Filifae 3 - Ṉa Alaofua Falu 1923 1949

¹ Si do iisi, doora kera, muki seethathala ana ṉa Lord. Ku keda kau si do eki boo isamulua, si do ni nau e ai kwasi lalakwee ilia, ma si do fasi ni kamulua muki to lea neri.

² Muki fia koito eki, muki fia wane eki na kera abula taa, muki fia kwaimusi lana tai si kula ana seemulua:

³ Uria ni kulu toa ana kwai kakali la, na kulu faabaita tha God atha Spirit, ma kulu seethathala atha Christ Jesus, me ai kusi fitoona seena imole:

⁴ Boro sa ni nau i talaaku akua ta si do na kera alamatai nau kwa faabaita nau ania i seena imole mena: mada sa ta wane lau manatana sa nia kai fitoona seena imole, ni nau ka tatha:

⁵ Wane na kera kwai kali nau ana kwaula fa boṉi, ana kwalafa tha Isirela, ana kulee toa tha Benijamini, ku Hibaru i maalutana Hibaru eki; sulia ṉa lo, ku Farisi;

⁶ Sulia seemabea, ku tona ilamatai nia figua eri; sulia kokoto la na ni ana ṉa lo, ku dodoloa.

⁷ Ma sui si do na nau ku ririkii do ania, si do eki manataku e sorea ne ilia na ku toto ana rofe la uria tha Christ.

⁸ Iu, me mamana manataku e sorea na si do ki sui bana e ilia na ku toto ana rofe la sulaania thaitoomana lana tha Christ Jesus na Lord nau e lelea ka tatha: Wane na ku faaaana si do ki sui bana inunufana, ma ku manatatoona na ka ’uria si do na kera naṉa ania i la taerau, fasi kwai toda tha Christ,

⁹ Ma fasi keki fulatooku ani nia, fafia kokoto la nau i talaaku na ni ana ṉa lo e ai, fafia kokoto la ne lae mai ana fitoona lana tha Christ, kokoto la ne ita mai atha God ana fitooa neri:

¹⁰ Fasi kwa thaitoomana ni nia, ma ṉa sukwaia tatae lana, ma kwa to bi nia ana taa la nia ki, ma kwa mae ana mae la nia;

¹¹ Fasi mado e ai kwai fulatoona ṉa tatae la faisia toa mae ki.

¹² Nau e ai kwasi ṉalia naa si maṉa eri, me ai kesi faasukwai teefau ani nau si maṉa eri: ku fita fofoa, fasi mado e ai kwai fulatoona si do eri na tha Christ Jesus e fulatooku uria.

¹³ Doora kera, manataku sa nau ku fulatoona naa si maṉa eri e ai: tee si do eri kwai ilia, kwai liodora asi do eki ne ni nai buriaku, ma kwai tekwasia abaku uria do eki na ni inaoku,

¹⁴ Si maṉa na kwai fita fofoa uria susui lana uria kwaiara ana aili la na tha God e aili kulu ia ania atha Christ Jesus.

¹⁵ Mania ni kulu, ni tei iakulua ne manata naa, manatakulua kai una eri: ma mada sa ana ta si do manatamulua ka eeta, si do eri mena tha God kai fatai nia isamulua:

¹⁶ Tee si do boo, si kula na kulu fulatoona naa, si kula na kuki abula sulia neri, ma si do na kuki onotoona.

¹⁷ Doora kera, muki abula ofu ’uria abula la na muka rikia ani nau, ma muki lio uria toa na kera abula talafana abula la dodoloa eri na mulu rikia ani kamilia.

¹⁸ Uria na wane oro ki kera to bada, na nau ku fafaaroṉo kamulua anida asi maṉa oro ki bana, ma kwai faaroṉo kamulua anida si maṉa eri ana aṉi la ni mena, na kera maalimae ana ’ai rarafolo tha Christ ki:

¹⁹ Toa na susui lada na keki faaaana maṉoda, na god kera na ṉa rakee imole, ma do ni faabaita la kera ni asi do na ka faaseenonida, na keki onotoona ṉado si do ana fanua nei iano ki.

²⁰ Uria na fanua kulu ni thalo; ma ita mai i fanua eri lau boo kulu maasia Wane ni Kwaifaamaruki, tha Lord Jesus Christ:

²¹ Na kai taala seedo eri ana thafee to faekwa lakulua, kai lioe seedo ana inotoa nia, sulia sukwaia na nia sukwai ania ma kai talaana alu lana si do ki sui bana kai roo suli nia.