Efesasi 2 - Ṉa Alaofua Falu 1923 1949

¹ Me faafuṉu kamulua lau boo ana marukia nia, si maṉa na mulu mae naa sulia ade garo lamulua ma abula taa la kamulua ki,

² Na mulu abula sulia dini mai inao sulia si maṉo eri na ni ana toa na fanua nei iano, suli nia ne inoto ana toa gwauwai eki i la mamatalea, spirit na ka ra si maṉa eri i lala unii wane na kera ade faisia si ṉata;

³ Toa ni kulu sui kulu toto lau boo bida dini mai inao ana si thathami la taa ana seekulua, kulu ilia si do na seena imole ma manatana e thathamia, si lio kulu na si lio unii wela na keki fulatoona rakeiria, ’uria lau boo toa ba sui:—

⁴ Ma tha God, uria tatakomia nia ne inoto, sulaania liothau la baita nia ne liothau ani kulu,

⁵ Si maṉa na kulu mae naa mena uria ade garo lakulua ki, e faamaruki kulu ofu bia tha Christ (ana lea la kera faamaruki kamulua),

⁶ Me tatae kulu ofu bi nia, e alu kulu kuka ono bi nia i thalo lo ki, atha Christ Jesus:

⁷ Fasi asi kada na ni ki u nia kai fatai nia lea la nia ne inoto asia naa ana ade lea la uri kulu atha Christ Jesus:

⁸ Sulaania ana lea la kera faamaruki kamulua uria fitooa; ma fitooa eri do ita mai ani kamulua e ai: si do na tha God e tona falea neri:

⁹ Do keka fulatoona asi ra ki e ai, fasi ta wane si faabaita nia fafia.

¹⁰ Uria ni kulu do nia e thauwai nia, ne thauwai kulu atha Christ Jesus maakwalia si ra lea ki, na tha God e thathaia totonao fasi kuki abula sulia.

¹¹ Mania muki onotoona si do eri, dini mai inao ni kamulua, Jenetaele ki sulia seena imole, na toa eki na kera alaṉida ana toa ana kwai kakalila, na kera kwai kakali ana seeda ana abee imole, kera alaṉi kamulua ana toa na kesi kwai kakali ani kamulua;

¹² Mulu toto eeta faisia tha Christ asi maṉa ba inao, toa Isirela kera lalakwatai kamulua, mulu toa eeta ki na kesi ṉata suli kamulua ana alaofua ba ki sulia alaṉaia eri, kamulua e ai amulua ta si do lea na muka manatatoo ṉado uria, ma tha God e ai faisi kamulua i fanua nei iano.

¹³ Ma si maṉa eri atha Christ Jesus ni kamulua na mulu ni da, kera talai kamulua muka idu karaṉi mai ana abuna tha Christ.

¹⁴ Sulaania nia na enenoa kulu, ne adea ro do eki ka ofu ana tee do, me ogea ogu initoo i maalutada,

¹⁵ Uria ne faaaia ana seena si do na kera firu fafia, na ṉa lo asi ṉata fifi na kera ṉata sukwai sulia; fasi ana ro si do eki nia kai thauwai nia tee wane ne falu, ma kai fofolo una eri;

¹⁶ Ma fasi kai adea ro si do eki keko kwaimani lau bia tha God ana tee see do uria ’ai rarafolo eri, uria ne thauṉia firu la eri ka mae ania:

¹⁷ Ma nia lae mai ka ṉata sulia enenoa isamulua na mulu ni da, ma sani kera na kera ni karaṉi:

¹⁸ Sulaania kulu sui ana tee Spirit kulu idu karaṉia ṉa Maka ani nia.

¹⁹ Mania kamulua wane ana fanua eeta ki ma wane kwaita ki e ai naa, muka tee kulee toa bia too abu eki, ma tee baree wela bia baree wela tha God,

²⁰ Uria na kera ofu kamulua fafia gwa fau totonao eki, aposela ba ki ma porofeta ba ki neri, ma tha Christ Jesus talani nia na gwa fau inoto i gwauna loko suua;

²¹ Ma biu eri sui boo, na kera lado lea ania, kai tae ani nia fasi kai biu baita abu tha God ana ṉa Lord;

²² Ma kera ofu kamulua lau boo ani nia kamulua na biu na tha God kai to iei atha Spirit.