GENESIS 40 - Ṉa Alaofua Falu 1923 1949

¹ Ma lalae mai, buriana si ade la eki, wane ni beta lana waene ifana kiṉa eri i Ijifi, ma wane ne naarea fana nia, kero abula garo uria wane inoto keroa na ṉa kiṉa i Ijifi.

² Ma tha Fero ka rakeiri uria ro wane ana wane ni ra nia ki, wane ne nanao ana toa ni beta lana waene neri, ma wane ne nanao ana toa ni naare la.

³ Ma nia ka suusidaroa i maafera wane eri ne tatha inaona omea ni fono toi la kali nia, i la lokafu, asi kula na kera kani fafia tha Josefa iei.

⁴ Ma wane eri ne tatha inaona omea ni fono toi la kalia tha Fero ka takofaledaroa isatha Josefa, ma nia ka ra ifadaroa: ma kera suusidaroa iei sulia tei fa boṉi.

⁵ Ma keko moosubolea, wane boo moosubole nia, wane moosubole nia i talaana, ana tee fa rodo eri boo, sulia toolaṉai lana moosubole keroa ki ne eeta kwailiu, do wane ni beta lana waene, ma do wane ni naare la ifana kiṉa i Ijifi, na kera kani fafidaroa i la lokafu.

⁶ Ma tha Josefa ka kotho isadaroa i la si uusuwadia, ka lio uri keroa, ma rikia fasi, liodaroa e dila.

⁷ Ma nia ka soetoona ro wane ni ra tha Fero eki na keko ni isana i la lokafu i maafera wane inoto nia, ka una eri, Liomaroa ka kulua itaraena uria ta?

⁸ Ma keko soree isana, Kamarea mere moosubolea moosubole, me a’i ta wane si to bana sa kai toolaṉai nia ifamarea. Ma tha Josefa ka soree isadaroa, Tha God ana ne thaitoomana toolaṉai lana tarifulaa ki, mado? Nau ku thathamia sa moka faaroṉo nau mania.

⁹ Ma wane eri ne nanao ana toa ni beta lana waene ka faaroṉoa tha Josefa ana moosubole nia, ka una eri isana, I la moosubole nau, rikia fasi, tee faene ni inaofaku;

¹⁰ Ma faene eri ulu tharee do ni ania: ma riki lane ’uria se ṉoṉothaa, ma takana ka maṉo mai; ma fuṉii faene eki kai fuṉu ana foee faene ne rafo:

¹¹ Ma titiu tha Fero e ni abaku; ma nau ku ṉalia foee faene eki, kwa losia uri la titiu tha Fero; ma nau ku falea kau titiu eri i abana tha Fero.

¹² Ma tha Josefa ka una eri isana, Toolaṉai lana nai nia: Ulu tharee do eki na ṉa ulu fa boṉi;

¹³ Ulu fa boṉi ni u, ma tha Fero kai bii tafoa gwaumu, kai oli fafi oe uria si kula no toto mai iei: ma oki falea kau titiu tha Fero i abana, sulia si ade la no ililia na ba asi maṉa no betaa waene ifana.

¹⁴ Ma sui oko onotooku fasi asi maṉa oe ni to la ana lea la; ma nau ku thathamia oki fatai nia ade lea lamu uri nau, oki aratai nau isatha Fero, oko talai nau kau ithara faisia maafera nei:

¹⁵ Uria na kera lau nau mamana boo faisia fanua Hibaru ki: ma i fanua nei lau boo kwasi ilia boo ta si do, fasi keki alu nau i la lokafu nei i maana.

¹⁶ Ma si maṉa na wane eri ne nanao ana toa ni naare la ka rikia toolaṉai lana si do eri e lea bana, nia ka bii soree isatha Josefa, Ni nau lau boo ku moosubole, ma, rikia fasi, ulu nanado asi berede kwakwaoa ni fafona gwauku:

¹⁷ Ma i la nanado ne to susui mai iaa, do oro ne eeta kwailiu na kera naarea ifatha Fero; ma thaaro ki keka ania faisia nanado eri na ni fafona gwauku.

¹⁸ Ma tha Josefa e luua, ka sorea, Toolaṉai lana nai nia: Ulu nanado eki na ṉa ulu fa boṉi:

¹⁹ Ulu fa boṉi ni u, ma tha Fero kai bii sigilia gwaumu ka thada faisi oe, kai tarufai oe ata ’ai, oki lio; ma thaaro ki keki ania si mariko faisia seemu.

²⁰ Ma lalae mai, ana ula fa boṉi, fa boṉi eri na kera tharea tha Fero ania, nia ka thasi faṉa ifana toa ni ra nia ki sui bana: ma nia ka tafoa gwauna wane eri ne nanao ana toa ni beta lana waene, ma gwauna wane eri ne nanao ana toa ni naare lana faṉa, imaalutana wane ni ra nia ki.

²¹ Ma nia ka oli fafia wane eri ne nanao ana toa ni beta lana waene, kai ra lau bana asi ra eri; ma nia kai falea titiui do i abana tha Fero:

²² Wane eri molo ne nanao ana toa ni naare lana faṉa, nia ka alua kai lio: alafana toolaṉai la eri na tha Josefa e toolaṉai nia isadaroa.

²³ Una ena mena, wane eri ne nanao ana toa ni beta lana waene e a’i si onotoona tha Josefa; ka liodora ani nia.