Efesasi 3 - Ṉa Alaofua Falu 1923 1949

¹ Uria si kula eri ni nau tha Polo, wane tha Jesus Christ na kera suusi nau i la lokafu uri kamulua Jenetaele ki, —

² Mada sa mulu roṉoa lea lana tha God neri na kera takofale nau ania fasi kwai ra ania ifamulua;

³ Na kera fatai nia si do eri ne toto thaufuni isaku fasi kwa thaitoomana, ’uria aṉee si do ku keda dini na ba,

⁴ Ma ana teemai lana leta eri, muki thaitoomana nifana ade lana na nau ku thaitoomana filoa maalutama si do tha Christ ne toto thaufuni;

⁵ Na kesi faaroṉo ania ana wela wane ana unii wane nai nao ki, alafana si do na kera fatai nia si maṉa eri isana aposela abu nia ki ma porofeta ki atha Spirit;

⁶ Ma si do eri nai nia, Jenetaele ki keki fulatoona si do lea ki ofu bi kamilia, ma kera lau boo si do ki na ana seedo eri, ma keki ṉalia ofu bi kamilia ta si ana alaṉaia eri atha Christ sulia si faaroṉoa lea,

⁷ Na kera alu nau ṉa wane ni ra la ania, sulia lea lana tha God neri na kera tona falea iaku sulia ra lana sukwaia nia.

⁸ Ni nau, wane nai buri bonaa buriana wane nai buri ana toa abu eki sui bana, kera falea lea la eri iaku, kwai ṉata isana Jenetaele ki sulia si do lea tha Christ ki na kesi talaana rofe lana maalutana;

⁹ Ma kwai fatai nia isana wane ki sui bana si do na kera takofale nau ania ne toto thaufuni ita asi maṉa nai nao ki ka fula asi maṉa eri ni atha God ne thauwai nia si do ki sui bana atha Jesus Christ;

¹⁰ Fasi asi maṉa eri keki fatai nia liotooa tha God, ne manataia si do oro ka tatha, isana toa inoto ma toa sukwai nai thalo ki, keki thaitoomana sulia figua eri,

¹¹ Sulia si do manatana e thathamia ita asi maṉa nai nao ki ka toto si sui atha Christ Jesus na Lord kulu:

¹² Wane ne faaseeraa kulu ana idu karaṉi la, mau la ka ai faisi kulu, sulia fitooa na ni ani nia.

¹³ Mania nau ku soree isamulua musi fefeda sulia taa la eki na nau ku to ania uri kamulua, do na kai faabaita kamulua neri,

¹⁴ Uria si kula eri ku boururu isana ṉa Maka Lord kulu tha Jesus Christ,

¹⁵ Na kera alaṉia baree wela eki sui boo ana thatana, toa nai thalo ma toa nai fanua nei iano ni lau boo,

¹⁶ Fasi, sulia si do eki na nia kai rikii do ania uria faainoto lana, nia kai falea si kula eri ifamulua keki faasukwaia wane nai ruruumulua ana sukwaia ana Spirit nia;

¹⁷ Fasi tha Christ kai to i ruruumulua ana fitooa; adedea, na keka faaṉadoa lalimulua ana liothau la,

¹⁸ Muki sukwai uria thaitoomana lana bia toa abu eki sui boo rereba lana ma tekwa lana ma sifo lana ma tae lana

¹⁹ Liothau la tha Christ, muki thaitoomana si do eri ne baita ka tatha asi do imole e talaana thaitoomana lana, fasi keki faafuṉu kamulua muki fuṉu asi do ki sui na ni atha God.

²⁰ Sui nia ne talaana ili lana do baita faamau ka tatha asi do na kulu gania mado kuka manatatoona, sulia sukwaia eri ne ra ani kulu,

²¹ Keki fare inoto ani nia i la figua ma atha Christ Jesus ka fula ana unii wane na ni ki u toto si sui. Emeni.