boo moosubole nia, wane moosubole nia italaana, sulia toolaṉai lana moosubole kamarea ki, ne eeta kwailiu.

¹² Ma tee wane bii baita, ṉa Hibaru, na wane ni ra ifana wane eri ne tatha inaona omea ni fono toi la kali oe, e to bana iei bi kamarea; ma kamarea mere faaroṉo nia ania, ma nia ka toolaṉai nia moosubole kamarea eki ifamarea; wane boo moosubole nia, ta wane boo moosubole nia, e toolaṉai nia sulia toolaṉai lana ne farana.

¹³ Ma lalae mai, toolaṉai lana isamarea ka mamana boo; e oli fafi nau asi ra ku toto ania, ma ruana wane e alua ka lio.

¹⁴ Sui tha Fero e kwaiarasi, ka ailia mai tha Josefa, ma kera talai fofoa ani nia faisia lokafu eri: ma nia ka sufia ifuna, ka talaa tooni nia, sui ka kotho kau isatha Fero.

¹⁵ Ma tha Fero ka soree isatha Josefa, Nau ku moosubolea moosubole, me a’i ta wane si to bana ne talaana toolaṉai lana: ma nau ku roṉo oe, kera sorea suli oe o talaana thaitoomana lana maalutana moosubole, fasi oki toolaṉai nia.

¹⁶ Ma tha Josefa e luua tha Fero, ka una eri, Si ade la eri e a’i si ni ani nau italaaku: tha God aṉa kai falea ifatha Fero si baea ni luu lana ana enenoa.

¹⁷ Ma tha Fero ka soree isatha Josefa, I la moosubole nau eri, rikia fasi, nau ku takwe bakua i ninimana kafo baita eri:

¹⁸ Ma, rikia fasi, fiu buloka, seede gwagwarurutaa ma riki lade lea, keka tae mai faisia kafo baita eri; ma keka faṉa ada asi kula asi loua katha:

¹⁹ Ma, rikia fasi, fiu buloka lau keka tae mai buriada, kera taa, riki lade taa asia naa, ma seeda ka gagaroa, ma ni nau e a’i kwasi ririkia i la fanua i Ijifi sui boo tei do na kera taa ka tatha ’uri kera:

²⁰ Ma buloka eki na kera gagaroa ma riki lada ka taa, keka dudumeme ana fiu buloka totonao eki na kera gwagwarurutaa:

²¹ Ma buriana na kera dudumeme teefau anida, imole keka dora ania maalutada, keka sorea se a’i kesi ania boo do eki; riki lada ka taa alafana to lada i thafali lana. Ma sui ni nau kwa tharai.

²² Ma nau ku lio i la moosubole nau, ma rikia fasi, fiu funii koni ka tae mai fafia tee fa ’ai koni, do kobu neri, ma ka lea:

²³ Ma, rikia fasi, fiu fuṉii koni ne dele, foana ka ununa bana, na thauthau ita asi kula ana tae lana thato e labatanida, ka tae mai iburi:

²⁴ Ma fuṉii koni eki na foane ununa keka dudumeme ana fiu fuṉii koni eki ne lea: ma nau ku faaroṉoa aofia ni foa la ki; ma sui e a’i ta wane si to ne talaana inifita lana ifaku.

²⁵ Ma tha Josefa ka soree isatha Fero, Moosubole tha Fero neri, tee do boo: tha God e fatai nia isatha Fero si do nia toto kai ilia.

²⁶ Fiu buloka lea eki na ṉa fiu fa ṉali; ma fiu fuṉii koni lea eki na ṉa fiu fa ṉali: moosubole eri tee do boo.

²⁷ Ma fiu buloka gagaroa eki, na riki lada ka taa, na kera tae mai buriada, na ṉa fiu fa ṉali; ma fiu fuṉii koni ne gwa’u, na thauthau ita asi kula ana tae lana thato e labatanida, na ṉa fiu fa ṉali ana unii thaofaa na toto kai fula mai.

²⁸ Si ade la ni nau ku ṉata sulia isatha Fero neri: si do na tha God toto kai ilia boo nia ka fatai nia isatha Fero.

²⁹ Rikia fasi, fiu fa ṉali ana unii abusua ki kai mamana mai la fanua i Ijifi ni sui bana:

³⁰ Ma fiu fa ṉali ana unii thaofaa ki kai tae mai iburi; ma keki liodora teefau ana unii abusua eki sui boo i la fanua i Ijifi; ma unii thaofaa eki kai akofi teefau ana fanua eri;

³¹ Ma keki dora ania unii abusua eki la fanua sulia unii thaofaa na kai fula mai iburi; uria na unii thaofaa eri kai kulua faamau.

³² Ma moosubole eri kera falea mai ro si maṉa ifatha Fero uria na si ade la eri tha God e gwalua naa, me a’i si tau bana, tha God kai adea kai mamana bomai.

³³ Sulia si kula eri, tha Fero kai filia fasi wane taiṉei na lione too, kai alua kai nanao fafia fanua nei i Ijifi.

³⁴ Tha Fero kai ade una eri, kai alua fasi wane nanao ki fafia fanua nei, kai gwea limana balii faṉa i la fanua i Ijifi sulia fiu fa ṉali eki ana unii abusua.

³⁵ Keki ofua fasi faṉa eri sui bana ana fa ṉali lea eki na ni u mai, keki teiṉania ta si koni ifara abana tha Fero, ma keki betaa si faṉa i la toaa susu ki.

³⁶ Ma faṉa eri keki alua ifana fanua nei, kai to bana maakwalia fiu fa ṉali eki ana unii thaofaa na toto kai mamana mai la fanua i Ijifi; ada fanua nei keka faafunuia sulia unii thaofaa eri.

³⁷ Ma si ade la eri tha Fero e rikia ka lea, ma wane ni ra nia ki sui bana keka rikia ka lea lau boo.

³⁸ Ma tha Fero ka soree isana wane ni ra nia ki, Kuki talaana fulatoona lana lau ta wane na kai ’uria wane nei, wane na Spirit tha God ni ani nia, mado?

³⁹ Ma tha Fero ka soree isatha Josefa, Sulaania tha God e fatai nia si ade la nei ki sui bana isamu, e a’i lau ta wane si taiṉei ma liona si too si ’uri oe:

⁴⁰ Ni oe oki nanao ana maafera nau, ma toa nau ki sui boo keki roo sulia bae lamu: talifili nau, na ku ono ana do ni ono la kiṉa, kwai inoto ka tatha iamu.

⁴¹ Ma tha Fero ka soree isatha Josefa, Rikia fasi, ku alu oe ana tatha la inaona fanua i Ijifi ni sui bana.

⁴² Ma tha Fero ka tanusia kome nia faisia abana, ka alua i abana tha Josefa, ka lauṉia ana tooni ki asi maku kwakwaoa ne lea, ka alua nailii golu kakalia luana;

⁴³ Ka alu nia kai ono i la ruana do nia hosi kai abaa; ma keka ’ai kau inaofana, Muka bouruuru fasi iano: me alu nia kai tatha inaona fanua i Ijifi ni sui bana.

⁴⁴ Ma tha Fero ka soree isatha Josefa, Ni nau tha Fero, ma ni oe e a’i faisi nia, e a’i ta wane si tafoa abana mado ’aena i la fanua i Ijifi ni sui bana.

⁴⁵ Ma tha Fero ka alaṉia thatana tha Josefa atha Safanathabania; ma nia ka falea ni Asinatha ifana, na thari tha Botifera aofia i Ona, kai tolea. Ma tha Josefa ka liufia fanua eri i Ijifi.

⁴⁶ Ma ulu tafulu fa ṉali e sui atha Josefa si maṉa ba ne takwe inaofatha Fero ṉa kiṉa i Ijifi. Ma tha Josefa e lae kau faisia inaofatha Fero, ka tathafia fanua i Ijifi ni sui bana.

⁴⁷ Ma sulia fiu fa ṉali eki ana abusua, theegano kai faataea si do na kai faafuṉua abee imole ne gwea.

⁴⁸ Ma nia ka gwea faṉa ni sui bana ana fiu fa ṉali eki na i fanua i Ijifi, ka ofua faṉa eri la toaa susu ki: si faṉa eri ana bali ra ne to ki mai kakalia ta toaa susu, e ofua i la toaa susu eri.

⁴⁹ Ma tha Josefa e gwea foee koni ka oro faamau ’uria migee one i la amali, sui ka ekwa ana teemai lana, uria ne eteta, ka dora.

⁵⁰ Ma tha Josefa e kwalafia ro kaluwane nia ki asi maṉa na fiu fa ṉali eki ana unii thaofaa e ni u mai, ma kero futa mai ani Asinatha, na thari tha Botifera aofia i Ono.

⁵¹ Ma tha Josefa e alaṉia thatana kaluwane totonao nia atha Manasa: Uria na tha God (bae lana neri) e adea kwa liodora ana ra eki sui boo ku ululafu ania na ba, ma toa eki sui bana na i maafera maka nau.

⁵² Ma thatana kaluwane buri nia e alaṉia atha Ifiremu: Uria na tha God e adea nau kwa fuṉu ana foeedo ki la fanua ku toto ana taa la iei.

⁵³ Ma fiu fa ṉali eki ana unii abusua i la fanua i Ijifi e sui bonaa.

⁵⁴ Ma fiu fa ṉali eki ana unii thaofaa ka thafali mai, sulia si do na tha Josefa e sorea na ba: ma unii thaofaa eri ni la fanua ki sui bana; ma sui la fanua i Ijifi sui boo si berede kai to bana iei.

⁵⁵ Ma toto si maṉa kera thaofa naa i la fanua i Ijifi sui boo, toa eki keka ’ai thatana tha Fero fasi kai falea ada ta si berede: ma tha Fero ka soree isana toa eki sui bana na i Ijifi, Lae amulua isatha Josefa: si do nia kai soree isamulua, muki ilia fasi.

⁵⁶ Ma unii thaofaa ni fafia maana fanua ne i iano ta si kula si e’i boo: ma tha Josefa ka ifinia biui faṉa eki sui bana, ka usi ania ifana toa i Ijifi; ma unii thaofaa kai kulua alaa i la fanua eri i Ijifi.

⁵⁷ Ma kulee toa eki sui bana keka lae mai uri Ijifi isatha Josefa fasi keki usia ada tei si koni; sulaania na unii thaofaa ka kulua i la fanua eki sui boo.