GENESIS 4 - Ṉa Alaofua Falu 1923 1949

¹ Ma tha Adam ka ofu bia kwaina na ni Eve; ma kini eri ka iana, ka tharea tha Kena, ka una eri, Nau ku rikia naa wane eri ne ita mai atha Jihova.

² Ma ruana ka tharea thasina wane eri, tha Efolo neri. Ma tha Efolo ṉa wane ni fono toi la kalia sifi; tha Kena molo, wane ni ’ili lana theegano.

³ Ma lalae mai, buriana tei fa boṉi, tha Kena ka ṉalia mai tei fo ana foee ’ai i theegano, ana do ni foa la ifatha Jihova.

⁴ Ma tha Efolo ka ṉalia lau bomai tei do totonao ana aini sifi nia ki, ma tei do gwagwarurutaa faisia. Ma tha Jihova ka ala fafia tha Efolo ma do ni foa la nia:

⁵ Me a’i si ala fafia tha Kena ma do ni foa la nia. Ma tha Kena ka rakeiri faamau, me lio kwasula.

⁶ Ma tha Jihova ka soree isatha Kena, Uria ta noko rakeiri? ma uria ta noko lio kwasula una eri?

⁷ Mado so abula lea, keki ala fafi oe, mado? mada sa abula lamu e a’i si lea, do ifana abula taa la ka teo bana i maana olofolo. Ma do eri kai thathami oe, ma oki inoto iana.

⁸ Ma tha Kena ka ṉata bia thasina na tha Efolo: ma lalae mai, si maṉa na keko ni masuu, tha Kena e tae firua bia thasina na tha Efolo, ka thauṉia ka mae bonaa.

⁹ Ma tha Jihova ka soree isatha Kena, Thasimu tha Efolo e ni ifei? Ma nia ka una eri, Nau ku dora lau baku ania: ni nau ṉa wane ni fono toi la kalia thasiku, mado?

¹⁰ Ma nia ka sorea, Si ta no ilia neri? liṉana ṉata lana ’abuna thasimu ka ’ai thataku faisia theegano.

¹¹ Ma si maṉa eri kera alua taa la ka to fafi oe faisia theegano, ne ifinia fokona na ba fasi kai ṉalia ’abuna thasimu faisia abamu;

¹² Ita asi maṉa eri ka lae alaa, si maṉa oki ’ilia theegano, theegano eri ka a’i si falea sukwaia nia ifamu; ni oe ṉa wane ni thaka ka toto bana ma wane liliu i fanua na i iano.

¹³ Ma tha Kena ka una eri satha Jihova, Kwae la nau nei e baita ka tatha asi do kwai susuu ania.

¹⁴ Rikia fasi, afa boṉi nei o tari nau faisia maana fanua na i iano; ma nau kwai to thaufuni faisia maamu; ma ni nau ṉa wane ni thaka ka toto bana ma wane liliu i fanua na i iano; ma lalae mai, ni tei bana na ka fulatooku ka thauṉi nau ana.

¹⁵ Ma tha Jihova ka soree isana, Mania ni tei bana na ka thauṉia tha Kena, keki duua ifana ana fiu fa duu la. Ma tha Jihova ka alua fafuilalaa fafia tha Kena, ada ta wane ka fulatoona, ka thauṉia.

¹⁶ Ma tha Kena ka lae kau faisia inaofatha Jihova, ka to bana i fanua i Nodo ibali tae lana thato i thara ana Itena.

¹⁷ Ma tha Kena ka ofu bia kwaina; ma kini eri ka iana, ka tharea tha Inoka: ma tha Kena ka thauwai nia ta toaa susu, ka alaṉia ana Inoka, sulia thatana kaluwane nia.

¹⁸ Ma tha Inoka ka kwalafia tha Irada: ma tha Irada ka kwalafia tha Mehujaele: ma tha Mehujaele ka kwalafia tha Methusaele: ma tha Methusaele ka kwalafia tha Lemeke.

¹⁹ Ma tha Lemeke ka tolea ro kini: thatana kini nao ni Eda, ma thatana kini buri ni Sila.

²⁰ Ma ni Eda ka tharea tha Jebala: ma wane eri na maka totonao ana toa na keka to bada i la biui‐maku ki, ma keka tharea katele.

²¹ Ma thatana thasina na tha Jubala: wane eri na maka totonao ana toa eki sui bana na keka ufia tale agaa, ma okeni keka felasia ana kukuuda.

²² Ma ni Sila lau boo e tharea tha Tubalakena, na wane ni kwaifamanatai isana toa eki sui bana na keka thauwai nia si do ki asi thalo aadilaa ma si thalo: ma waiwaena tha Tubalakena na ni Nema.

²³ Ma tha Lemeke ka una eri isana ro kini nia ki, sani Eda ma ni Sila, Roṉoa fasi bae laku; kamaroa ro kini tha Lemeke, fafuroṉoa fasi ṉata laku: uria ni nau ku thauṉia naa wane ne thaumaala iaku, na ṉa wane bii baita ne thaufifi iaku.

²⁴ Tha Kena keki duu ifana ana fiu fa duu la; e mamana tha Lemeke ana keki duu ifana ana fiu tafulu fa duu la ma fiu fa duu la.

²⁵ Ma tha Adam ka ofu lau bia kwaina; ma kini eri ka tharea kaluwane nia, ka alaṉia thatana atha Sete: Uria na tha God (bae lana kini eri neri) e alua lau ta kwalafaa ifaku na kai tae fulii atha Efolo, wane eri na tha Kena e thauṉia na ba.

²⁶ Ma tha Sete lau boo e kwalafia kaluwane nia; ma nia ka alaṉia thatana atha Inosi: asi maṉa nia, imole ki keka thafalii ’ai thatana tha Jihova.