Faelimone 1 - Ṉa Alaofua Falu 1923 1949

¹ Polo, wane tha Jesus Christ na kera suusi nau i la lokafu, ma doorakulua na tha Timothi, isatha Faelimone, wane liliothaua kamarea na ka ra ofu bi kamarea,

² Ma isana waiwaena kamarea ni Afia, ma isatha Akipasi, wane na ka firu ofu bi kamarea, ma isana figua i maafera oe:

³ Lea la iamulua ma enenoa ita atha God na maka kulu ma tha Lord Jesus Christ.

⁴ Ku sore lea ana God nau, ma nau ku ṉata ṉado suli oe ana foa la nau ki,

⁵ Uria na nau ku roṉoa liothau la oe, ma fitooa eri na ni ruruumu uria tha Lord Jesus, ma uria toa abu eki sui boo;

⁶ Fasi kwaimani lea la eri ana fitooa oe kai ra sukwai ifatha Christ Jesus, uria na kera thaitoomana si do lea eki sui bana na ni ani oe.

⁷ Uria na mere seethathala faamau ma kera faainamaruki kamarea ana liothau la oe, sulaania kera adomia ruruuna toa abu eki ani oe keka to lea lau, doora.

⁸ Mania, ku seeraa famau mena atha Christ fasi kwa faaroṉo oe oki ilia si do ne faramu,

⁹ Una ena mena, uria liothau la ku ṉata kwaitakoi isamu, nau tha Polo, wane ku arai naa, ma wane tha Jesus Christ na kera suusi nau lau boo si maṉa eri la lokafu:

¹⁰ Ku ṉata kwaitakoi isamu uria wela nau, na nau ku kwalafia maṉa kera kani nau, tha Onesimasi neri,

¹¹ Wane ne ai si adomi oe dini, ma si maṉa eri nia wane na ka adomi oe ma ni nau:

¹² Na nau ku arasia kai oli kau isamu, mania oki thathagonia kau wane eri, ne ’uria ruruuku i talaaku:

¹³ Na nau ku thathamia sa ka to bi nau, fasi nia kai ra ifaku uri oe maṉa na kera kani nau fafia si faaroṉoa lea:

¹⁴ Sui si maṉa kwasi roṉoa manatamu ku lalakwee ilia ta si do; fasi abula lea lamu do kera suuwai oe ania e ai, liomu na kai ilia.

¹⁵ Sulaania nia e toto eeta faisi oe ta kasi maṉa seseka uria si kula eri too, fasi kai to isamu toto si sui;

¹⁶ Mala wane na kera suuwai nia kai tona ra e ai lau, e baita ka tatha ana wane una eri, mala doora liliothaua, na nau ku riki nia ka lea faamau, ma ni oe faamau ka tatha, dooramu i seena imole ma ana ṉa Lord lau boo.

¹⁷ Mania mada so alaṉi nau ana wane na ku ado bi oe, oki thathagoni nia ’uria sa ni nau i talaaku.

¹⁸ Mada se abula dodora iamu ana ta si do, mado e kokoto na nia kai oli fafia ta si asi do oe ki, gania ani nau;

¹⁹ Ni nau tha Polo ku keda si do eri ana abaku i talaaku, ni nau kwai oli fafia: fasi e ai kwasi soree isamu ne kokoto noki oli fafi oe i talaamu isaku lau boo.

²⁰ Iu, doora, oki adea kwai seethathala ana ṉa Lord: oki adomia ruruuku kwai to lea lau ana ṉa Lord.

²¹ Uria nau ku fitoomu noki ade sulia ṉata laku, ku kekeda kau isamu, sulaania nau ku thaitoomana noki ilia ka tatha mena asi do nau ku sorea.

²² Ma oki beta lau boo kula na nau kwai makafa to iei: uria nau ku manatatoo ṉado na sulaania foa la kamulua ki keki alamatai nau ifamulua.

²³ Tha Epafarasi, wane na kera suusi nia bi nau i la lokafu atha Christ Jesus, e thathamia kwai ṉata isamu ’uria sa ni nia kai ṉata;

²⁴ Tha Makasi, tha Arisitakasi, tha Dimasi, tha Lukasi wane ki na kera ra ofu bi nau.

²⁵ Lea la Lord kulu tha Jesus Christ kai to bia spirit kamulua. Emeni.