Efesasi 5 - Ṉa Alaofua Falu 1923 1949

¹ Mania muki ade ’uria ade lana tha God, mala wela liliothaua nia ki;

² Ma muki abula ana liothau la, talafana lau boo tha Christ e liothau ani kulu, me alamatai nia uri kulu, ana do na kera tona falea ma do ni foa la ne makwa lea ifatha God.

³ Ma oe la toa na kera oe fafia kwaida, ma oe la ni sui bana, mado thathami lana si do kera ki, boro sa ṉata la ni mena, kesi ṉata sulia i maalutamulua, sulia si do ne farana toa abu;

⁴ Mado si do faaseenoni, mado ṉata oewanea la, mado waela la sulia si do taa ki, si do ne ai si faramulua ki neri: muki ṉata asi sore lea la.

⁵ Sulaania mulu thaitoomana mamana si do eri nai nia, e ai ta wane ni oe la, mado wane taa, mado wane ne thathamia si do kera ki, wane ne foa ana god eeta neri, si fulatoona ta si do ana tooa tha Christ ma tha God.

⁶ Musi alamatania ta wane si lole kamulua asi baea ne fokoka: sulaania sulia si do eki rakeiria tha God kai fula fafia unii wane na kera ade faisia ṉata lana.

⁷ Mania musi ṉalia ta si asi do toa eki;

⁸ Sulaania inao mai mulu rorodoa, ma sui si maṉa eri kamulua lalaa la ana ṉa Lord: abula lamulua kai farana baree wela ṉa lalaa la

⁹ (Uria foana lalaa la eri ni ana abula lea la ni sui bana ma kokoto la ma mamana la),

¹⁰ Muki ilitoona mamana lana si do na ṉa Lord kai ala fafia;

¹¹ Ma musi kwaimani bia si ra eki ana maerodo ne ai si fuṉu ata foee do, muki sore kera fafia;

¹² Uria si do na kera ili thaufuni ania talitoona ṉata la mena sulia e faaseenoni.

¹³ Ma si maṉa na kera rikia si do ki sui bana e lea mado e ai, lalaa la eri kai fatai nia: uria si do na ka tala fatai nia si do ki sui bana na ṉa lalaa la.

¹⁴ Mania nia sorea, Oki tharai, wane no biṉa liu, ma oki tatae faisia toa mae ki, ma tha Christ kai laa fafi oe.

¹⁵ Mania muki seemabe ana lio la uria abula lamulua, musi abula mala toa oewanea ki, muki abula mala toa liomulua e too ki;

¹⁶ Muki duu i maana si maṉa totonao, sulaania fa boṉi nei ki e taa.

¹⁷ Mania musi oewanea, muki thaitoomana maalutana si do na tha God e thathamia.

¹⁸ Ma musi kuu faamau ana waene na kai bula kamulua, si do ana malasaole la neri, keki faafuṉu kamulua atha Spirit ni ana;

¹⁹ Muki ṉata kwailiu isamulua ana ṉu ki, ana ṉu ana taṉo la ki, ma ṉu tha Spirit ki; muki ṉu ma ruumulua kai taṉoa ṉa Lord;

²⁰ Si maṉa na muki sore lea ṉado talea tha God na Maka uria si do ki sui bana ana thatana Lord kulu tha Jesus Christ;

²¹ Ma muki roo kwailiu suli kamulua uria mau la na mulu mau atha God.

²² Ai ila ai ki muki roo sulia kwaimulua ki, ’uria sa muki roo sulia ṉa Lord.

²³ Sulaania gwauna ai ila ai na ṉa kwaina, ’uria lau boo gwauna ṉa figua na tha Christ, ma nia Wane ni Faamaruki lana see do eri.

²⁴ Mania talafana figua eri e roo sulia tha Christ, alafana lau boo ai ila ai ki keki roo sulia kwaida asi do ki sui bana.

²⁵ Toa ila wane ki, muki liothau ana kwaimulua, alafana tha Christ lau boo e liothau ana figua eri, me alamatai nia uria;

²⁶ Fasi kai faaabua, uria ne faafalua asi do ni sisiu la asi baea eri,

²⁷ Fasi kai fatai nia ṉa figua fani nia i talaana na do inoto, e ai si karua me ai si lukuta me ai ta si taa la una eri si to ania; kai abu ma kai dodoloa.

²⁸ Talafana lau boo e kokoto na toa ila wane ki keki liothau ana kwaida alafana ana seeda i talaada. Wane na kai liothau ana kwaina, ’uria kai liothau ani nia i talaana:

²⁹ Sulaania ta wane si lalakwatania u seena i talaana; ka tharea boo ma ka beta lea sulia, ’uria lau boo ade lana ṉa Lord uria ṉa figua;

³⁰ Sulaania kulu si do ki na ana seena, ana marikona ma ogina.

³¹ Sulia si kula eri wane kai akwasia maka nia ma thainana, ma kai to bonaa isana kwaina; ma keroa keko tee see imole naa.

³² Si do afetai ne toto thaufuni na kera fatai nia neri: nau ku ṉata sulia tha Christ ma ṉa figua.

³³ Una ena mena, kamulua sui, ta wane u boo i talaana, ma ta wane u boo i talaana, kai liothau ana kwaina ’uria lau boo e liothau ani nia i talaana; ma kini eri fetei kai mau ana kwaina.