GENESIS 24 - Ṉa Alaofua Falu 1923 1949

¹ Ma tha Aberahamo e arai naa, fa boṉi nia ki e oro: ma tha Jihova e alua lea la fafia tha Aberahamo asi do ki sui bana.

² Ma tha Aberahamo e soree isana ulunao ana wane ni ra nia ki ne inoto asi do ne rikidaki sui boo, Nau ku thathamia oki alua abamu ifara thafaku:

³ Ma ni nau kwai faaothi oe ana thatana tha Jihova, ṉa God i thalo lo ma God i fanua na i iano, e a’i osi folia ta kini ifana kaluwane nau ana thari Kenanaete ki, na nau kwai to imaalutada nania:

⁴ Oki lae uria fanua nau, isana ina laku kera, ma oki tolea mai ta kini ifana kaluwane nau na tha Aesiki.

⁵ Ma wane ni ra eri ka soree isana, Mado e a’i thari eri kai lalakwee lae buriaku uria fanua nei: e a’i si e’i kwa talaia bokau kaluwane oe uri la fanua eri no lae mai faisia, mado?

⁶ Ma tha Aberahamo ka soree isana, Ada oko talaia kaluwane nau ka oli lau kau uri fanua eri.

⁷ Tha Jihova, ṉa God i thalo lo, ne talai nau mai faisia maafera maka nau, ma fanua ina laku kera, nia ne ṉata mai isaku, ma ka othi isaku, be una eri, Ifana kwalafamu kwai falea fanua nei; ni nia kai arasia angel nia na kai tatha inaomu, ma oki tolea mai ta kini ifana kaluwane nau faisia fanua eri.

⁸ Ma mada sa thari eri kai lalakwee lae buriamu, so e una eri, oki tonee to faisia othi la nau nei; talitoona bana soki talaia lau kau kaluwane nau uria fanua eri e a’i.

⁹ Ma wane ni ra eri ka alua abana ifara thafana wane inoto nia na tha Aberahamo, ka othi isana sulia si ade la eri.

¹⁰ Ma wane ni ra eri ka talaia tafulu kamela faisia aini kamela wane inoto nia, ka lae nana; uria na ogogonia wane inoto nia ni sui bana ni abana: ma nia ka tae kau, ka lae uria Mesopotemia, lalae ka fula isana toaa susu tha Neho.

¹¹ Ma nia ka adea na kamela nia ki keka bouruuru ithara faisia toaa susu eri i ninimana tee malaui kafo, i thaulafia, asi maṉa na biraṉana kini ki keki lae mai uria ufi lana kafo.

¹² Ma nia ka una eri, Jihova ae, God wane inoto nau na tha Aberahamo, nau ku thathamia oki falea mamanaa iaku afa boṉi nei, ma oki fatai nia ade lea lamu uria wane inoto nau na tha Aberahamo.

¹³ Rikia fasi, nau ku takwe isana malaui kafo nei; ma thari toa na toaa susu nei ki keki lae mai uria ufi lana kafo:

¹⁴ Ma lalae mai, thari eri na nau kwai una eri isana, Nau ku thathamia oki tanusia mai do oe ni ṉali lana kafo, kwai kuu fasi; ma nia kai una eri, Kuu fasi, ma nau kwai fale ana kamela oe ki keki kuu lau boo; nau ku thathamia sa nia bonaa neri, thari eri no filia naa ifana wane ni ra oe na tha Aesiki; asi kula eri kwai thaitoomana no fatai nia ade lea lamu uria wane inoto nau.

¹⁵ Ma lalae mai, si maṉa nia kai ṉata si sui u, rikia fasi, ni Ribeka ka lae mai, thari tha Bethuele, na kaluwane ni Milika, na kwaina doorana tha Aberahamo, na tha Neho; ma do nia ni ṉali lana kafo ni gwauna abana thari eri.

¹⁶ Ma thari eri riki lane lea faamau, thari laulau neri, me a’i ta wane si ofu bi nia: ma nia ka sifo isana malaui kafo eri, ka ufia kwadee do nia ka fuṉu ana kafo, sui ka tae mai.

¹⁷ Ma wane ni ra eri ka fita mai fasi kai toda ani nia, ka una eri, Nau ku thathamia oki alamatai nau kwai kuufia ta kasi kafo ana do oe ni ṉali lana kafo.

¹⁸ Ma thari eri ka sorea, Kuu fasi, arai ena ae: ma nia ka lakwasia mai, ka tanusia do nia eri ni ṉali lana kafo, ka rau ania i lofona abana, ka falea iana ka kuu.

¹⁹ Ma lalae e fale naa iana, wane, eri e kuu naa, thari eri ka sorea, Nau kwai fale ana kamela oe ki lau boo, keki kuu, ka fula asi maṉa keki abusu.

²⁰ Ma nia ka lakwasia mai, ka kikia si kafo i la ma’e kafo eri, do nia ana ṉali lana kafo ka gwa’u naa, sui ruana ka fita kau isana malaui kafo eri, ka ufia lau mai, ka ufia kafo ifana kamela nia ki sui bana.

²¹ Ma wane eri ka kwele ani nia, sui ka bona bana, fasi kai thaitoomana sa mado e a’i tha Jihova e falea mamanaa fafia laea nia.

²² Ma lalae mai, kamela eki kera kuu ka sui naa, wane eri ka bii ṉalia mai do ni lauṉi lana aliṉana imole, tee bali sekele na kulua lana golu eri, ma ro kome ana golu ifana ro aba thari eri, kulua lana tee tafulu fa sekele;

²³ Ma ka sorea, Ni oe thari ni tei? nau ku thathamia oki faaroṉo nau mania: sa mado e a’i ta si kula ni maafera maka oe, miki malafa to fasi iei?

²⁴ Ma nia ka una eri isana, Ni nau thari tha Bethuele, na kaluwane ni Milika ne thare nia ifatha Neho.

²⁵ Nia ka sorea lau boo isana, Amilia ta si lolo raraṉea ne talaana kamela oe ki, ma si faṉa ifada, ma si kula fani kamulua muki malafa to fasi iei.

²⁶ Ma wane eri ka agwaoro, ka faare baita atha Jihova.

²⁷ Ma nia ka una eri, Keki taṉoa tha Jihova, na God wane inoto nau na tha Aberahamo, ne a’i si luka faekwa ana wane inoto nau sa kai to ithara faisia tatakomia nia ma mamana lana: si maṉa ku lalae sula tale na ba, tha Jihova e talai nau mai uria maafera ina lana wane inoto nau.

²⁸ Ma thari eri ka fita kau, lae ka faaroṉoa toa na i maafera thainana asi ade la eki.

²⁹ Ma ni Ribeka ana waiwaena nia, thatana tha Lebana: ma tha Lebana ka fita mai uria wane eri isana malaui kafo eri.

³⁰ Ma lalae mai, e rikia naa do eri ni lauṉi lana aliṉana imole, ma kome eki i abana waiwaena nia, me roṉoa naa bae lana waiwaena nia na ni Ribeka, na sorea, Wane eri e ṉata una eri isaku; nia ka bii lae ka fula isana wane eri; ma, rikia fasi, e takwe bana isana kamela eki i ninimana malaui kafo.

³¹ Ma nia ka una eri, Lae mai, wane ena na tha Jihova e alua lea la fafi oe; uria ta noko takwe mai thara? uria ni nau ku betaa maafera maakwali oe, bia si kula ne talaana kamela nei ki.

³² Ma wane eri ka kotho mai maafera: ma nia ka lubea si oko asi do na i suila kamela wane eri ki, ka falea si lolo raraṉea ma si faṉa ne talaana kamela eki, ma ta si kafo fasi kei taua ’a’aena ma aaena wane eki na kera lae bi nia.

³³ Ma kera alua do ni ania ki inaofana sa kai rere ana: ma ni nia ka sorea, Nau ku lalakwee faṉa si maṉa na kwasi faaroṉo u asi ade la na ku lae mai uria. Ma nia ka una eri, Oki ṉata fasi.

³⁴ Ma wane eri ka sorea, Nau wane ni re tha Aberahamo.

³⁵ Ma tha Jihova e falea lea la baita ifana wane inoto nau; ma nia ka inoto faamau si maṉa eri: ma tha God e falea feree sifi ifana, ma aini buloka, ma si silifa, ma si golu, ma wane ni ra ki, ma kini ni ra ki, ma kamela ki, ma ase ki.

³⁶ Ma ni Sera, na kwaina wane inoto nau, e tharea tee fa kaluwane ifana wane inoto nau si maṉa ne kukue naa: me falea naa ifana kaluwane nia eri si do ne rikidaki sui bana.

³⁷ Ma wane inoto nau e faaothi nau, ka una eri, Ada oko foli kini ifana kaluwane nau ana thari Kenanaete ki, na nau kwai to mai fanua kera:

³⁸ Oki lae uria maafera maka nau, ma isana ina laku kera, ma oki bii tole kini ifana kaluwane nau.

³⁹ Ma ni nau kwa una eri sana wane inoto nau, Mado e a’i thari eri kai lalakwee lae buriaku.

⁴⁰ Ma nia ka soree isaku, Tha Jihova, ni nia na nau ku lae inaofana maana, kai arasia angel nia kai lae bi oe, kai falea mamanaa fafia laea oe; ma oki tole kini fana kaluwane nau ana ina laku kera, ma faisia maafera maka nau:

⁴¹ Oki tonee to faisia othi la nau nei asi ade la nei, lalae o fula isana ina laku kera; ma kesi falea ta thari iamu, oki bii tonee to faisia othi la nau.

⁴² Ma lalae ku fula ibaari isana malaui kafo nei, ma nau ku una eri, Jihova ae, God wane inoto nau na tha Aberahamo, mado soki falea mamanaa fafia laea nau na nau ku lae ania neri:

⁴³ Rikia fasi, nau kwai takwe isana malaui kafo nei; ma lalae mai, si maṉa na thari eri kai lae mai uria ufi lana kafo, ma nau kwai soree isana, Nau ku thathamia oki falea mai akua ta si kafo faisia do oe nei ni ṉali lana kafo, kwai kuu fasi;

⁴⁴ Ma nia kai una eri isaku, Ni oe oko kuu fasi, ma nau kwai ufia si kafo ifana kamela oe ki lau boo: ku thathamia sa nia bonaa neri, thari eri na tha Jihova e filia naa ifana kaluwane wane inoto nau.

⁴⁵ Ma si maṉa ku ṉata i ruruuku si sui u, rikia fasi, ni Ribeka kai lae na mai fafia do ana ṉali lana kafo i gwauna abana; ma nia ka sifo isana malaui kafo eri, ka ufia si kafo: ma nau ku una eri isana, Nau ku thathamia oki alamatai nau kwai kuu fasi.

⁴⁶ Ma nia ka lakwasia mai, ka tanusia do nia ni ṉali lana kafo faisia gwauna abana, ka una eri, Oki kuu fasi, ma nau kwai fale ana kamela oe ki keki kuu lau boo: mania nau kwa kuu, ma nia e faakuufia kamela eki lau boo.

⁴⁷ Ma nau kwa soetoona, ku una eri, Ni oe thari ni tei? Ma nia ka sorea, Thari tha Bethuele, kaluwane tha Neho, na ni Milika e tharea ifana: ma nau ku alua do ba ni lauṉi lana isana aliṉana, ma ro kome ba ki i abana.

⁴⁸ Ma nau kwa gwau toli, ku faare baita atha Jihova, ku taṉoa tha Jihova ṉa God wane inoto nau na tha Aberahamo, ne talai nau mai ana tala oolo nei, kwai tolea thari doorana wane inoto nau ifana kaluwane nia.

⁴⁹ Ma si maṉa eri mada sa muki abula lea asi lio ne mamana uria wane inoto nau, faaroṉo nau fasi: so e a’i, faaroṉo nau; fasi kwa akele kau uri bali aba aola, mado uri aba mauli.

⁵⁰ Sui tha Lebana ma tha Bethuele keko luua ṉata lana, keko una eri, Do nei e ita mai atha Jihova: mere dora ana sore lana ta si do taa isamu, mado ta si do lea.

⁵¹ Rikia fasi, ni Ribeka ni inaofamu, tolea, moki lae amaroa, kwaina kaluwane wane inoto oe nai nia, sulia si do na tha Jihova e sorea na ba.

⁵² Ma lalae mai, e roṉoa naa bae ladaroa, wane ni ra tha Aberahamo ka bii agwaoro iano, ka faare baita atha Jihova.

⁵³ Ma wane ni ra eri ka ṉalia mai tei lauṉia asi silifa, ma tei lauṉia asi golu, ma tooni ki, ka falea fani Ribeka: ka falea lau boo tei do na usi lane baita ki ifana waiwaena nia ma thainana.

⁵⁴ Ma keka faṉa ma keka kuu, ni nia ma wane eki na kera lae bi nia, keka toto fanua ka dani; ma keka tatae i uusuwadia, ma nia ka una eri, Arasi nau kau uria wane inoto nau.

⁵⁵ Ma waiwaena nia ma thainana keko una eri, Alamatai nia thari nei kai to bi kamilia sulia tei fa boṉi, ta tafulu fa boṉi too, mado ka sareṉa; buriana fa boṉi eki, nia ka bii lae.

⁵⁶ Ma wane eri ka soree isadaroa, Ada moka suusi nau, uria na tha Jihova e falea mamanaa fafia laea nau; arasi nau kwai oli akua isana wane inoto nau.

⁵⁷ Ma keko una eri, Meki ’ai thatana thari eri, meki soetoona kai bae mai.

⁵⁸ Ma keko ’ai thatana ni Ribeka, keko soree isana, O thathamii lae bia wane nei, mado? Ma nia ka una eri, Nau ku thathamia kwai lae boo.

⁵⁹ Ma kera arasia kau waiwaena kera ni Ribeka, ma kini ne nanai nia, ma wane ni ra tha Aberahamo, ma wane nia ki.

⁶⁰ Ma kera alua lea la fafia ni Ribeka, keka soree isana, Waiwaena kamilia na ni oe, oki kwalafia tee tooni kudui imole, ma kwalafaa oe keki ana ana maethakaa toa eki na kera rikida ka taa.

⁶¹ Ma ni Ribeka ka tae kau bia thari nia ki, ma keka ono i suila kamela eki, keka lae buriana wane eri: ma wane ni ra eri ka tolea ni Ribeka, ka lae nana.

⁶² Ma tha Aesiki ka lae mai faisia tala uria malaui kafo eri i Lahairoi; uria ne to bana i la fanua i mutana.

⁶³ Ma tha Aesiki e lae kai manatatoona tha God i la ra i thaulafia: ma nia ka tafoa maana, ka lio kau, ma, rikia fasi, kamela eki kera lae na mai.

⁶⁴ Ma ni Ribeka ka tafoa maana, ma si maṉa ne rikia tha Aesiki, ka sifo faisia kamela eri.

⁶⁵ Uria ne soetoona naa wane ni ra eri, Ni tei nai nia, wane nei na kai liliu ana i la ra fasi kai toda ani kulu? Ma wane ni ra eri e sorea naa, Wane inoto nau neri: mania thari eri ka ṉalia si maku, ka thu fafi nia.

⁶⁶ Ma wane ni ra eri ka faaroṉoa tha Aesiki asi do ne ilidaki sui bana.

⁶⁷ Ma tha Aesiki ka tolea thari eri uri la biui‐maku thainana na ni Sera, ma nia ka ofu bia ni Ribeka, kwaina bonaa neri; me thathami nia, ka liothau iana: ma kini eri e faainamarukia tha Aesiki buriana na thainana e mae naa faisi nia.