Galesia 6 - Ṉa Alaofua Falu 1923 1949

¹ Doora kera, mada sa kera fulatoona mena ta wane ana abula garo la, kamulua na toa tha Spirit ki, muki oli fafia wane una eri ana si lio ana abula marabibi la; si maṉa noki lio uri oe i talaamu, ada keka bae aliṉamu lau boo.

² Do kulua kamulua ki muki ṉali faisi kamulua kwailiu, ma asi ade la eri muki ade sulia ṉa lo tha Christ.

³ Sulaania mada sa ta wane manatana na nia baita, si maṉa ne tonee do, wane eri ka tala lole nia i talaana.

⁴ Wane kai ilitoona si ra nia i talaana, ma sui kai faabaita nia fafi nia, ma fafia wane nia ka ai.

⁵ Sulaania wane kai tala ṉalia si do kulua nia.

⁶ Wane na kera tooa si do ki isana asi baea eri kai adomia wane ne tooa si do eki isana asi do lea ki sui bana.

⁷ Musi lolole kamulua; tha God e ai si alamatania keki malaoe nia: uria atona bana ta si do wane kai fasia, do eri boo nia kai kasia.

⁸ Sulaania wane na kai fasia si do ki ifana seena i talaana kai kasia ana seena si do na kai fufuraa; wane eri molo na kai fasia si do ki ifatha Spirit kai kasia atha Spirit marukia tatha.

⁹ Ma kusi seseedadaola ana ili lana si do ne lea: uria na asi maṉa na fuliṉana kuki kasia unii do ki, mada sa kusi feda faisia.

¹⁰ Mania, asi maṉa ne to u ifakulua, kuki ilia si do ne lea uria wane ki sui boo, ma uria toa eki u boo ana baree wela eri asi do na kulu fitoona.

¹¹ Muki rikia fasi leta baita eki na nau ku keda kau isamulua ana abaku i talaaku.

¹² Toa eki na kera thathamii fatai nia si do ne lea ana seena imole, keka suuwai kamulua muki alamatania keka kwai kakali ani kamu lua; talitoona bana fasi kesi ilamatai kera uria ’ai rarafolo tha Christ.

¹³ Sulaania toa eki mena na kera kwai kakali anida e ai kesi roo sulia ṉa lo; sui kera thathamii kwai kakali ani kamulua, fasi keki faabaita kera ana seemulua.

¹⁴ Ma ni nau ku lalakwa faamau ana faabaita laku la fafia ta si do eeta lau, talitoona bana ’ai rarafolo na Lord kulu tha Jesus Christ, si do na kera fota fafia si do ana fanua nei iano ki ania faisi nau, ma ni nau faisia si do ana fanua nei iano ki.

¹⁵ Sulaania atha Christ Jesus kwai kakali la e ai si kwaiadomi, ma to lana toa kesi kwai kakali anida ka ai lau boo, talitoona boo thauwai falu la.

¹⁶ Ma toa eki sui boo na keki abula sulia si ṉata eri, enenoa kai to fafi kera, ma tatakomia, ma fafia Isirela tha God.

¹⁷ Ita asi maṉa eri kai oli alaa ta wane si sosore nau: uria seeku e karua asi do na kai fatai nia Lord nau tha Jesus.

¹⁸ Doora kera, lea la na Lord kulu tha Jesus Christ, kai to bia spirit kamulua. Emeni.