GENESIS 14 - Ṉa Alaofua Falu 1923 1949

¹ Ma lalae mai afa boṉi eki ana to lana tha Arafela ṉa kiṉa i Saena, ma tha Arioka ṉa kiṉa i Ilasa, ma tha Kitoleoma ṉa kiṉa i Ilama, ma tha Taetalo ṉa kiṉa ana tei kulee toa ki;

² Kiṉa eki keka thafalia firua bia tha Bira ṉa kiṉa i Sodoma, ma tha Bisa ṉa kiṉa i Gomora, ma tha Saenafo ṉa kiṉa i Atama, ma tha Semiba ṉa kiṉa i Seboimu, ma ṉa kiṉa i Bila, i Soa neri.

³ Kiṉa fu ki sui bana keka kania kwaiadomi la i la kurua i Sitimu, na asi ne asila faamau neri.

⁴ Sulia tee tafulu fa ṉali ma ro fa ṉali kera roo sulia tha Kitoleoma, sui ana taṉafula ma ula fa ṉali keka thafalii ade faisia bae lana.

⁵ Ma lalae ana taṉafula ma faina fa ṉali tha Kitoleoma ka lae mai, bia kiṉa eki na kera ado bi nia, ka thauṉia Rifaimu ki i Asateroto Kanaimu, ma Susimu ki i Hamu, ma Imimu ki i Sefa Kiriateimu,

⁶ Ma Horaete ki isana gwa tolo kera i Sia, lalae ka fula i Elebarana, si kula na ni karaṉia fanua kwasi.

⁷ Ma kera oli nada, keka fula i Anamisibata, i Ketesi neri, ma kera thau labatania fanua Amalekaete ki ni sui bana, ma Amoraete ki lau boo na kera to bada i Hasesotama.

⁸ Ma kiṉa eri i Sodoma ka lae mai bia kiṉa i Gomora, ma kiṉa i Atama, ma kiṉa i Seboimu, ma kiṉa i Bila (i Soa neri); ma keka thafalii firu bia toa fu ki i la kurua eri i Sitimu;

⁹ Bia tha Kitoleoma neri ṉa kiṉa i Ilama, ma tha Taetalo ṉa kiṉa ana tei kulee toa ki, ma tha Arafela ṉa kiṉa i Saena, ma tha Arioka ṉa kiṉa i Ilasa; fai kiṉa fu keka firu bia lima kiṉa lo.

¹⁰ Ma i la kurua eri i Sitimu malaui ta oro ki ni iei; ma kiṉa eri i Sodoma ma kiṉa i Gomora keka thaka nada, keka asi kera iano i la malau eki; ma oretana toa eki keka thaka uria gwa tolo lo.

¹¹ Ma maalimae eki kera ṉalia ogogonia kera ni sui bana faisia i Sodoma ma i Gomora, ma do ni faṉa la kera sui boo, sui keka lae nada.

¹² Ma kera ṉalia tha Lota, kaluwane doorana tha Aberamo, ne toto i Sodoma, ma ogogonia nia ki, keka lae nada fafia.

¹³ Ma tee nonii wane ne thaka ka lae mai, ka faaroṉoa tha Aberamo ṉa Hibaru asi ade la eki, uria ni nia kai to bana i fanua dedema tha Mamari ṉa Amoraete, doorana tha Asekolo ma doorana tha Ena: ma toa eki kera ado bia tha Aberamo.

¹⁴ Ma tha Aberamo e roṉoa naa maalimae e laua kaluwane doorana, nia ka bii tatha inaona omea nia ne to’oa firu la isada, na kera kwalafida sui i maafera nia, ulu talenee, wane ma tee akwala ma kwalu wane, ka tari buriada lalae ka fula i Dana.

¹⁵ Ma nia ka alu nia bia wane ni ra nia ki keka to ro figule wane iada afa rodo, ka thauṉida, ka tari buriada uri Hoba, fanua ibali aba mauli i Damasikasi.

¹⁶ Ma nia ka oli fafia ogogonia eki sui bana, ka oli lau boo fafia kaluwane doorana na tha Lota, ma ogogonia nia ki, ma kini eki lau boo, ma toa eki.

¹⁷ Ma kiṉa eri i Sodoma ka lae mai isana ne oli na mai buriana ne thauṉia tha Kitoleoma ma kiṉa eki na kera ado bi nia, ka toda ani nia isana kurua eri i Safe, gwa kurua kiṉa eri neri.

¹⁸ Ma tha Melakisideke, kiṉa i Seleme mai, ka nalia mai ta si berede ma ta si waene: ma nia ṉa wane ni foa tha God ne Inoto ka Tatha.

¹⁹ Ma wane eri ka alua lea la fafi nia, ka una eri, Lea la kai to fafia tha Aberamo, do ita mai atha God ne Inoto ka Tatha, na do nia ki u boo na thalo lo ma fanua na i iano:

²⁰ Ma soreleaa kai to ifatha God ne Inoto ka Tatha, ne falea maalimae oe ki i abamu. Ma tha Aberamo ka falea taṉafula si do ki sui bana ifana.

²¹ Ma kiṉa eri i Sodoma ka soree isatha Aberamo, Falea mai imole nei ki iaku, ma oko ṉalia ogogonia nei ki ifamu italaamu.

²² Ma tha Aberamo ka soree isana kiṉa eri i Sodoma, Nau ku tafoa naa abaku, ku alaṉai atha Jihova, ṉa God ne Inoto ka Tatha, na do nia ki u boo na thalo lo ma fanua na i iano,

²³ Kwa sorea e a’i dodoloa kwa ṉalia atona bana ta si do asi do oe ki, kasi aṉofa ni ta’i lana maku mena ka a’i, ma ta kasi do ni faaṉado lana butu ka a’i lau boo, ada oko una eri, Ni nau neri na ku falea si do eki ifatha Aberamo ka rikiido anidaki:

²⁴ Talitoona faṉa ba na wela wane nei ki kera ania naa, ma moriṉa wane eki na kera abetai nau na ba, tha Ana; ma tha Asekolo, ma tha Mamari; keki ṉalia ada moriṉa kera.