Filifae 4 - Ṉa Alaofua Falu 1923 1949

¹ Mania, doora liliothaua nau ki na nau ku thathami kamulua faamau, do na nau ku seethathala ani kamulua ma do ni eregwau la nau, muki takwe ṉado una eri ana ṉa Lord, toa liliothaua nau ki.

² Ku soree isani Iuodia, ma ku soree isani Sidiki, moki to ana tee si lio ana ṉa Lord.

³ Ma nau ku ṉata kwaitakoi isamu lau boo, wane mamana no ra ofu bi nau, fasi oki adomia ro kini eki, uria na kera ululafu ana ra la bi nau asi faaroṉoa lea, bia tha Kelemeni lau boo, ma tei toa lau na kera ra bi nau, na thatada ni la buka ana marukia.

⁴ Muki seethathala ṉado ana ṉa Lord: kwai sorea si lau, Muki seethathala.

⁵ Abula thathaore la kata si mulua kai to fatai isana wane ki sui boo. Ṉa Lord ni karaṉi mai.

⁶ I la ruruumulua si ototo fufuli uria atona bana ta si do; ma asi do ki sui bana ana foa la ma ana ṉata fifi la isana bia si sore lea la muki fatai nia si do na muki ganidaki isatha God.

⁷ Ma enenoa tha God, ne baita ka tatha asi do na manatana imole ka thaitoomana maalutana, kai fono toi kakalia ruruumulua ma kakalia si manatai la kamulua ki atha Christ Jesus.

⁸ Si do iisi, doora kera, si do ki sui bana ne mamana, si do ki sui bana ne teiṉei, si do ki sui bana ne kokoto, si do ki sui bana ne thathaulia, si do ki sui bana ne lea, si do ki sui bana ana ṉata lea la; mada sa ta si do ne oolo e to bana, mado ta si do na kera taṉoa, muki manatatoona si do eki.

⁹ Si do ba ki na nau ku tooa isamulua, na mulu ṉalia, na mulu roṉoa, ma mulu rikia ani nau, si do eki muki ilia: ma God ana enenoa kai to bi kamulua.

¹⁰ Ma nau ku seethathala faamau ana ṉa Lord, uria na buriana ne tau naa mulu faasukwaia lau si manata la na mulu manatatooku ania; sulaania mulu mamanatatooku mamana boo, ma sui mulu dora asi kula na muka fatai nia ania.

¹¹ Uria na ku to ana rofe la na nau kwa ṉata e ai: sulaania ni nau kera tooa sui naa isaku, na atona bana ta to la na nau ku to ania, kwai seeeno ania.

¹² Ku thaitoomana kwai to kelawanea, ma ku thaitoomana kwai rikii do: ta si kula si ei, asi do ki sui kera tooa abula laku isaku, kwai abusu ma kwai thaofa, kwai rikii do ma kwai to ana rofe la.

¹³ Ku talaana ili lana si do ki sui bana atha Christ na ka faasukwai nau mai.

¹⁴ Una ena mena, mulu abula lea asi kula eri, na mulu kwaimani lea bi nau ana adomi laku la ana taa la na nau ku to ania.

¹⁵ Ma ni kamulua, toa nai Filifae, mulu thaitoomana, na ana thafali lana si faaroṉoa lea, si maṉa na nau ku lalae faisia Masedonia na ba, e ai ta figua lau si toto kwaimani bi nau fafia kekeda la sulia fale la ma ṉali la, ma talifili kamulua boo;

¹⁶ Sulaania i Thesalonika mena mulu kwaiarasi ro si maṉa ana rofe la nau.

¹⁷ Uria na nau ku rofe uria si do na muka tona falea e ai; sui nau ku rofe boo uria si foee do na kai oro alaa na keki keda sulia ifamulua.

¹⁸ Ma akua si do ki sui bana, ma nau ku rikii do: ku abusu naa, uria na nau ku ṉalia i abana tha Epaforodaetasi si do ba ki ne ita mai ani kamulua, do makwa lea, ma do ni foa la na keki ala fafia, na kai faalea tha God.

¹⁹ Ma God nau kai falea si do na kai talaana si do ki sui bana na muki rofea, sulaania do oro ne rikidaki ana inotoa atha Christ Jesus.

²⁰ Ma keki fare inoto ana God kulu na ṉa Maka kulu toto si sui. Emeni.

²¹ Muki ṉata isana toa abu eki sui boo atha Christ Jesus ’uria sa ni nau ku ṉata. Baree wai doorana eki na ni isaku kera thathamia kwai ṉata isamulua ’uria sa ni kera keki ṉata.

²² Toa abu eki sui boo kera thathamia kwai ṉata isamulua ’uria sa ni kera keki ṉata, ma toa nai biu tha Sisa kera thathamia ka tatha.

²³ Lea la tha Lord Jesus Christ kai to bi kamulua sui boo. Emeni.