Efesasi 6 - Ṉa Alaofua Falu 1923 1949

¹ Kala wela, muki ade sulia ṉata lana maka kamiu ki ma thainamiu ki ana ṉa Lord; uria si do kokoto neri.

² Fare baita ana maka oe ma thainamu (si ṉata fifi totonao na alaṉaia ni bia neri),

³ Fasi kai lea iamu, ma oki to tau amua i fanua nei iano.

⁴ Ma ni kamulua, wane na mulu welaa ki, musi faaelua wela kamulua ki keki rakeiri: muki beta lea sulida ana faamanatai lada la ma ṉata la isada ana ṉa Lord.

⁵ Wane ni ra ki, muki ade sulia ṉata lana wane eki na kera inoto ani kamulua ana see imole, ana mau la ma leleba la, ana tee si lio i ruruumulua, si do eri ifatha Christ;

⁶ Ana si maṉa eri bana na keki rikia ra lamulua, sa muki ade mala toa na kera thathamia fafalea lana imole ki e ai; ma uria na kamulua toa ni ra tha Christ ki, liomulua na kai ilia si do na tha God e thathamia;

⁷ Muki thathamii ilia si ra eri, ’uria sa do ifana ṉa Lord, ma ifana imole ki e ai:

⁸ Sulaania mulu thaitoomana atona bana ta si do lea ta wane kai ilia, wane na kera suuwai nia kai tona ra, mado wane na kai tona to, do eri boo ṉa Lord kai duua ifana.

⁹ Ma ni kamulua, na mulu inoto iada, muki ade una eri lau boo uri kera, ma muki to faisia faamau lada: uria na mulu thaitoomana Wane Inoto kera na Wane Inoto kamulua lau boo ni mai thalo, ma ni nia e rikia imole ka totoo bana.

¹⁰ Si do iisi, doora kera, muki sukwai ana ṉa Lord, ma ana sukwai lana rigita la nia.

¹¹ Muki alua rauma tha God ki sui bana fafia seemulua, fasi muki talaana suusi lana manata la taa tha devil.

¹² Sulaania do ana mariko ma abu e ai na kulu kwaikwairaui bia, toa inoto eki molo, toa sukwai eki, toa gwauwai fafia si kada nei ana maerodo nei, omea spirit taa ki nai thalo.

¹³ Mania muki ṉalia rauma tha God ki sui bana, fasi muki sukwai ana suusi lada afa boṉi ana taa la, ma buriana na mulu ilia si do eki sui bana, ana takwe ṉado la.

¹⁴ Mania muki takwe, toa na mulu ali kamulua ana mamana la, ma mulu alua fafia maana ruruumulua do na kai suusia taa la faisia, na ṉa kokoto la,

¹⁵ Na mulu toonia aaemulua ana to thathai la asi faaroṉoa lea ana enenoa;

¹⁶ Ma muka ṉalia lau boo talo eri, na ṉa fitooa, si do na kai faasukwai kamulua muki faagwaria sua aako tha Taa ki sui bana.

¹⁷ Ma muka ṉalia do na kai suusia gwaumulua faisia taa la, na ṉa marukia, ma nini tha Spirit, bae lana tha God neri:

¹⁸ Ana foa la si sui ma ṉata fifi la ana foa la muki foa atha Spirit ta si mana si ei, ma muki lio asi do eri asi lio ni susuu tau la ma ana ṉata fifi la ana foa la uria toa abu eki sui boo,

¹⁹ Ma uri nau, fasi keki falea si ṉata iaku si maṉa nau kwai ifinia fokoku, kwai seeraa ana fatai lana si do ne toto thaufuni asi faaroṉoa lea,

²⁰ Na nau wane ni ṉaliṉata ania fafia nailii thalo nania; fasi nau kwai ṉata seeraa sulia, ’uria si ṉata ne kokoto ifaku.

²¹ Ma fasi ni kamulua lau boo muki thaitoomana to la na nau ku to ania, tha Tikikasi, doora liliothaua kulu eri ma wane ni ra mamana ana ṉa Lord, kai faaroṉo kamulua asi do ki sui bana:

²² Wane na nau ku arasia kau isamulua uria si do eri lau boo, fasi muka thaitoomana to lamilia, ma fasi kai faainamarukia ruruumulua.

²³ Enenoa ifana baree wai doorana eri, ma liothau la bia fitooa, ita atha God na Maka ma tha Lord Jesus Christ.

²⁴ Lea la kai to bia toa eki sui boo na kera liothau ana Lord kulu tha Jesus Christ asi lio ne ai si fufuraa. Emeni.