Filifae 1 - Ṉa Alaofua Falu 1923 1949

¹ Tha Polo ma tha Timothiasi, wane ni ra tha Christ Jesus ki, isana toa abu ki sui boo atha Christ Jesus nai Filifae, bia wane nanao ki ma wane ni ra ki:

² Lea la iamulua ma enenoa ita atha God na Maka kulu ma tha Lord Jesus Christ.

³ Ku sore lea ṉado ana God nau si maṉa na nau ku onotoomulua,

⁴ Ma ana foa la nau ki uri kamulua sui boo, ta si maṉa si ei, ku foa ana seethathala la,

⁵ Uria kwaiadomi la na mulu kwaiadomi ania asi faaroṉoa lea ita afa boṉi totonao ka fula asi mana eri;

⁶ Sulaania ku thaitoomana lea si do eri boo, na ni nia ne thafalia mai si ra lea ani kamulua kai faasuia kai mamana maakwalia fa boni tha Jesus Christ:

⁷ Ma si do kokoto neri na manataku kai una eri uri kamulua sui, uria na mulu to ana ruruuku, sulaania, ana kani la na kera kani nau ania, ma ana luu lana si do na kera alaṉia si faaroṉoa lea ania, ma ana faaṉado lana, kamulua sui boo mulu ṉalia lau boo ta si ana lea la na ni nau ku ṉalia.

⁸ Uria na tha God kai faamamanea si do nia thaitoomana suli nau, na nau ku thathami kamulua faamau sui boo ana ruruuna tha Jesus Christ.

⁹ Ma si do kwai foa uria nai nia, na liothau la kamulua kai baita alaa ana thaitoomana lana si do ki ma ana manata lea la faamau;

¹⁰ Fasi muki ala fafia si do ne lea ka tatha ki; fasi muki thathaulia ma dodoloa maakwalia fa boṉi tha Christ;

¹¹ Ma muki fuṉu asi foee do ana kokoto la, na kai fula mai atha Jesus Christ, ana inotoa tha God ma taṉo lana.

¹² Sui nau ku thathamia muki thaitoomana, doora kera, na si do be fulatooku e fula mai ana adomi lana si faaroṉoa lea kai sukwai alaa;

¹³ Adedea kani la na kera kani nau ania inunufatha Christ e to fatai isana omea ni sui na kera toi faisia wane inoto, ma isana toa eki sui boo;

¹⁴ Ma oroṉana baree wai doorana ana ṉa Lord, uria na fitooa kera e baita sulia kani la na kera kani nau ania, kera seeraa ka tatha fasi keka ṉata sulia bae lana tha God mau la e ai faisida.

¹⁵ Tei toa fetei kera ṉata sulia tha Christ ana uga la ma firu la; ma tei toa lau boo asi lio ne lea:

¹⁶ Toa loko kera fatai nia tha Christ asi lio ne taa, asi lio ne mamana e ai, manatada sa keki faataea taa la ifaku si maṉa na kera kani nau:

¹⁷ Ma toa fu kera ilia ana liothau la, uria na kera thaitoomana na kera alu nau fasi kwa tofe faisia si do taa na kera sorea sulia si faaroṉoa lea.

¹⁸ Ma ta ni ana? tee si do boo, na asi lio ki sui bana, ana lole la mado ana mamaṉa la, kera fatai nia tha Christ; ma uria si do eri ku seethathala, iu, ma nau kwai seethathala boo.

¹⁹ Uria nau ku thaitoomana do eri ṉa do ana marukia nau sulaania foa la kamulua ma sulaania fale la baita na keki falea ana Spirit tha Jesus Christ,

²⁰ Sulia si do eri na nau ku maakwalia ṉado ma kwai manatatoo ṉado uria, na kesi faaseenoni nau ana ta si do, ana seeraa la faamau, talafana ṉado, alafana lau boo si maṉa eri keki faabaita tha Christ ana seeku, ana marukia nau, mado ana mae laku.

²¹ Uria na manataku na marukia nau na ṉa Christ, ma mae laku do lea ka tatha.

²² Ma sui mada sa ku maruki i seena imole, do eri kai ṉalia mai si foee do ana ra nau kwai ulafu ania, sui e ai kwasi thaitoomana si do na nau kwai talisia.

²³ Ma nau ku dora ania i maalutana ro si do eki, uria nau ku thathamia kwai lae akua, kwai to isatha Christ; sulaania do lea faamau ka tatha neri:

²⁴ Una ena mena, to laku i seena imole e kwaiadomi ka tatha uri kamulua.

²⁵ Ma uria na nau ku thaitoomana lea si do eri, ku thaitoomana nau kwai to, ma nau kwai to bi kamulua sui boo, fasi muki sukwai alaa ma muki seethathala asi do eki na kulu fitoona;

²⁶ Fasi muki seethathala faamau atha Jesus Christ ani nau sulia fula laku lau kau isamulau.

²⁷ Tee si do boo, abula lamulua kai farana si faaroṉoa lea tha Christ: fasi, mada sa kwa fula kwa riki kamulua mado kwa to mai i thara faisi kamulua, kwai roṉoa to lamulua, na muki takwe ṉado ana tee spirit, ma ana tee si manata muki aṉasi ana ra ofu la ifana si do eki na kulu fitoona na si faaroṉoa lea;

²⁸ Ma maalimae ki e ai dodoloa keki faamau kamulua: si do na kai fatai nia si kula eri isada na kera faaaana maṉoda, ma do ita mai atha God, na kai fatai nia marukia kamulua;

²⁹ Sulaania kera falea si kula eri iamulua inunufatha Christ, talitoona na muki fitoona e ai, na muki to ana taa la lau boo inunufana:

³⁰ Uria na amulua firua eri boo na mulu rikia ani nau, ma mulu roṉoa ne ni ani nau si maṉa eri.