GENESIS 13 - Ṉa Alaofua Falu 1923 1949

¹ Ma tha Aberamo e lae kau faisia i Ijifi, ni nia, bia kwaina, ma si do nia ne rikidaki sui baṉa, ma tha Lota bi nia, uria fanua i mutana.

² Ma tha Aberamo ka rikii do faamau ana katele ki, ma asi silifa, ma asi golu.

³ Ma nia ka liliu ana faisia fanua eri i mutana, lalae ka fula i Bethele, isana si kula na biui‐maku nia e toto iei inao mai, imaalutana Bethele ma Ai;

⁴ Isana si kula ana fulii era ni foa la eri, ne thauwai nia iei inao mai: ma kula eri naa, tha Aberamo ka bii ’ai thatana tha Jihova.

⁵ Ma tha Lota lau boo, ne abetai nia tha Aberamo, ana feree sifi, ma aini buloka ki, ma biui‐maku ki.

⁶ Ma fanua eri e a’i si faradaroa fasi kekoi to ofu iei: uria na si do na kero rikidaki e oro ka tatha, e adea ka afetai sa kekoi to ofu.

⁷ Ma firu la ka tae mai imaalutana toa ni fono toi la kakalia katele tha Aberamo ki ma toa ni fono toi la kakalia katele tha Lota ki: ma Kenanaete ki ma Berisaete ki kera to bada i fanua eri asi maṉa eri.

⁸ Ma tha Aberamo ka una eri satha Lota, Ada firu la ka to imaalutakaroa, ma imaalutana toa nau ni fono toi la ki ma toa oe ni fono toi la ki; uria ni koro ro wane ana tee kwalafaa.

⁹ Fanua nei sui boo ni inaofamu, mado? nau ku thathamia oki lae kamua faisi nau: mado so filia ibali aba mauli, ni nau kwai lae uri bali aba aola: mado so filia ibali aba aola, ni nau kwai lae uri bali aba mauli.

¹⁰ Ma tha Lota ka tafoa maana, ka rikia fanua dedema eri sui bana i ninimana Jodana, na kafo oro ni iei ta si kula si e’i boo, si maṉa na tha Jihova e a’i si labatai nia u fanua i Sodoma ma fanua i Gomora, e ’uria ra tha Jihova, ’uria lau boo fanua i Ijifi, sula tale ne lae uri Soa

¹¹ Sui tha Lota ka filia fanua dedema eri sui bana i ninimana Jodana ifana italaana; ma tha Lota ka lae naa uri bali tae lana thato: ma keko lae eeta kwailiu.

¹² Tha Aberamo ka to bana i la fanua i Kenana, ma tha Lota ka to bana i la toaa susu eki la fanua dedema, ka kasia biui‐maku nia ka lio uri Sodoma.

¹³ Ma sui wane eki i Sodoma liode taa ma kera abula taa faamau inaofatha Jihova.

¹⁴ Ma tha Jihova ka soree isatha Aberamo buriana na tha Lota e lae eeta faisi nia, Tafoa fasi maamu si maṉa eri, oko lio kau faisia si kula noko ni mai iei neri, uria fanua i Notoa ma i Mutana, ma uri bali tae lana thato, ma ibali su lana:

¹⁵ Uria na fanua nei sui bana noko rikia nania nau kwai falea ifamu ma ifana kwalafamu toto si sui.

¹⁶ Ma ni nau kwai adea na kwalafamu keki ’uria gegeona theegano: mada sa ta wane ka thaitoomana teemai lana gegeona theegano, kai teemai nia lau boo kwalafamu.

¹⁷ Tatae, laefia fanua nei sulia tekwa lana ma rerebaa lana; uria ni nau kwai falea boo ifamu.

¹⁸ Sui tha Aberamo ka idua biui‐maku nia, ka lae mai, ka to bana i la fanua dedema i Mamari, na ni Hefirono; ma kula eri naa, ka bii thauwai nia fulii era ni foa la ifatha Jihova.