Galesia 4 - Ṉa Alaofua Falu 1923 1949

¹ Ma nau ku sorea sulia wane eri na kai ana asi do maka nia ki, si maṉa nia wela u, kai ana mena asi do ki sui, e ai si eeta ana ta si do faisia wane ni ra;

² Ma ka roo sulia toa ni nanai wela ki ma toa na kera takofalea asi do ki, maakwalia si maṉa na maka nia e gwalua.

³ Alafana ni kulu lau boo, si maṉa kulu wela ki u, kera suuwai kulu kuka roo sulia si do totonao ki ana fanua nei iano:

⁴ Ma sui buriana na si maṉa nia eri e fula bonaa, tha God e bii arasia mai Kaluwane nia, ne futa ana wela kini, futa sulia ṉa lo,

⁵ Fasi kai tae faisia toa eki na kera roo sulia ṉa lo, fasi keki falea si kula eri iakulua na kulu kaluwane nia ki.

⁶ Ma uria na mulu kaluwane nia ki tha God e arasia mai Spirit Kaluwane nia uria ruruumulua na ka ’ai una eri, Aba, Maka ae.

⁷ Adedea oe wane ni ra e ai naa, oe kaluwane; ma mada so kaluwane, toto oki ana asi do ki uria tha God atha Christ.

⁸ Ma asi maṉa ba, uria na musi thaitoomana tha God, kera suuwai kamulua mulu tona ra ifana toa eki na god mamana ki e ai:

⁹ Ma si maṉa eri na mulu fulatoona thaitoomana lana tha God, mado na tha God e thaitoomamulua, uria ta na mulu akele buri uria si do totonao ba ne ai si sukwai ki ma ka fakoka, si do na mulu thathamia keki suuwai kamulua ania muki roo lau sulia?

¹⁰ Mula onotoona fa boṉi ki, ma madami ki, ma si maṉa ki, ma fa ṉali ki.

¹¹ Nau ku mau uri kamulua, ada mado e ai ku tona ulafu ifamulua.

¹² Ku ṉata kwaitakoi, ku soree isamulua, doora kera, muki ’uri nau, uria ni nau ku ’uri kamulua. E ai musi abula taa uri nau:

¹³ Mulu thaitoomana na sulaania si do ne faafeda seeku na ba ku ṉata sulia si faaroṉoa lea isamulua totonao:

¹⁴ Ma si do eri i seeku na kera ilitooku ania e ai musi fare faekwa ania, bia musi lalakwatania; ma mulu thathagoni nau ’uria so ku angel tha God, ’uria so ku Christ Jesus.

¹⁵ Sui nifenia faabaita la ba na mulu fafaabaita kamulua ania? uria nau ku faamamanea si do nau ku thaitoomana suli kamulua, na, mada sa do imole e talaana ili lana neri, mulu thathamia lafu lana mena maamulua fasi muka falea ifaku.

¹⁶ Sui si maṉa eri ku maalimae iamulua, uria na nau ku sorea si do ne mamana isamulua?

¹⁷ Kera seemabe ana rofe la buriamulua ana seemabea ne lea e ai; iu, kera thathamii fono faisi kamulua muki to i maa fasi ni kamulua muki rofe buriada.

¹⁸ Ma si ne lea neri, na keka rofe buriku uria si do ne lea ta si maṉa si ei, ma talitoona bana asi maṉa nau ku to bi kamulua e ai.

¹⁹ Wela faekwa nau ki, na nau ku to lau ana fiwela la uri kamulua maakwalia si maṉa na keki thauwai nia tha Christ ani kamulua,

²⁰ Iu, manataku sa ku thathamia kwai to bi kamulua si maṉa eri, kwa ṉata ana ṉata la ne eeta faisia si do eri; sulaania ku dora fono bona akua iamulua.

²¹ Faaroṉo nau mai, ni kamulua na mulu thathamii roo sulia ṉa lo, musi roṉoa ṉa lo?

²² Uria na kera keda, na tha Aberahamo e alua ro kaluwane ki, tee wela iadaroa kini ni ra e tharea, ma tee wela kini inoto.

²³ Ma wane kini ni ra e tharea e futa sulia seena imole; wane eri molo ana kini inoto e futa sulia alaṉaia eri.

²⁴ Ma si do eki tarifula ni ania: sulaania ro kini eki na ṉa ro alaofua ki; tee do ne ita mai ana gwa tolo i Sainai, ne tharea wela na kera suuwanida keka tona ra, ni Hega neri.

²⁵ Ma kini eri ni Hega na ṉa gwa tolo i Sainai mai Arebia, ma ka thau ana Jerusalema ne to bana si maṉa eri: sulaania kera suuwai nia ka tona ra bia wela nia ki.

²⁶ Ma Jerusalema eri mai ia e inoto, ma thainakulua neri.

²⁷ Uria na kera keda, Oki seethathala, aba ato nosi tharewela; Oki tatarakoko, ai nosi to ana fiwela la: Uria na baree wela ai eri ne mutaia iana kera oro ka tatha ana kini eri ne ila ai.

²⁸ Ma ni kulu, doora kera, uria lau boo tha Aisaka, kulu baree wela ana alaṉaia eri.

²⁹ Ma talafana asi maṉa nai nao wane ne futa sulia seena imole e tona ilamatai nia wane eri ne futa sulia tha Spirit, alafana lau boo si maṉa eri.

³⁰ Ma ta si ta na kekeda la abu eri e sorea? Muki suia kau kini ni ra bia kaluwane nia: sulaania kaluwane kini ni ra sa ka fulatoona lea la bia kaluwane kini inoto eri e ai.

³¹ Mania, doora kera, ni kulu baree wela kini ni ra e ai, ana kini inoto eri.