GENESIS 23 - Ṉa Alaofua Falu 1923 1949

¹ Ma tee taleṉee fa ṉali ma ro tafulu fa ṉali ma fiu fa ṉali e sui ani Sera: fa ṉali ki ana to lana ni Sera neri.

² Ma ni Sera e mae i Kiriata‐afa, i Hefirono neri, i la fanua i Kenana: ma tha Aberahamo ka fula mai ka tatao fafia ni Sera ma ka aṉisia.

³ Ma tha Aberahamo ka takwe iaa faisia kini mae nia, ka ṉata isana kaluwane tha Hete ki, ka una eri,

⁴ Nau ṉa wane ata fanua eeta ma wane ku to ni laea isamulua: falea mai akua ta kula ni aluwanea isamulua, fasi kwai alua kini mae nau nei iei, maaku si riki nia lau.

⁵ Ma kwalafaa tha Hete ki keka luua tha Aberahamo, keka soree isana,

⁶ Arai ena ae, fafuroṉo, kamilia fasi: ni oe ṉa wane gwauwai tha God imaalutamilia: asi kula ne lea ka tatha asi kula kamilia ni aluwanea ki, alua fasi kini oe ne mae neri; e a’i ta wane iamilia si lufia si kula nia ni aluwanea faisi oe, si lufi oe osi alua iei kini oe ne mae.

⁷ Ma tha Aberahamo ka takwe iaa, ka agwaoro isana toa ana fanua eri, isana kwalafaa tha Hete ki neri.

⁸ Ma nia ka tamani bida, ka una eri, Mada sa manatamulua neri sa nau kwai alua kini nau ne mae, maaku si riki nia lau; fafuroṉo nau fasi, muki ṉata kwaitakoi ifaku satha Ifurono, kaluwane tha Soha,

⁹ Fasi ka falea maufi ba i Makabila iaku, na do nia u boo na i oli lana bali gano nia; nia kai usi ania ifaku ana malefo eki sui bana ne talaana, si kula nau ni bonaa, si kula ni aluwanea i maalutamulua.

¹⁰ Ma tha Ifurono e to bana imaalutana kwalafaa tha Hete ki: ma Hitaete eri na tha Ifurono e luua tha Aberahamo i aliṉana kwalafaa tha Hete ki, toa eki sui bana na kera kotho mai i la maethakaa toaa susu eri, ka una eri.

¹¹ E a’i bana, arai ena ae, roṉoa fasi ṉata laku: bali gano eri kwai tona falea iamu, ma maufi ba na ni iei kwai tona falea iamu; inaofana kaluwane toa nau ki, nai nida, kwai tona falea iamu: alua fasi kini mae oe ba.

¹² Ma tha Aberahamo ka agwaoro inaofana toa ana fanua eri.

¹³ Ma nia ka ṉata isatha Ifurono i aliṉana toa ana fanua eri, ka una eri, Ma sui mado soki falea mai, nau ku thathamia oki roṉoa fasi bae laku: nau kwai falea usi lana bali gano eri ana malefo; usi ania ifaku, ma nau kwai bii alua iei kini nau ne mae.

¹⁴ Ma tha Ifurono ka luua tha Aberahamo, ka una eri isana,

¹⁵ Arai ena ae, fafuroṉo nau fasi: usi lana bali gano nei fai taleṉee fa sekele ana silifa; tonee do neri imaalutakaroa, mado? mania alua fasi kini oe ne mae.

¹⁶ Ma tha Aberahamo ka ade sulia ṉata lana tha Ifurono; ma tha Aberahamo ka ilitoona ifatha Ifurono kulua lana silifa eri ne aratai nia, na kaluwane tha Hete ki kera roṉoa na ba, fai taleṉee fa sekele ana silifa, malefo eki e farana wane ne usia do ana todado la ki.

¹⁷ Ma bali gano tha Ifurono ne i Makabila otofana i Mamari, gano eri, ma maufi na ni iei, ma ’ai eki sui bana i la bali gano eri i oli lana kakali ki mai, kera faaṉadoa usi lana kai mamana

¹⁸ Ifatha Aberahamo, do nia ni bonaa, inaofana kwalafaa tha Hete ki, na toa eki sui bana na kera kotho mai ana maethakaa toaa susu nia.

¹⁹ Ma buriana si do nei, tha Aberahamo ka alua seena kwaina na ni Sera i la maufi ana bali gano eri i Makabila otofana i Mamari, i Heforono nei la fanua i Kenana.

²⁰ Ma bali gano eri, ma maufi na ni lala, kaluwane tha Hete ki kera faaṉadoa usi lana kai mamana ifatha Aberahamo, na kula nia ni bonaa ni aluwanea.