GENESIS 11 - Ṉa Alaofua Falu 1923 1949

¹ Ma toa na fanua ne i iano ni sui bana, ada tee ṉataa ne totoo, ma bae lada ne totoo.

² Ma lalae mai, si maṉa na kera liliu ada ibali tae lana thato, keka fulatoona si kula dedema i fanua i Saena; ma keka to naa iei.

³ Ma kera ṉata uri kera kwailiu, keka una eri, Kulu kau, kulu thauwai nia ana mamako tei do na kai ’uria gwa fau ki, kuki alua i la era fasi kai akofia do eki kai ṉilo. Ma do eki ana mamako e ’uria fau ki ifada, ma si ta ka talaa si do sa keki faaṉadoa ania.

⁴ Ma keka una eri, Kulu kau, kulu thauwai nia ta toaa susu ifakulua bia ta failaṉi duuna kai fane da iaa, kai suana thalo lo; kulu alua thatakulua ania fasi ka talo, ada keka foatata ani kulu fafia maana fanua na i iano sui boo.

⁵ Ma tha Jihova ka sifo mai fasi kai rikia toaa susu eri ma failani eri na kwalafaa imole ki keka thauwai nia.

⁶ Ma tha Jihova ka una eri, Rikia fasi, toa nei tee toa boo, ma ṉata lana toa eki sui bana ka totoo; ma kera thafalii ilia si ade la nei: ma si maṉa eri kesi lufia ta sii faisida, asi ade la eki na kera manatatoona sa keki ilia.

⁷ Kulu kau kulu sifo, kuki adea na ṉata lada kai eeta kwailiu, fasi tei toa iada keki dora ana maalutana ṉata lana tei toa lau.

⁸ Mania tha Jihova e foatata ani kera, keka liliu ada fafia maana fanua ne i iano sui boo: ma keka ekwa asi ra ana thauwai lana toaa susu eri.

⁹ Sulia si ade la eri kera alaṉia thatana toaa eri ana Bebelo; uria na i la toaa eri tha Jihova e adea na ṉata lana toa na fanua na i iano kai eeta kwailiu: ma faisia toaa susu eri tha Jihova e foatata ani kera keka liliu fafia maana fanua na i iano sui boo.

¹⁰ Si ade la ne ita mai atha Semo nai nia. Tha Semo e to sulia tee taleṉee fa ṉali; ma ro fa ṉali e sui buriana olo lana kafo eki fafia fanue, nia ka bii tharea tha Afakasata:

¹¹ Ma tha Semo ka to bana buriana ne tharea tha Afakasata sulia lima taleṉee fa ṉali, ma nia ka tharea tei kaluwane nia ki ma thari nia ki.

¹² Ma tha Afakasata e to sulia ulu tafulu fa ṉali ma lima fa ṉali, sui ka tharea tha Sala:

¹³ Ma tha Afakasata ka to bana buriana ne tharea tha Sala sulia fai taleṉee fa ṉali ma ulu fa ṉali, ma nia ka tharea tei kaluwane nia ki ma thari nia ki.

¹⁴ Ma tha Sala e to sulia ulu tafulu fa ṉali, sui ka tharea tha Iba:

¹⁵ Ma tha Sala ka to bana buriana ne tharea tha Iba sulia fafai taleṉee fa ṉali ma ulu fa ṉali, ma nia ka tharea tei kaluwane nia ki ma thari nia ki.

¹⁶ Ma tha Iba e to sulia ulu tafulu fa ṉali ma fai fa ṉali, sui ka tharea tha Pileke:

¹⁷ Ma tha Iba ka to bana buriana ne tharea tha Pileke sulia fai taleṉee fa ṉali ma ulu tafulu fa ṉali, ma nia ka tharea kaluwane nia ki ma thari nia ki.

¹⁸ Ma tha Pileke e to sulia ulu tafulu fa ṉali, sui ka tharea tha Riu:

¹⁹ Ma tha Pileke ka to bana buriana ne tharea tha Riu sulia ro taleṉee fa ṉali ma sikwa fa ṉali, ma nia ka tharea kaluwane nia ki ma thari nia ki.

²⁰ Ma tha Riu e to sulia ulu tafulu fa ṉali ma ro fa ṉali, sui ka tharea tha Siraka:

²¹ Ma tha Riu ka to bana buriana ne tharea tha Siraka sulia ro taleṉee fa ṉali ma fiu fa ṉali, ma nia ka tharea kaluwane nia ki ma thari nia ki.

²² Ma tha Siraka e to sulia ulu tafulu fa ṉali, sui ka tharea tha Neho:

²³ Ma tha Siraka ka to bana buriana ne tharea tha Neho sulia ro taleṉee fa ṉali, ma nia ka tharea kaluwane nia ki ma thari nia ki.

²⁴ Ma tha Neho e to sulia ro tafulu fa ṉali ma sikwa fa ṉali, sui ka tharea tha Tira:

²⁵ Ma tha Neho ka to bana buriana ne tharea tha Tira sulia tee taleṉee fa ṉali ma tee tafulu fa ṉali ma sikwa fa ṉali, ma nia ka tharea kaluwane nia ki ma thari nia ki.

²⁶ Ma tha Tira e to sulia fiu tafulu fa ṉali, sui ka tharea tha Aberamo, ma tha Neho, ma tha Harana.

²⁷ Si ade la ne ita mai atha Tira nai nia. Tha Tira e tharea tha Aberamo, ma tha Neho, ma tha Harana; ma tha Harana e tharea tha Lota.

²⁸ Ma si maṉa na maka nia na tha Tira e to u bana, tha Harana e mae i la fanua ne futa mai iei, i A neri, fanua toa i Kaladia.

²⁹ Ma tha Aberamo ma tha Neho kero tole kini: thatana kwaina tha Aberamo ni Serai; ma thatana kwaina tha Neho ni Milika na thari tha Harana; ma wane eri maka ni Milika ma maka ni Isika.

³⁰ Ma sui ni Serai e abaato; e a’i ana ta wela.

³¹ Ma tha Tira ka talaia kaluwane nia na tha Aberamo, ma kokoo nia na tha Lota, kaluwane tha Harana na kaluwane nia, ma ni Serai na kini‐fuṉao nia, kwaina kaluwane nia na tha Aberamo; ma kera lae ofu kau faisia i A, na fanua toa i Kaladia, sa keki lae uria fanua i Kenana; ma lalae kera fula i Harana, keka to iei.

³² Ma fa boṉi tha Tira ki ro taleṉee fa ṉali ma lima fa ṉali: sui tha Tira ka mae i Harana.