Efesasi 4 - Ṉa Alaofua Falu 1923 1949

¹ Mania ni nau, wane ana ṉa Lord na kera suusi nau i la lokafu, ku ṉata kwaitakoi ku soree isamulua muki abula ana abula la ne farana aili la eri na kera aili kamulua mania,

² Ana abula seseka la faamau ma abula marabibi la, asi lio ni doanita tatha la, muki mamasoro kamulua kwailiu ana liothau la;

³ Muki seemabe fasi muki to ṉado ana tee si lio atha Spirit ana enenoa, si do na kai faaṉado kamulua muki too neri.

⁴ Tee see do boo, ma tee Spirit, ’uria lau boo kera aili kamulua mai ana tee si do na muki manatatoo ṉado uria sulia aili la eri;

⁵ Tee Lord, tee do na kulu fitoona, tee babataesi la,

⁶ Tee God na Maka kulu ni sui, ne tatha inaofakulua sui, ma ka ra ani kulu sui, ma ka to i ruruumulua sui boo.

⁷ Ma kulu sui, ta wane u boo i talaana ma ta wane u boo i talaana, kera falea lea la eri ifana sulia baita lana olotoo eri ne talaana si do eri na tha Christ e tona falea.

⁸ Mania e sorea, Si maṉa be tae lau uri ia, e talaia toa oro na omea e lauda. Me tona falea si do ki ifana wane ki.

⁹ (Ma si ṉata eri, E tae lau, ta na sa e soree e sifo lau boo uria si kula na ni fara fanua nei iano, mado?

¹⁰ Nia ne sifo, Wane eri lau boo ne tae uria si kula ni da fafia thalo lo ki sui, fasi kai faafuṉua si do ki sui bana.)

¹¹ Ma nia e falea tei aposela ki; ma tei porofeta; ma tei toa ana ṉata la sulia si faaroṉoa lea; ma tei toa ana toi la kalia sifi nia ki, ma toa ni kwaifamanatai ki;

¹² Uria faasukwai teefau la ana toa abu eki, uria ra la asi ra ifada, uria faatae lana seena tha Christ:

¹³ Maakwalia si maṉa ni kulu sui kuki fulatoona tee si lio ana fitooa, ma ana thaitoomana lana Kaluwane tha God, baita lakulua kai sui naa, kuki baita alafana olotoo na kera olotoona baita lana tha Christ ania:

¹⁴ Fasi ni kulu kusi wela faekwa lau, toa na atona bana ta thauthau ka isuda ka toto bana, ma thauthau eki na ṉa kwaifamanataia eeta ki ana kaura lana imole, do ni lole la, sulia manata taa lada, ana tole garo la iakulua;

¹⁵ Ma uria na kuka sorea si do ne mamana ana liothau la, kuki baita alaa asi do ki sui bana, kuki farana wane eri na gwaukulua, tha Christ neri;

¹⁶ Ma see do eri sui boo na kera thauwai lea ania ma kera ladoa ka rao uria si do na lado la eki sui boo ka falea, ta do boo si kula nia, ma ta do boo si kula nia, sulia ra lana ne talaana, kai tala adea see do eri kai baita alaa ani nia, ma kai tala tola alaa i talaana ana liothau la.

¹⁷ Mania si do eri ku sorea, ma ku faamamanea si do nau ku thaitoomana sulia ana ṉa Lord, Musi abubula lau ’uria abula lana Jenetaele ki, sulia manatada ne fakoka,

¹⁸ Uria na manatade rorodoa, ma keka lalakwatanida faisia marukia tha God uria lioda ne ai si thaitoomana si do ki, sulia ruruuda ne sadi;

¹⁹ Toa ne ai ta si do si oga kera naa, sui kera lukatai kera uria daidei la, fasi keka oe taa bia keka thathamia si do kera ki.

²⁰ Ma ni kamulua e ai musi ṉalia si do una eki atha Christ;

²¹ Mada sa mulu roṉoa ṉata lana, ma kera tooa si do ki isamulua ani nia, alafana mamana la na ni atha Jesus:

²² Ma do eki nai nia, mulu tanusia naa, sulia abula lamulua mai inao, wane nai nao, na kai fufuraa uria si thathami la taa ana kaura lana;

²³ Ma kera thauwai falu ana spirit nai manatamulua,

²⁴ Ma mulu tooni naa ana wane falu, na kera thauwai nia sulia tha God ana kokoto la ma si lio ne abu ana mamana la eri.

²⁵ Mania, uria na mulu tanusia lole la, muki ṉata mamana kwailiu isamulua: sulaania kulu si do ki na ana seekulua kwailiu.

²⁶ Muka rakeiri mena, musi abubula taa: musi alamatania thato kai su fafia rakeiria kamulua:

²⁷ Bia musi alamatania si kula na tha devil kai kotho mai iei.

²⁸ Wane ne bibili sa ka bili lau e ai: kai ulafu boo, kai ra ana abana asi do ne lea, fasi kai rikii do uria fale la ifana wane ne to ana rofe la.

²⁹ Musi alamatania si ṉata la taa si maṉo i ṉidumulua, si ṉata la ne lea molo ana faasukwai lana imole, si do na kai talaada, fasi kai falea lea la ana toa na keki roṉoa.

³⁰ Ma musi fafaaliodila Spirit Abu tha God, na kera faaṉado kamulua ani nia maakwalia fa boṉi eri ana tae la faisi kamulua.

³¹ Keki naṉa ania si lio i malau ki, ma rakeaṉoṉoa, ma rakeiria, ma ṉalu la, ma ṉata taa la seena imole, ka ai naa faisi kamulua, bia si lio taa ki sui bana:

³² Ma muki ade lea kwailiu iamulua, si lio kamulua ana mamasoro la, muki manata lube kamulua kwailiu, ’uria lau boo tha God e manata lube kamulua atha Christ.