Galesia 5 - Ṉa Alaofua Falu 1923 1949

¹ Tha Christ e alu lea ani kulu kuka tonee to: mania muki takwe ṉado, ma musi katu lau ana ioke na kai suuwai kamulua muki tonee ra.

² Rikia fasi, ni nau tha Polo ku soree isamulua, mada sa keki kwai kakali ani kamulua, tha Christ sa ka adomi kamulua ana ta si do e ai.

³ Iu, nau ku faamamanea lau si do nau ku thaitoomana isana atona bana ta wane na keki kwai kakali ani nia, na wane eri keki suuwai nia kai ilia si do eki sui bana na ṉa lo e sorea.

⁴ Kera alu eeta ani kamulua faisia tha Christ, kamulua sui boo na mulu thathamia keki ala fafia kokoto la kamulua sulia ṉa lo; mulu asi kamulua faisia lea la eri.

⁵ Sulaania atha Spirit kulu maakwalia ana fitooa si do eri na kulu manatatoo ṉado uria na ṉa kokoto la.

⁶ Uria atha Jesus Christ kwai kakali la e ai si kwaiadomi, ma mada sa kesi kwai kakali ata wane do eri ka ai si kwaiadomi lau boo; talitoona bana fitooa na kai ra ana liothau la.

⁷ Mulu fifita ni lea la; ni tei ne suusi kamulua faisia fasi musi ade sulia mamana la eri?

⁸ Ade la sulia kwaifamanataia eri, do e ai si ita mai ani nia na kai aili kamulua mai.

⁹ Ta kasi lefena faekwa kai dolana sui bana kumu eri.

¹⁰ Ku fitoomulua ana ṉa Lord, na manatamulua sa ka eeta faisia manataku e ai: ma ni tei bana na ka sore kamulua kai ṉalia kwae lana.

¹¹ Ma ni nau, doora kera, mada sa ku ṉata sulia kwai kakali la ka fula asi maṉa eri, uria ta na kera tona ilamatai nau u bada neri? mada sa ku ade una eri, kera faaaia ṉa ’ai rarafolo, si do ba na kera taofai kera ania.

¹² Nau ku thathamia sa toa eki na kera adea muka to ana ro si lio keki tala kwaimusi kera faisi kamulua.

¹³ Sulaania ni kamulua, doora kera, kera aili kamulua mai fasi muki tonee to; sui to lea la eri do ifana seena imole fasi kai inoto e ai, muki ra kwailiu ifamulua ana liothau la.

¹⁴ Uria kera ade sulia ṉa lo eri laulau ana tee si baea boo, nai nia; Oki liothau ana wane oe ’uria oki liothau ani oe i talaamu.

¹⁵ Ma mada sa muki ale kamulua kwailiu ma muki dudumeme ani kamulua, muka fia ada muka faaai kamulua kwailiu.

¹⁶ Ma nau ku sorea, Muki abula atha Spirit, sui sa muka ade sulia si thathami la taa seena imole e ai.

¹⁷ Sulaania seena imole ka thathamia si do na ka firu bia tha Spirit, ma tha Spirit ka thathamia si do na ka firu bia seena imole; uria na ro do eki kesi totoo; fasi kesi alamatai kamulua muki ilia si do na muka thathamia.

¹⁸ Ma mada sa tha Spirit ka talai kamulua, e ai musi roo sulia ṉa lo.

¹⁹ Ma si do na seena imole kai ilia kai to fatai, nia nania, oe la toa na kera oe fafia kwaida, oe la, taa la, daidei la,

²⁰ Foa la ana god eeta ki, ra la ana sukwaia spirit taa ki, rakeaṉoṉoa, firu la, uga la ki, rakeiria, tafulu si lio, oli susuu la, kwaifamanataia eeta ki,

²¹ Gwaudila la, thauwanea, si bula la na kafo bubula kai buloa imole, malasaole la, bia si do una eki: ma asi do eki kwai faaroṉo kamulua totonao, ’uria lau boo ku fafaaroṉo kamulua na ba, toa na keki ilia si do una eki toto kesi fulatoona tooa tha God.

²² Ma foee do atha Spirit na ṉa liothau la, seethathala la, enenoa, si lio ni doanita tatha la, adelea, abula thathaore la, abula lea la, abula mamana la,

²³ Abula marabibi la, inoto la ana seemulua: e ai ta lo si to ana lufi lana si do una eki.

²⁴ Ma toa eki atha Christ kera fota fafia seena imole ana ’ai rarafolo ana si lio ma si thathami la taa nia ki.

²⁵ Mada sa kulu maruki atha Spirit, kuki lae ofu lau boo atha Spirit ana lae lakulua na kai totoo.

²⁶ Kusi uuunao kulu, kusi faaome kulu kwailiu, kusi uugali kulu kwailiu.