GENESIS 19 - Ṉa Alaofua Falu 1923 1949

¹ Ma ro angel eki keko fula i Sodoma i thaulafi; ma tha Lota ka ono bana isana maethakaa i Sodoma: me rikidaroa naa, tha Lota ka tatae, ka toda ani keroa; ma nia ka gwau toli, maana ka lio uria theegano;

² Ma nia ka una eri, Rikia fasi si maṉa eri, ro Arai nau ki ae, nau ku thathamia sa moki akele mai uri maafera wane ni ra kamaroa nei, moki to amaroa sulia fa rodo nei laulau, moki taua ’a’aemaroa, ma toto fanua ka dani, moki bii tae, moki lae amaroa. Ma keko sorea, E a’i; meki to bamarea sulia tala nei maasia fanua kai dani.

³ Ma nia ka suwanidaroa faamau, sui keko akele mai isana, keko kotho i maafera nia; ma nia ka thasi faṉa ifadaroa, ka biia ta si berede e a’i ta lefena iei, ma keko rere adaroa.

⁴ Ma sui si maṉa na kesi teo u, wane eki na i la toaa susu eri, wane i Sodoma ki neri, kera lae mai, keka to kalia maafera eri, toa na kera arai ki naa ma wane bii baita ki, toa eki sui bana faisia toaa susu eri, ta si kula si e’i boo;

⁵ Ma keka ’ai thatana tha Lota, keka soree isana, Nifei nia ro wane ba ki na kero kotho kau isamu afa rodo nei? talai keroa mai, fasi miki adedaroa.

⁶ Ma tha Lota ka kotho mai i maa isada, ka fono iburiana,

⁷ Ma nia ka una eri, Doora kera, nau ku thathamia sa musi ilia si do taa faamau unei.

⁸ Rikia fasi, akua ro thari ki na kesi toowane u; ku thathamia sa muki alamatai nau kwai toledaroa mai isamulua, muki ilia iadaroa si ade la na muki rikia ka lea: ro wane nei ki molo, musi ilia ta si do iadaroa; sulaania uria si kula eri kero kotho ifara nuuna duuna maafera nau nei.

⁹ Ma keka sorea, Takwe kau. Ma keka una eri, Wane nei e lae mai fasi kai to ni laea, ma manatana sa nia wane ni kotu: si maṉa eri miki faare taa iamu asi ade la na kai taa ka tatha asi ade la sa mika ilia iadaroa. Ma keka beresia wane eri na tha Lota, ma karaṉia sa keka ogea baba ana olofolo eri.

¹⁰ Ma sui ro wane eki keko tekwasia abadaroa, keko abaa mai tha Lota isadaroa uri la maafera, keko fono faisida.

¹¹ Ma keko faarorodoaa maana wane eki na kera ni buira olofolo eri, toa na kesi inoto ma toa inoto ki lau boo: adedea keka tona ulafu, kesi thamatoona naa olofolo.

¹² Ma ro wane eki keko soree isatha Lota, Tei toa lau ni bada isamu i kunei, mado? fuṉao oe, ma kaluwane oe ki, ma thari oe ki, ma ta si ta bana asi do oe ki no rikia i la toaa susu nei, oko ṉalia mai faisia kula nei.

¹³ Uria ni kamarea meki faafunuia kula nei, sulaania ’ai lade tae ka baita inaofana maana tha Jihova; ma tha Jihova e arasi kamarea mai meki faafunuia.

¹⁴ Ma tha Lota ka lae kau, ka ṉata isana fuṉao nia ki, na kera tolea thari nia ki, ka una eri, Tatae, muki lae amulua ithara faisia si kula nei; uria na tha Jihova kai faafunuia toaa susu nei. Ma sui e ’uria wane ni malaoe la isana fuṉao nia ki.

¹⁵ Ma lalae fanua ka dani, ro angel eki keko suwai nia tha Lota sa kai lakwasia kau, keko una eri, Tatae, tolea kau kwaimu ma ro thari oe na keko ni isamu; ada oko sui i la abula lana toaa susu nei asi do na kera lufia.

¹⁶ Ma si maṉa na kai totoo u bana, ro wane eki keko rau i abana, i abana kwaina lau boo, ma i abana ro thari nia ki; uria na tha Jihova ka tatakomi nia: ma keko talai nia kau, keko alua kai to mai thara faisia toaa susu eri.

¹⁷ Ma lalae mai, maṉa kero talaida mai ithara e sui, angel eri ka sorea, Oko thaka kau fasi oko maruki; osi lio buri, ma osi to i la fanua dedema sui boo; oko thaka uri la tolo lo, ada oko sui.

¹⁸ Ma tha Lota ka una eri isadaroa, I‐i‐e! si do ka a’i neri Arai nau ae:

¹⁹ Rikia fasi si maṉa eri, wane ni ra oe nei e fulatoona si lio ni kwaiofei la i maamu, mo adea tatakomia oe nei ka baita, no fatai nia isaku ana faamaruki laku la; ma ni nau ku dora ania thaka la uri la tolo lo, ada ta si do taa ka fulatooku, ada kwa mae:

²⁰ Rikia fasi si maṉa eri, toaa susu nei na ni karaṉi mai fasi kwa thaka uria, ma toaa eri e faekwa: ku thathamia oki alamatai nau kwai thaka kau uria (do faekwa neri, mado?), ma nau kwai maruki.

²¹ Ma nia ka soree isana, Lio fasi, nau ku ade naa sulia bae lamu asi kula eri lau boo, na nau kwasi ogea toaa susu nei no ṉata mai suusia taa la faisia na ba.

²² Lakwasia kau, oko thaka uria; uria ni nau ku dora ania ili lana ta si do asi maṉa nosi fula u isana. Mania kera alaṉia thatana toaa susu eri ana Soa.

²³ Thato e tae naa fafia fanua ne i iano asi maṉa na tha Lota ka fula mai Soa.

²⁴ Tha Jihova ka bii kikiraa fafia Sodoma ma Gomora tei si do thasune makwa fifi ma si era ita mai atha Jihova i thalo lo;

²⁵ Ma nia ka thau labatai nia ro toaa susu eki, ma fanua dedema eri ni sui bana, ma toa eki sui boo ana toaa susu eki, ma si do eki sui bana ne tagwasu i theegano.

²⁶ Ma kwaina ka thafee lae iburiana, ka lio buri, ma kini eri ka lioe gwa fau asi solu.

²⁷ Ma tha Aberahamo ka tatae i la uusuwadia u boo, ka lae uria si kula ne takwe iei na ba inaofatha Jihova:

²⁸ Ma nia ka lio kau uria i Sodoma ma Gomora, ma uria fanua dedema eri sui bana, ka bubuṉia, ma, lio fasi, thasuna fanua eri ka tae ’uria thasuna era baita ka tatha.

²⁹ Ma lalae mai, si maṉa ba na tha God e faafunuia toaa susu eki ana fanua dedema eri, tha God ka onotoona tha Aberahamo, ka arasia tha Lota ka lae faisia imaalutana si do eki na kera thau labatania neri, si maṉa ba ne thau labatania toaa susu eki na tha Lota e toto mai iei.

³⁰ Ma tha Lota ka tae nana faisia i Soa, ka to bana i la tolo, ma ro thari nia ki bi nia; uria ne mau ana to la i Soa: ma nia ka to bana i lala tee maufi, ni nia ma ro thari nia ki.

³¹ Ma thari ulunao eri ka soree isana thasina, Maka koro e arai naa, me a’i ta wane si to i fanua na i iano fasi kai ofu bi koro sulia biranana toa na fanua na i iano sui bana:

³² Koro kau, koki faakuufia maka koro kai kuu waene, ma ni koro koki teo isana, fasi koki alua wela, maka koro kai kwalafia.

³³ Ma kero faakuufia maka keroa ka kuu waene afa rodo eri: ma ulunao eri ka kotho mai, ka teo isana maka nia; ma wane eri ka dora ana teo lana mai, ma tae lana kau.

³⁴ Ma lalae mai, afa boṉi iburiana, ulunao eri ka soree isana thasina, Rikia fasi, afa rodo ba ne sui na kau, nau ku teo isana maka nau: koro faakuufia ka kuu waene lau afa rodo nei, ma ni oe oki kotho isana, oki, teo bi nia, fasi koki alua wela, maka koro kai kwalafia.

³⁵ Ma kero faakuufia maka keroa ka kuu waene afa rodo eri lau boo: ma ai buri ka tae, ka teo isana; ma wane eri ka dora ana teo lana mai ma tae lana kau.

³⁶ Mania ro thari tha Lota ki kero iana sulia maka keroa.

³⁷ Ma ulunao eri ka tharea kaluwane nia, ka alania thatana atha Moaba: wane eri na maka totonao Moabaete ki, na keka to bada ka fula itaraena.

³⁸ Ma ai buri eri lau boo ka tharea kaluwane nia, ka alania thatana atha Benami: wane eri na maka totonao kwalafaa tha Amani na keka to bade ka fula itaraena.