GENESIS 16 - Ṉa Alaofua Falu 1923 1949

¹ Ma ni Serai, kwaina tha Aberamo, e a’i si thare‐wela ifana: ma ana tee thari ni ra, na thari i Ijifi, thatana ni Hega.

² Ma ni Serai ka soree isatha Aberamo, Rikia fasi, tha Jihova e suusi nau faisia thare‐wela la; ku thathamia oki ofu bia thari ni ra nau, nai nia; mado e a’i kwai welaa suli nia. Ma tha Aberamo ka roo sulia ṉata lana ni Serai.

³ Ma ni Serai, kwaina tha Aberamo, ka tolea mai ni Hega na thari ni ra nia eri, na thari i Ijifi, buriana na tha Aberamo e to sulia tee tafulu fa ṉali i la fanua i Kenana, ka falea ifana kwaina na tha Aberamo, kini nia bonaa neri.

⁴ Ma nia ka ofu bia ni Hega, ma kini eri ka iana: ma kini eri ka riki nia ne iana naa, ka lio uria gwaulii ei nia, ka faare faekwa ania.

⁵ Ma ni Serai ka soree isatha Aberamo, Taa la kai to fafi oe sulia abula lana ne taa uri nau: nau ku falea naa thari ni ra nau iamu, moro teo ofu na ba; ma lalae ka thaitoomana ne iana naa, kini nei ka lio uri nau, ka faare faekwa iaku: tha Jihova na kai ṉata oolo i maalutakaroa.

⁶ Ma tha Aberamo ka soree sani Serai, Rikia fasi, kini ni ra oe ka ni abamu; oko ilia iana si do no rikia ka lea. Ma si maṉa ni Serai e faare taa iana, kini eri ka thaka faisia maana.

⁷ Ma angel tha Jihova ka fulatoona i ninimana tee ruka‐mauri la fanua kwasi, karaṉia ruka‐mauri ni sula tale ne lae uri Sa.

⁸ Ma nia ka una eri, Hega ae, kini ni ra ni Serai, si kula ifei no lae mai faisia? mo thathamii lae urifei? Ma kini eri ka sorea, Nau ku thaka mai faisia maana gwaulii ei nau, na ni Serai.

⁹ Ma angel tha Jihova ka soree isana, Oli kau isana gwaulii ei oe, ma oki roo suli nia ifara abana.

¹⁰ Ma angel tha Jihova ka una eri isana, Nau kwai adea kwalafaa oe ki keki oro faamau ka lae alaa, fasi kesi thaitoomana teemai lada, uria na keki eteta ka dora.

¹¹ Ma angel tha Jihova ka una eri isana, Rikia fasi, oko iana si maṉa eri, ma toto oki tharea kaluwane oe, ma oki alaṉia thatana atha Isimela; uria na tha Jihova e roṉoa naa taa la ne thauṉi oe nai nia.

¹² Ma wela nei, wane kwasi; abana kai to ni firu la bia wane eki sui bana, ma abana wane eki sui bana kai to ni firu la bi nia; ma nia kai to bana inaofana ina lana kera sui boo.

¹³ Ma kini eri ka alaṉia thatana tha Jihova, ne ṉata bi nia neri, ana God no riki nau: uria ne una eri, Ni nau lau boo ku lio i kunei buriani nia ne riki nau, mado?

¹⁴ Mania kera alaṉia thatana malaui kafo eri ana Bia‐lahai‐roi; rikia fasi, kai to bana imaalutana Kedesi ma Birete.

¹⁵ Ma ni Hega ka tharea kaluwane ifatha Aberamo: ma tha Aberamo ka alaṉia thatana kaluwane nia na ni Hega e tharea, atha Isimela.

¹⁶ Ma kwalu tafulu fa ṉali ma ono fa ṉali e sui atha Aberamo asi maṉa ba na ni Hega e tharea tha Isimela ifatha Aberamo.