GENESIS 37 - Ṉa Alaofua Falu 1923 1949

¹ Ma tha Jekofo ka to bana i la fanua na maka nia e toto ni laea iei, fanua i Kenana neri.

² Si ade la ne ita mai atha Jekofo nai nia. Tha Josefa, ne to bana sulia tee tafulu fa ṉali ma fiu fa ṉali, ka tharea feree sifi ki ofu bia thoona kera; ma wela wane eri kai to bia kaluwane ni Bila ki ma kaluwane ni Silifa ki, na ro kini maka nia: ma tha Josefa ka faaroṉoa maka nia ana abula lada ne taa.

³ Ma tha Isirela e liothau atha Josefa ka tatha ana liothau lana ana baree wela nia ki sui bana, uria ne kwalafi nia asi maṉa ne arai naa: me thauwai nia tooni ifana ana kasi maku oro ki ne mogolilia.

⁴ Ma si maṉa na thoona kera kera rikia na maka kera e liothau ani nia ka tatha ana liothau lana ana thoona kera sui bana, keka riki nia ka taa, ma kera dora ana mai tasi faṉa iamu:

⁵ Ma sui mado so lalakwee arasi nia, moosubole, ka faaroṉoa thoona kera: ma keka bii riki nia ka taa ka tatha.

⁶ Ma nia ka soree isada, Nau ku thathamia muki roṉoa fasi moosuboli nei na ni nau ku moosubolea:

⁷ Uria na, rikia fasi, kulu kuka kani fafia ifii koni la ra, ma lio fasi, ifii koni nau ka tatae, ka takwe kokoto lau boo; ma, rikia fasi, ifii koni kamulua ki keka takwe kakalia, ma keka gwau toli uri theegano isana ifii koni nau eri.

⁸ Ma thoona kera keka soree isana, Ni oe oki tatha mamana boo inaofamilia, mado? ma oki inoto mamana boo ani kamilia, mado? Ma keka bii riki nia ka taa ka tatha inunufana moosubole nia ki ma bae lana.

⁹ Ma nia ka moosubolea tee moosubole lau, ka faaroṉoa thoona kera, ka una eri, Rikia fasi, ni nau ku moosubolea lau ta moosubole; ma, rikia fasi, thato ma madami ma tee tafulu fa bubulu tee fa bubulu, kera gwau toli uri nau.

¹⁰ Ma nia ka faaroṉoa maka nia ma thoona kera; ma maka nia ka sore nia, ka una eri isana, Ṉa ta ni ana moosubole nei no moosubolea na ba? Ni nau ma thainamu ma dooramu kera miki lae mamana boo, miki gwau toli uri theegano inaofamu, mado?

¹¹ Ma thoona kera kera ugalia; maka nia molo ka lalomatoona si ṉataa eri i ruruuna.

¹² Ma thoona kera keka lae nada fasi keka tharea feree sifi maka kera i Sekema.

¹³ Ma tha Isirela ka soree isatha Josefa, Thoomu kera keka tharea feree sifi eki i Sekema, mado? lae si mai, kwai arasi oe kau isada. Ma wela eri ka soree isana, Ni nau kwai to bakua nai nia.

¹⁴ Ma nia ka una eri isana, Nau ku thathamia oki lae, rikia fasi sa mado e a’i thoomu kera keka to lea bada, ma feree sifi eki keka to ni lea la; sui lalae oli mai, oko faaroṉo nau mania. Mania nia ka arasia faisia kurua eri i Hefirono, lalae ka fula i Sekema.

¹⁵ Ma tee nonii wane ka fulatoona, ma, rikia fasi, nia ka liliu ana i masuu: ma wane eri ka soetoona, ka una eri, Si ta noko rofe uria neri?

¹⁶ Ma nia ka sorea, Nau ku rofe uria thooku kera: ku thathamia oki faaroṉo nau fasi asi kula na keka tharea feree sifi kera ki iei.

¹⁷ Ma wane eri ka sorea, Kera lae naa faisia i kunei: uria ni nau ku roṉoa ṉata lada, be una eri, Kulu kau uri Dothana. Ma tha Josefa e lae buriana thoona kera, ka fulatooda i Dothana.

¹⁸ Ma si maṉa na kera riki nia ni da u mai, asi maṉa eri mena ne a’i si fula u mai karaṉi kera, keka bii furia ṉataa fafi nia fasi keka thauṉia.

¹⁹ Ma keka soree uri kera kwailiu, Rikia fasi, wane nei ni moosubole la kai lae na mai.

²⁰ Mania kulu kau, kulu thauṉia, kuki ṉana ania uri lala ta malau, ma kuki una eri, Ta do maruki ne taa e dudumeme ania: kuka rikia fasi moosubole nia ba ki ka mamana, mado ka a’i.

²¹ Ma tha Rubeni e roṉoa, ka suusi nia faisia abada; ka una eri, Kulu sa kuki thauṉia ka mae e a’i.

²² Ma tha Rubeni ka una eri isada, Musi adea ’abuna ka igwa; muki naṉa ani nia uri la malau na ni fanua kwasi nania, musi thauṉia ana abamulua: fasi kai faamaruki nia i abada neri, kai falea lau bana ifana maka nia.

²³ Ma lalae mai, si maṉa na tha Josefa e fula naa isana thoona kera, keka tanusia tooni nia faisia tha Josefa, tooni eri ana kasi maku oro ki ne mogolilia ne tooni ania;

²⁴ Ma keka rau nia, keka naṉa ania uri la tee malau: ma malau eri e gwa’u, e a’i ta si kafo si ni iei.

²⁵ Ma keka ono bada fasi keki ania si berede: ma kera tafoa maada keka lio, ma, rikia fasi, laea ana kwalafaa tha Isimela keki lae na mai faisia i Giliata, bia kamela kera ki, na keka ṉalia si do makwa lea ki, ma ta si baoma, ma ta si mura, keka lae nada fasi keki sifo fafia uri Ijifi.

²⁶ Ma tha Juda ka soree isana doorana kera, Si ta na kuki ṉalia ana adomi lakulua la, mada sa kuki thauṉia thasikulua nei, kuki thaufunia ’abuna?

²⁷ Kulu kau, kulu usi ani nia ifana kwalafaa tha Isimela, nai nida, ma kusi thauṉia ana abakulua; uria na thasikulua neri, na wane ana ina lakulua. Ma keka ala fafia ṉata lana.

²⁸ Ma tei toa i Midiana na keka usi do ana todado la ki, keka tatha sula tala; ma kera abaa tha Josefa, keka tafoa mai faisia malau eri, keka usi atha Josefa ifana toa eki ana kwalafaa tha Isimela, usi lana ro tafulu malefo asi silifa. Ma toa eki keka talaia tha Josefa uri Ijifi.

²⁹ Ma tha Rubeni ka oli mai sana malau; ma, rikia fasi, tha Josefa ka a’i si to bana i la malau eri; ma nia ka seṉaa tooni nia ki.

³⁰ Sui ka oli lau isana thasina kera, ka una eri, Wela eri e a’i si to bana; ma ni nau kwai lae nakua urifei?

³¹ Ma kera ṉalia tooni ba tha Josefa, keka thauṉia ta kalee gota, keka thuthumai nia tooni eri la ’abuna;

³² Ma keka falea tooni eri ana kasi maku oro ki ne mogolilia isana toa na keka ṉalia kau isana maka kera; keka una eri, Kamilia mili fulatoona tooni nei: oko thaitoomana maalutana; tooni kaluwane oe neri, mado e a’i?

³³ Ma nia ka thaitoomana tooni eri, ka sorea, Tooni kaluwane nau nai nia; ta do maruki ne taa e dudumeme ani nia; e a’i si e’i kera alamagaa boo tha Josefa.

³⁴ Ma tha Jekofo ka seṉaa tooni nia ki, ka ali nia asi maku rarasieila, ka tatao uria kaluwane nia sulia fa boṉi oro ki bana.

³⁵ Ma kaluwane nia ki sui bana, ma thari nia ki sui bana kera tae mai fasi keka faainamarukia; ma nia ka tofe, ka sorea ne a’i si inamaruki boo; ma nia ka una eri, Uria ni nau kwai tatao uria kaluwane nau ka toto bana, maasia si maṉa kwai sifo isana i la kwaiṉeia. Asi ade la una eri maka nia ka aṉisia.

³⁶ Ma wane eki i Midiana keka usi ani nia i Ijifi ifatha Botifa, na wane inoto ana ra tha Fero ne tatha inaona omea ni fono toi la kali nia.