GENESIS 21 - Ṉa Alaofua Falu 1923 1949

¹ Ma tha Jihova ka thai sulia ni Sera, alafana si do ne sorea na ba, ma tha Jihova ka ilia fani Sera si ade la ne ṉata naa sulia.

² Uria ni Sera ka iana, ka tharea tee fa kaluwane ifatha Aberahamo asi maṉa ne arai naa, asi maṉa eri na kera gwalua naa, na tha God e faaroṉo nia mania.

³ Ma tha Aberahamo ka alaṉia thatana kaluwane nia eri ne kwalafia, ne futa ani Sera ifana, atha Aesiki.

⁴ Ma lalae kwalu fa boṉi e sui ana kaluwane nia eri, na tha Aesiki, tha Aberahamo ka bii kwa’i kalia, sulia si ade la na tha God e ṉata fifi ania isana.

⁵ Ma tee taleṉee fa ṉali e sui atha Aberahamo asi maṉa na kaluwane nia eri, na tha Aesiki, e futa mai isana.

⁶ Ma ni Sera ka una eri, Tha God e faawaela nau, ma toa eki sui bana na keki roṉoa, keki waela ofu bi nau.

⁷ Ma nia ka una eri, Ni tei na sa ka soree isatha Aberahamo, Ni Sera toto kai faasusufania wela? uria ni nau ku tharea tee fa kaluwane ifana si maṉa ne arai naa.

⁸ Ma wela eri ka baita alaa, me a’i si susufia lau thainana: ma tha Aberahamo ka thauṉania fafaṉaa baita afa boṉi eri na kera lufia tha Aesiki si susu lau iburi.

⁹ Ma ni Sera ka rikia kaluwane ni Hege, ṉa kini i Ijifi, wela eri ne tharea ifatha Aberahamo kai onioṉa nia.

¹⁰ Mania e soree isatha Aberahamo, Oki arasia kau kini ni ra nei bia kaluwane nia: sulaania kaluwane kini ni ra nei sa ka fulatoona lea la bia kaluwane nau, na tha Aesiki, e a’i.

¹¹ Ma si ade la eri e kulua i maana tha Aberahamo sulia kaluwane nia eri.

¹² Ma tha God ka soree isatha Aberahamo, Osi alamatai nia si ade la eri kai kulua i maamu sulia wela wane nei, ma sulia kini ni ra oe nei: asi do eki sui bana na ni Sera e ṉata sulia isamu, roṉoa fasi ṉata lana; sulaania tha Aesiki ana na keki alaṉia kwalafaa oe ana thatana.

¹³ Ma kaluwane kini ni ra eri lau boo, nau kwai alu nia ṉa maka totonao ata kulee toa, uria na kwalafamu na ni nia.

¹⁴ Ma tha Aberahamo ka tatae i la si uusuwadia u boo, ka ṉalia ta si berede, ma do kafo ni iei, ka falea fani Hega, ka alua i gwauna abana, ma wela eri lau boo, sui ka arasi nia kau: ma kini eri e lae faisia, ka liliu i la fanua kwasi i Biasifa.

¹⁵ Ma kwadee do kafo e toto iei e gwa’u naa, ma nia ka naṉa ana wela eri kai teo i nuuna tee fa ’ai ana kaala ’ai eki.

¹⁶ Ma kini eri e lae kau, ka ono i otofana ka suka ni tau faisia, ’uria si kula mada sa kera basi ana io, ka fula iei: sulaani nia e una eri, Ada kwa rikia mae lana wela nei. Ma nia ka ono i otofana, ka ’ai baita ana aṉi la.

¹⁷ Ma tha God ka roṉoa liṉana ṉata lana wela wane eri, ma angel tha God ka ’ai thatana ni Hega faisia i thalo lo, ka una eri isana, Hega ae, si ta ne uri oe? osi mamau; uria na tha God e roṉoa naa liṉana ṉata lana wela wane nei asi kula ne to mai iei.

¹⁸ Tatae, tafoa fasi wela wane nei, oko olia i abamu; uria ni nau kwai alu nia ṉa maka totonao ana kulee toa inoto.

¹⁹ Ma tha God ka ifinia maana kini eri ka laa, ma nia ka rikia malaui kafo; ma nia ka lae uria, ka lulaa kwadee do eri ka fuṉu asi kafo, ka falea ifana wela wane eri ka kuu.

²⁰ Ma tha God ka to bia wela wane eri, ma nia ka baita alaa, ka to bana i la fanua kwasi, ṉa wane ni basi lana do kwasi ki.

²¹ Ma nia ka to bana i la fanua kwasi i Barana; ma thainana ka tole kini ifana faisia fanua i Ijifi.

²² Ma lalae mai asi mana eri, tha Abimileka ma tha Faekolo, ṉa wane inoto ne tatha inaona omea nia, kero ṉata isatha Aberahamo, keko una eri, Tha God ka to bi oe asi ade la ni sui bana noko ilidaki:

²³ Mania, othi fasi kunei isaku ana thatana tha God nosi abula ana lole la uri nau, mado uria kaluwane nau, mado uria kaluwane kaluwane nau: talafana abula laku ana adeleaa iamu, alafana lau boo abula lamu kai lea uri nau, ma uria fanua nei no to ni laea iei.

²⁴ Ma tha Aberahamo ka una eri, Kwai othi boo.

²⁵ Ma tha Aberahamo e sorea tha Abimileka fafia tee malaui kafo na wane ni ra tha Abimileka ki kera laua faisi nia.

²⁶ Ma tha Abimileka ka una eri, Nau ku dora ania ni tei ne ilia si do eri: ma ni oe lau boo osi faaroṉo nau mania, mado kwasi roṉoa; ku bii roṉoi lau bakua si maṉa eri.

²⁷ Ma tha Aberahamo ka ṉalia tei sifi ma tei buloka, ka falea ifatha Abimileka; ma keko kania alaofua imaalutadaroa.

²⁸ Ma tha Aberahamo ka filia fiu lama kini ki faisia feree sifi, ka aluda keka to eeta.

²⁹ Ma tha Abimileka ka soree isatha Aberahamo, Fiu lama kini nei ki, no aluda keka to eeta na ba, do uria ta?

³⁰ Ma tha Aberahamo ka una eri, Uria na fiu lama kini eki na do oki ṉalia i abaku, na ṉa do ni faamamane la ifaku, sulia ni nau neri na ku ’ilia malaui kafo nei.

³¹ Uria si ade la eri nia ka alaṉia thatana si kula eri ana Biasifa; sulaania asi kula eri keroa kero kwaiothi olili na ba.

³² Mania kero kania alaofua i Biasifa: sui tha Abimileka ka tatae bia tha Faekolo, ṉa wane inoto ne tatha inaona omea nia, keko oli kau uri la fanua Filisitaene ki.

³³ Ma tha Aberahamo e fasia ’ai ki i Biasifa, ka ’ai thatana tha Jihova iei, tha God na ka toto si sui.

³⁴ Ma tha Aberahamo e to ni laea i fanua Filisitaene ki sulia fa boṉi oro ki bana.