GENESIS 2 - Ṉa Alaofua Falu 1923 1949

¹ Mania asi ade la eri thalo lo ki ma fanua na i iano kera thauwai nia ka sui, ma do eki sui bana na ni iei.

² Ma ana fiuna fa boṉi, tha God e faasuia naa ra nia asi do ne thauwanidaki; ma nia ka mamalo ana fiuna fa boṉi eri faisia ra nia ni sui bana ne thauwai nia.

³ Ma tha God ka alua lea la fafia fiuna fa boṉi eri, ka faaabua: uria na afa boṉi eri nia e mamalo faisia ra nia ni sui bana na tha God e thauwai nia, ma ka alua ka to bonaa.

⁴ Si ade la ne ita mai ana thalo lo ki ma fanua ne i iano nai nia, si maṉa na kera thauwanida ka sui, afa boṉi eri na tha Jihova God e thauwai nia sui naa fanua ne i iano ma thalo lo ki,

⁵ Me gwalua ’ai eki sui bana i masuu si maṉa ne a’i si ni u bana i theegano, ma kaala lolo eki sui boo si maṉa ne a’i si tae u mai: uria na tha Jihova God e a’i si falea u mai dani na kai arunia fanua, me a’i ta wane si to bana sa kai ’ilia theegano.

⁶ Ma sui si datha ka tae iaa faisia fanua ne i iano, ka faagwinaa maana theegano ka sui boo.

⁷ Ma tha Jihova God e thauwai nia wane ana gegeona theegano, ka ufu sulia ro malee gwalusu nia ki asi maṉo ni marukia; ma wane eri ka bii maruki.

⁸ Ma tha Jihova God ka fasia si do lea ki la ra i Itena na ka lio uria si kula ana tae lana thato; kula eri naa, nia ka bii alua wane eri ne thauwai nia iei.

⁹ Ma i theegano eri tha Jihova God ka faatagwasua ’ai eki sui bana riki lana ka lea ma ani lana ka lea lau boo; ’ai ana marukia lau boo ne ni initoona ra eri, ma ’ai ana thaitoomana lana lea la ma taa la.

¹⁰ Ma tee kafo baita ne ita mai i Itena ka lae uria ra eri fasi kai faagwinaa; sui lalae kau faisia si kula eri, ka mataṉa ana fai tabii kafo.

¹¹ Thatana do totonao kera alaṉia ana Pisono: nia neri na ka lae kakalia fanua i Hafila sui boo, si kula si golu ni iei;

¹² Ma si golu i fanua eri ka lea bana; deliama ma fau onikisi ni lau boo iei.

¹³ Ma thatana ruana tabii kafo kera alaṉia ana Gihono: nia neri na ka lae kakalia fanua i Ithiobia sui boo.

¹⁴ Ma thatana ula tabii kafo kera alaṉia ana Idikela: nia neri na ka lae uria Asiria asi kula na ka lio uria tae lana thato. Ma faina tabii kafo na ṉa Iufetisi.

¹⁵ Ma tha Jihova God e talaia wane eri, ka alua i la ra i Itena fasi kai ’ilia theegano ma kai betaa.

¹⁶ Ma tha Jihova God kai ṉata fifi isana wane eri, ka una eri, Ana ’ai eki sui bana na i la ra, oki tona ania bamua foana:

¹⁷ Ma sui ’ai eri ana thaitoomana lana lea la ma taa la, osi ania foana: uria na afa boṉi toto oki ania foana, e mamana oki maelia.

¹⁸ Ma tha Jihova God ka una eri, E a’i si lea ifana wane nei kai to tee nia; nau kwai thauwai nia ta Do ni kwaiadomi la ifana na kai farana.

¹⁹ Na ana theegano tha Jihova God ka thauwai nia do maruki eki sui boo i masuu ki mai, ma thaaro eki sui boo i mamaṉaa; ka talaida mai satha Adam fasi kai roṉotoona thatada na wane eri kai alaṉida ania: ma atona bana ta thata na tha Adam e alaṉia ata do ana do maruki eki sui bana, thatana bonaa neri.

²⁰ Ma tha Adam e falea thatada ifana katele eki sui boo, ma ifana thaaro na i mamaṉaa ki, ma ifana do maruki eki sui bana i masuu ki mai; una ena mena, e a’i kesi fulatoona ta do ni kwaiadomi la ne farana tha Adam.

²¹ Ma tha Jihova God e faabiṉaa tha Adam ka biṉa liu: sui nia ka lafua tee si ogi babarana, ka fono fafia si kula eri ana seena ne toto iei, ka mafo lau bana;

²² Ma si ogi babarana na tha Jihova God e lafua faisia seena wane eri, nia ka thauwai nia ka lioe kini, sui ka tolea mai sana wane eri.

²³ Ma tha Adam ka una eri, Si ogi ana ogiku nai nia, ma seena na si kula ana seeku: keki alaṉi nia ana Kini, uria na kera lafua faisia seena ṉa wane.

²⁴ Uria si kula eri, wane kai akwasia maka nia ma thainana, kai ofu bia kwaina: ma keroa tee see imole naa.

²⁵ Ma wane eri ma kwaina kero talu badaroa, me a’i kesi seenoni.