Filifae 2 - Ṉa Alaofua Falu 1923 1949

¹ Mania mada sa ta si lio ni faainamaruki lana imole ni atha Christ, mado ta si lio ana faalea lana manatana imole ana liothau la, mado ta kwaimani lea la atha Spirit, mado ta ruruui imole ne lea ma si lio ni tatakomi la,

² Muki ilia na seethathala la nau kai mamana boo, si maṉa na muki to asi lio eri, amulua tee liothau la eri boo, muki to ana tee si manata la, ana tee si lio;

³ Musi ilia ta si do ana firu la mado ana faabaita lamulua la i talaamulua, asi lio ni abula kelawanea la, kamulua sui, ta wane u boo i talaana ma ta wane u boo i talaana, manatana kai sorea na doorana e lea ka tatha ani nia;

⁴ Ta wane iamulua si onotoona si do nia ki talitoona, kai onotoona lau boo si do tei toa lau.

⁵ Si manata la eri boo kai to ani kamulua, ne toto lau boo atha Christ Jesus:

⁶ Nia ne to sulia seena tha God, sui manatana sa do nia kai rau ania na kai totoo bia tha God e ai,

⁷ Me tanusia inotoa nia, e tooni ana seena wane ni ra, me to sulia nuna imole ki;

⁸ Ma si maṉa na kera fulatoona sulia nuna imole, e abula seseka, e roo sulia ṉa maea, iu, mae la ana ’ai rarafolo ni mena.

⁹ Mania tha God lau boo e faainoto nia faamau, me falea thata eri ifana ne baita ka tatha ana thata ki sui bana;

¹⁰ Fasi ana thatana tha Jesus kera sui keki boururu, toa nai thalo ma toa na fanua nei iano ma toa ni fara fanua nei iano,

¹¹ Ma fasi meana toa eki sui bana kai faamamanea tha Jesus Christ na nia Lord, ana inotoa tha God na Maka.

¹² Mania, toa liliothaua nau, ’uria lau boo na mulu adede ṉado sulia si do ba ki, ana talitoona si kada na nau ku toto isamulua e ai, si maṉa eri na nau kwasi ni mena isamulua muki ilia ka suka ni tatha, muki fa’ara marukia kamulua i talaamulua ana mau la ma leleba la;

¹³ Sulaania tha God ana ne ra ani kamulua muka thathamii ra ma muka ra lau boo, uria si do ni nia e thathamia.

¹⁴ Muki ilia si do ki sui boo uubulu taa la ki ma oli susuua ki ka ai faisia;

¹⁵ Fasi muki dodoloa ma seemulua kai eno, baree wela tha God ki ne ai ta si lio garo si ni ani kamulua i maalutana unii wane na kilu kekeo ma kiku ade garo, unii wane na kera riki kamulua i maalutada mala laafa ki i fanua nei iano,

¹⁶ Na muki rau lalaa asi baea ana marukia; fasi nau kwai seethathala afa boṉi tha Christ, uria ni nau e ai kwasi tona fifita ma kwasi tona ululafu.

¹⁷ Iu, ma mada sa keki kiki nau ’uria waene fafia do ni foa la kamulua ma ra ana fitooa kamulua, nau kwai seethathala, ma kwai seethathala ofu bi kamulua sui:

¹⁸ Ma alafana lau boo ni kamulua muki seethathala, ma muki seethathala ofu bi nau.

¹⁹ Ma nau ku manatatoo ṉado atha Lord Jesus na nau kwai mala arasia kau tha Timothiasi isamulua, fasi kai lea lau boo iaku, si maṉa nau kwai thaitoomana sulia to lamulua.

²⁰ Sulaania e ai akua ta wane na lione totoo bia lioku, na kai tala oga nia mamana boo uria to lamulua.

²¹ Uria ni kera sui kera rofe uria si do kera ki i talaada, si do tha Jesus Christ ki e ai.

²² Ma mulu ilitoona mamana lana wane eri, na, ’uria lau boo wela bia maka nia, e ra bi nau ana ra eri ifana si faaroṉoa lea.

²³ Mania wane eri ku manatatoo ṉado na nau kwai mala arasia kau, si maṉa na nau kwai thaitoomana si do na kai fulatooku:

²⁴ Ma nau ku fitoona ṉa Lord asi kula eri na ni nau kwai makee lae lau bokau isamulua.

²⁵ Manataku se ai si ei kwai arasia bokau tha Epaforodaetasi isamulua, dooraku ma wane na ka ra ofu bi nau ma ka firu ofu bi nau, ma wane na mulu arasia mai ne ra ifaku uri kamulua ana rofe la nau;

²⁶ Sulaania e thathami kamulua faamau sui, me taa faamau iana, uria na mulu roṉoa ne matai:

²⁷ Uria ne mamatai mamana boo karaṉia kai mai: ma sui tha God e tatakomi nia; ma talifili nia e ai, ni nau lau boo, fasi taa la nau ki si baita alaa.

²⁸ Mania ku aṉasi ka tatha uria arasi lana, fasi, lalae mulu riki nia lau, muki seethathala, ma liodila nau kai suka akwa.

²⁹ Mania muki thathagoni nia ana ṉa Lord ana seethathala la faamau; ma muki fare baita ana wane una eki:

³⁰ Sulaania fafia ra tha Christ nia karaṉia sa kai mae, ka lae karaṉia maea fasi ka faasukwaia si do na musi fulatoona u asi ra kamulua eri ifaku.