Si do Aposela ki kera ilidaki 9 - Ṉa Alaofua Falu 1923 1949

¹ Tha Solo molo kai ṉata ṉado bana sulia faamau lana ma thauṉi lana toa na ṉa Lord e toleda, ma ka lae isana aofia ni foa,

² Ka gania leta ki isana ofu la eki nai Damasikasi, fasi mada sa nia kai fulatoona tei imole na kera ni ana ṉa Tala eri, wane ki mado kini ki, kai kanida, kai toleda uri Jerusalema.

³ Ma lalae mai, ka fula karaṉia Damasikasi: ma lalaa la ita mai i thalo ka fula fatonana, ka laa kakali nia:

⁴ Ma nia asi nia i theegano, ma ka roṉoa ṉata la ne una eri isana, Solo, Solo, uria ta noki tona ilamatai nau?

⁵ Ma nia sorea, Oe ni tei, Lord? Ma ṉa Lord ka sorea, Nau tha Jesus, Wane noki tona ilamatai nau: e afetai iamu soki ato falaburi i maana sua.

⁶ Ma nia leleba ma ka tona, ka sorea, Lord, si ta noki thathamia kwai ilia? Ma ṉa Lord ka soree isana, Tatae, oki lae i la toaa susu, ma keki bii faaroṉo oe asi do noki ilia e ai si ei boo.

⁷ Ma wane eki na kera lae bi nia kera takwe, keka bona bada, kera roṉoa liṉana si ṉata eri, ma kesi rikia boo ta wane.

⁸ Ma tha Solo e tatae faisia theegano; ma si maṉa ne tharai, e ai si rikia fanua; ma kera rau i abana, keka talai nia uri Damasikasi.

⁹ Ma sulia ulu fa boṉi e ai si lio, e ai si faṉa me ai si kuu.

¹⁰ Sui tee nonii wane na tha Jesus e tole nia e ni Damasikasi, thatana tha Ananiasi; ma ṉa Lord ka soree isana ana si na kera fatai lalaa ania, Ananiasi ae. Ma nia ka sorea, Rikia fasi, nau nania, Lord.

¹¹ Ma ṉa Lord ka soree isana, Oki tatae, oki lae uria tala eri na kera alaṉia ana Kokoto, ma oki soetoona toa nai biu tha Judasi uria tee wane i Tasasi, thatana tha Solo: uria rikia fasi, wane eri kai foa;

¹² Ma nia e rikia ana si na kera fatai lalaa ania tee wane thatana tha Ananiasi kai kotho mai, kai alua ro aba nia ki fafi nia, fasi kai lio.

¹³ Ma tha Ananiasi e luua, Lord, toa oro kera faaroṉo nau ana wane eri, asi do taa oro ne ilia ana toa abu oe ki nai Jerusalema:

¹⁴ Ma i fanua nai wane inoto ni foa ki kera faasukwai nia fasi kai kania toa eki sui bana na kera ’ai ana thatamu.

¹⁵ Ma ṉa Lord ka soree isana, Oki lae amua: uria nia do ni taiṉei la na nau ku filia ifaku, fasi kai ṉalia thataku inaofana Jenetaele ki ma kiṉa ki, ma kwalafa tha Isirela:

¹⁶ Uria ni nau kwai fatai nia do baita oro isana na kai thauṉi nia e ai si ei boo inunufana thataku.

¹⁷ Ma tha Ananiasi e lae, ka kotho i biu eri; me alua ro aba nia ki fafi nia, ka sorea, Solo, doora ae, ṉa Lord, na tha Jesus, ne fula fatai isamu ana tala ba no lae mai sulaania, e arasi nau mai, fasi oki lio, ma keki faafuṉu oe atha Spirit Abu.

¹⁸ Ma si maṉa eri u boo si do ne ’uria tei uṉee ia ne toto fafia maana ka asia, ma nia ka lio si maṉa eri u boo; sui ka tatae, keka babataesi nia;

¹⁹ Ma nia ania ta si faṉa ma kera faasukwai nia. Ma tha Solo e to sulia fa boṉi eki bia toa na tha Jesus e toleda na kera ni Damasikasi.

²⁰ Ma si maṉa eri u boo nia ka ṉata sulia tha Christ i lala biu ni ofu la eki, na nia Kaluwane tha God.

²¹ Ma toa eki sui boo na kera roṉoa ṉata lana keka tona, ma keka sorea, Ta na sa wane ba nania ne lalabatania toa na kera ’ai ana thata eri i Jerusalema: me lae mai uri fanua nai uria si kula eri, uria kani lada kai talai kera inaofana wane inoto ni foa ki, mado?

²² Ma sui tha Solo ka sukwai alaa, ma ka adea Ju eki nai Damasikasi keka kwaikonai ani nia, ka faamamanea na Wane ba ṉa Christ boo.

²³ Ma lalae fa boṉi oro ki e sui, Ju ki kera furia ṉata suli nia si ade la na keki ilia fasi keka thauṉia:

²⁴ Ma tha Solo ka roṉoa si do na kera ṉata. Ma kera takwe suusia maethaka eki ana sulufau afa thato mafa rodo fasi keki thauṉi nia:

²⁵ Una ena mena, toa na tha Jesus e toleda kera talai nia afa rodo, keka faasifoa faisia sulufau eri, keka sifolaṉai nia i lala nanado.

²⁶ Ma tha Solo lalae e fula i Jerusalema, ka thathamia sa kai safua toa na tha Jesus e toleda: ma toa eki sui boo kera mau ani nia, kesi faamamanea ne wane tha Jesus e tole nia mamana boo.

²⁷ Sui tha Banabasi e rau i abana, ka talai nia isana aposela ki, ma ka uunu sulia riki la eri isada ne rikia ana ṉa Lord sula tale na ba, ne ṉata isana, ma sulia ṉata la ne ṉata seeraa ania i Damasikasi ana thatana tha Jesus.

²⁸ Ma nia to bida, ka lae olili i maalutada i Jerusalema,

²⁹ Kai ṉata seeraa ana thatana tha Lord Jesus: ma nia ka oli susuu bia Ju na kera ṉata ana ṉata lana toa i Girisi; sui toa eki kera rofe uria thauṉi lana la.

³⁰ Ma si maṉa na baree wai doorana eki kera thaitoomana, keka tole nia kai sifo uri Sesaria, keka arasi nia uri Tasasi.

³¹ Sui figua eri ana fanua i Judia sui boo ma i Galili ma i Sameria e to ana enenoa, ma kera faasukwaida, ma, uria na kera abula ana mau la uria tha Lord ma ana faainamaruki la na tha Spirit Abu e faainamarukida ania, kera oro ka oli alaa.

³² Ma lalae mai, si maṉa na tha Pita kai liu ana fanua eki sui bana, nia sifo lau boo isana toa abu nai Lida.

³³ Ma i fanua eri nia ka fulatoona tee nonii wane thatana tha Aeneasi, ne to i la do ni teo nia sulia kwalu fa ṉali; uria na afemae e thauṉi nia.

³⁴ Ma tha Pita ka soree isana, Aeneasi ae, tha Jesus Christ kai faamaruki oe: tatae, oki thamatania do ni teo oe. Ma si maṉa eri u boo nia ka tatae.

³⁵ Ma toa eki sui bana nai Lida bia Sarona kera riki nia, ma kera akele uria ṉa Lord.

³⁶ Sui tee kini na tha Jesus e tole nia e ni Jopa, thatana ni Tabitha, ma toolaṉai lana thata eri ni Dokasi: kin, eri e seemabe ṉado asi ra lea ki ma ana fale la ne fale ana toa na kera to ana rofe la.

³⁷ Ma lalae mai afa boṉi eki, mataia e thauṉi nia, ka mae: ma buriana na kera siufi nia e sui, keka alua kai teo i lala tee kadee biu laṉi.

³⁸ Ma uria nai Lida e ni karaṉia i Jopa, toa na tha Jesus e toleda kera roṉoa na tha Pita ni kula eri, keka arasia ro nonii wane isana, kera ṉata kwaitakoi isana, keka sorea, Osi toto lau, oki lae bonamai isamilia.

³⁹ Ma tha Pita ka tatae, ka lae bidaroa. Lalae mai e fula, keka talai nia uria kadee biu laṉi eri: ma gwa oru eki sui boo kera takwe isana, keka aṉi, ma keka fatai nia tooni ki ma si maku na ni Dokasi e taidaki, si maṉa ne to bida.

⁴⁰ Ma tha Pita e asuwai teefau ani kera i maa, ka boururu iano, ma ka foa; me akele uria seena kini eri, ka sorea, Tabitha ae, oki tatae. Ma nia tharai; ma si maṉa ne rikia tha Pita, ka tatae ia, ka ono.

⁴¹ Ma nia rau i abana, ma ka tataea; sui ka ailia mai toa abu eki ma gwa oru eki, ma ka fatai nia ne maruki.

⁴² Ma si do eri e talofia toaa susu i Jopa ni sui bana: ma toa oro keka fitoona ṉa Lord.

⁴³ Ma nia to i Jopa sulia fa boṉi oro ki bia tee nonii wane, thatana tha Saimona, wane ni ra la ana uṉana do ki.