Efesasi 1 - Ṉa Alaofua Falu 1923 1949

¹ Polo, aposela tha Jesus Christ sulia si do na tha God e thathamia, isana toa abu eki nai Efesasi, ma toa mamana eki atha Christ Jesus:

² Lea la iamulua ma enenoa ita mai atha God na Maka kulu ma tha Lord Jesus Christ.

³ Taṉo nia ne God na Lord kulu tha Jesus Christ ma Maka nia, ne alua lea la tha Spirit ka sui bana kai to fafi kulu asi do ṉa thalo ki atha Christ:

⁴ ’Uria lau boo e fili kulu ani nia si maṉa na kesi boa u fanua nei iano, fasi kuki abu ma kuki dodoloa inaofana ana liothau la:

⁵ Uria ne too kulu u boo totonao kuki fulatoona thathagoni lakulua la isana kuki kaluwane nia ki atha Jesus Christ, sulia si thathami la lea nia,

⁶ Ana taṉo lana inotoa lea la nia, ne ala fafi kulu ania ana Wane liliothaua nia:

⁷ Wane eri na kulu rikia tae la faisi kulu ni ani nia sulia ’abuna, na manata lube la ana abula garo lakulua ki, sulia inotoa lea la nia.

⁸ Ne adea ka oro uri kulu ana liotooa ni sui ma manata kali la,

⁹ Uria ne fatai nia si do ne toto thaufuni isakulua asi do nia thathamia, sulia si thathami la lea nia ne onotoona ani nia

¹⁰ Uria si ra ne takofale nia ania asi maṉa na kai kokoto ania, fasi kai ofua si do ki sui bana atha Christ, si do nai thalo ki, ma si do nai fanua nei iano; ani nia,

¹¹ Wane eri lau boo na mika inamaruki ani nia asi do miki fulatoona, uria na kera alu kamilia ania u mai inao sulia si do ni nia e thathamii ilia ne ilia si do ki sui bana sulia si do manatane thathamia;

¹² Fasi keka taṉoa inotoa nia uri kamilia, toa totolenao ki na mili manatatoo ṉado uria tha Christ:

¹³ Nia na ni kamulua lau boo, buriana na mulu roṉoa si baea ana mamana la eri, si faaroṉoa lea ana marukia kamulua, — nia na, si maṉa na mulu fitoona, kera faaṉado kamulua lau boo ani nia atha Spirit Abu ana alaṉaia eri,

¹⁴ Na thafali lana do lea eri na kuki fulatoona, fasi keki tae naa faisia si do kulu eri, ana taṉo lana inotoa nia.

¹⁵ Mania ni nau lau boo, buriana na nau ku roṉoa fitooa eri na mulu fitoona tha Lord Jesus, ma liothau la na mulu liothau ana toa abu eki sui boo,

¹⁶ Ku sore lea uri kamulua ta si maṉa si ei si maṉa ku ṉata suli kamulua ana foa la nau ki;

¹⁷ Fasi nia ne God na Lord kulu tha Jesus Christ, ṉa Maka ana inotoa, kai falea spirit ana manata lea la ifamulua ma riki lana si do nia kai fatai nia ana thaitoomana lana la;

¹⁸ Keki ifinia maana wane nai ruruumulua, fasi muki thaitoomana si do eri ne manatatoo ṉado uria si maṉa ne aili kulu mai, ma si do eki na nia kai rikii do ania uria faainoto lana la na nia kai fulatoona ana toa abu eki,

¹⁹ Ma sukwaia nia eri ne baita asia naa uri kulu na kulu fitoo, alafana si ra eri ana sukwaia inoto nia

²⁰ Ne ra ania atha Christ, si maṉa ne tataea na ba faisia toa mae ki, ka alua kai ono ibali aba aola nia i thalo lo ki,

²¹ Ka inoto ka tatha faamau ana toa eki sui bana na kera tatha inao, ma naona toa ki, ma toa sukwai ki, ma toa gwauwai ki, ma atona bana ta si do na kera sorea thatana, talitoona bana i kada nei e ai, i kada eri lau boo na ni u mai:

²² Ma nia alua si do ki sui bana ka roo sulia ifara aaena, ma ka fale nia ifana figua eri fasi kai gwau ania, inoto asi do ki sui bana,

²³ Ma figua eri na ṉa seena, si do ne to isana fasi nia kai laulau na ka faafuṉua si do eri sui bana ani nia ta si kula si ei.