Galesia 2 - Ṉa Alaofua Falu 1923 1949

¹ Sui buriana tee tafulu fa ṉali ma fai fa ṉali ku tae lau uri Jerusalema bia tha Banabasi, ma ku talaia tha Taetasi lau boo bi nau.

² Ma nau ku tae sulia si do na tha God e fatai nia isaku; ma ku faaroṉoda ana maalutana si faaroṉoa lea na nau ku ṉata sulia isana Jenetaele ki, ku faaroṉoa toa inoto ki talifili kera, ada mado e ai fita la nau nai maṉa eri ka funu, ma fita la totonao nau ni lau boo.

³ Ma tha Taetasi mena ne lae bi nau, na wane i Girisi, kesi suuwai nia keki kwai kali nia:

⁴ Mili ṉata sulia si do eri sulia baree wai doorana na kesi mamana ki na kera talai thaufuni mai anida, na kera lae thaufuni mai fasi keki uraia to lakulua na kulu tonee to ania atha Christ Jesus, fasi keki suuwai kulu kuki roo sulida:

⁵ Ma toa eki e ai dodoloa mili roo sulida sulia tee si kadee maṉa mena; fasi mamana la eri na ni asi faaroṉoa lea kai to ṉado isamulua.

⁶ Ma ana wane eki na kera alaṉida ana wane inoto ki (ku doanita keka inoto lau mena ada, mado ka ai lau mena ada: tha God e ai si rikia wane ki ’uria sa kesi totoo) — wane inoto eki kesi faaroṉo nau ana ta si do ne falu:

⁷ E ai, si maṉa na kera rikia na kera takofalea si faaroṉoa lea iaku ifana toa na kesi kwai kalida, ’uria lau boo atha Pita ifana toa eri na kera kwai kalida

⁸ (Uria ni nia ne ra i ruruuna tha Pita kai aposela ifana toa ana kwai kakali la e ra lau boo i ruruuku uria Jenetaele ki);

⁹ Ma si maṉa na kera thaitoomana lea la eri na kera falea ifaku, tha Jemesi ma tha Kifasi, ma tha Jone, na kera alaṉida ana betana biu ki, kera rau i aba aola nau ma tha Banabasi ana kwaimani lea la, fasi meki lae isana Jenetaele ki, ma ni kera isana toa eri ana kwai kakali la;

¹⁰ Tee si do boo, kera thathamia meki onotoona toa na kesi rikii do; si do eri boo na ni nau lau boo ku seemabe uria ili lana.

¹¹ Ma si maṉa na tha Pita e fula i Adioko, ku ṉata lalaa isana, ku sore nia, uria ne ilia si do kera thaitoomana e taa.

¹² Uria si maṉa na tei toa na kera toto isatha Jemesi kesi fula u mai, nia faṉa ana bia Jenetaele ki: ma buriana na keri fula mai, e oli ma ka to eeta faisida, uria ne mau ana toa eki ana kwai kakali la.

¹³ Ma Ju ba ki kera lole lau boo bi nia; adedea keka tole garo atha Banabasi mena ana olodola la kera.

¹⁴ Ma si maṉa nau ku rikia na kesi abula kokoto sulia mamana la eri na ni asi faaroṉoa lea, ku soree isatha Pita inaofana toa eki sui boo, Mada sa ni oe, no Ju, o ade sulia ade lana Jenetaele ki, ma sulia ade lana Ju ki ka ai, uria ta no suuwai nia Jenetaele ki keki ade sulia ade lana Ju ki?

¹⁵ Ni kamilia na mili Ju ki ana seena imole, ma toa ana abula taa la ana Jenetaele ki e ai,

¹⁶ Una ena mena, uria na mili thaitoomana kesi ala fafia kokoto lana ta wane maana si ra ana ṉa lo ki, talitoona bana ana fitoona lana tha Jesus Christ, ni kamilia mena mili fitoona tha Jesus Christ, fasi keki ala fafia kokoto la kamilia ana fitoona lana tha Christ, ma asi ra ana ṉa lo ki ka ai: sulaania asi ra eki ana ṉa lo kesi ala fafia kokoto la ta imole.

¹⁷ Ma mada sa, si maṉa na mili thathamia keki ala fafia kokoto la kamilia atha Christ, keka fulatoomilia lau boo na kamilia toa ana abula taa la, tha Christ wane ni ra ana abula taa la? Si do ka ai neri.

¹⁸ Sulaania mada sa ku thauwai lau asi do eki na nau ku lalabatania, ku faamamanea na nau ku adede garo asi kula eri.

¹⁹ Sulaania ana ṉa lo ku mae naa faisia ṉa lo, fasi kwai maruki ifatha God.

²⁰ Kera fota fafi nau sui naa ana ’ai rarafolo bia tha Christ; una ena mena, ku maruki bakua; sui ni nau e ai lau, tha Christ ana ne maruki i seeku; ma marukia eri na nau ku to ania i seena imole ku to ania ana fitooa, na ni ana Kaluwane tha God, ne liothau iaku, ma ka alamatai nia uri nau.

²¹ Nau kwasi faaaia lea la tha God: sulaania mada sa kera ala fafia kokoto la ta imole ana ṉa lo, tha Christ e maruṉee mae.